ՀՅԴ ԽՄԲԱԿՑՈՒԹՅՈՒՆՈՒՄ ՃՆՇՈ՞ՒՄ ԵՆ ՊԱՏԳԱՄԱՎՈՐՆԵՐԻՆ

ՀՅԴ ԽՄԲԱԿՑՈՒԹՅՈՒՆՈՒՄ
ՃՆՇՈ՞ՒՄ ԵՆ ՊԱՏԳԱՄԱՎՈՐՆԵՐԻՆ

Երեկ "Իրավունքի" հետ զրույցում ԱԺ ՀՅԴ խմբակցության պատգամավոր ՄԻՔԱՅԵԼ ՄԱՆՈՒԿՅԱՆՆ անկեղծացավ եւ նշեց, որ իրենց խմբակցությունում որոշում է կայացվել` այլեւս չխոսել մեր լրատվամիջոցի հետ: Հենց այս մասին էլ ծավալվեց մեր զրույցը նրա հետ.
– Պարոն Մանուկյան, բայց մշտապես Ձեր խմբակցության պատգամավորների հետ խոսել ենք, ու որեւէ խնդիր չի եղել:
– Նախատել են դրա համար, որ էլ չպատասխանեն:
– Մի՞թե հնարավոր է: Փաստորեն, Ձեր խմբակցությունում դիկտատուրական մթնոլո՞րտ է տիրում:
– Հնարավոր է, հենց "կակռազ" մեր մոտ է հնարավոր:
– Հուսամ` կատակ էր սա, որովհետեւ զարմանալի է, որ լուրջ խմբակցությունում նման որոշումներ կարող են կայացվել:
– Իրոք այդպիսի հարց քննարկվել է, լուրջ եմ ասում:
– Ես էլ մի լուրջ հարց ունեմ` լրատվամիջոցներից մեկը նշել էր, որ ՀՅԴ-ն արդեն կոմպրոմիսի է եկել իշխանությունների հետ եւ շուտով կոալիցիայի մաս կկազմի: Որքանո՞վ է սա համապատասխանում իրականությանը:
– Տեղյակ չեմ այդպիսի որոշումների մասին: Բնական է, որ չի կարող այդպիսի որոշում լինել, այլապես ես հաստատ տեղյակ կլինեի:
– Ընդ որում, նույն նյութում նշված էր, թե 5 նախարարական պորտֆելի դիմաց է ՀՅԴ-ն համաձայնել կոալիցիա կազմել...
– Այդպիսի բան չկա:

ՀՐԱՆՏ ՍԱՐԱՖՅԱՆ
Հ.Գ.- Ի դեպ, մեր ունեցած տեղեկությունների համաձայն` մանկապարտեզ հիշեցնող որոշումը, որը կայացրել է ՀՅԴ խմբակցությունը, առաջարկը եղել է ԱԺ ՀՅԴ խմբակցության քարտուղար Աղվան Վարդանյանի կողմից, ով պատգամավորական գործունեությամբ զբաղվելու փոխարեն, ԱԺ-ում շախմատ է խաղում ու պարբերաբար հայտնվում "Իրավունքի" ֆոտոխցիկի առաջ: Մինչդեռ, իսկապես պատգամավորական գործունեությամբ աչքի ընկնող ՀՅԴ-ական պատգամավորները բողոքելու ու նեղանալու ո՛չ առիթ ունեն, ո՛չ էլ` ժամանակ: