ԲՀԿ-Ն ԱՆՑՆՈՒՄ Է ԴԵՌԱՀԱՍՈՒԹՅԱՆ ԴԺՎԱՐԻՆ ՓՈՒԼԵՐԸ

ԲՀԿ-Ն ԱՆՑՆՈՒՄ Է ԴԵՌԱՀԱՍՈՒԹՅԱՆ ԴԺՎԱՐԻՆ ՓՈՒԼԵՐԸ

Մարտի 5-ին տեղի ունեցավ ԲՀԿ-ի արտահերթ համագումարը, որն իր հետ առաջ բերեց նոր հարցեր, որոնք մինչ այժմ մնացել են անպատասխան: Այդ կապակցությամբ "Իրավունքը" ԲՀԿ պատգամավոր, ԲՀԿ մամուլի խոսնակի պարտականությունները ժամանակավորապես կատարող ՎԱՀԱՆ ԲԱԲԱՅԱՆԻՆ մի քանի հարց ուղղեց:
-ԲՀԿ նախկին ղեկավար Գագիկ Ծառուկյանը հայտարարեց, որ վայր է դնում կուսակցության նախագահի եւ խմբակցության ղեկավարի լիազորությունները եւ իր անձնական կամքով չի զբաղվելու քաղաքականությամբ: Նաիրա Զոհրաբյանը, սակայն, հայտարարեց, որ պարոն Ծառուկյանը մնալու է կուսակցությունում: Փաստորեն, ԲՀԿ-ի նախկին ղեկավարը` որպես ԲՀԿ անդամ, շարունակելու է անդամավճար վճարե՞լ:
– Լուրջ հարցեր տվեք, ես կպատասխանեմ: Քաղաքական հարցեր տվեք: Ինտրիգային բաներ եք փնտրում…
– Պրն Բաբայան, եթե Գագիկ Ծառուկյանը հայտարարում է, որ չի զբաղվելու քաղաքականությամբ, բայց մնում է կուսակցությունում…
– Ես չեմ կարող ձեր տված հարցերին պատասխանել: Եկեք զերծ մնանք…
– Ինչո՞ւ:
– Որովհետեւ Գագիկ Ծառուկյանի ելույթում ամեն ինչ ասված է, ես ավելացնելու լիազորություն ու հնարավորություն չունեմ:
– Պարզապես, ուզում ենք հասկանալ Գագիկ Ծառուկյանի ու Նաիրա Զոհրաբյանի հայտարարությունների տրամաբանությունը:
– Տրամաբանություն գտնելը պետք է թողնել վերլուծական շրջանակներին, քանի որ մենք գործող քաղաքականության մեջ ենք ու վերլուծություններով չենք զբաղվում:
– Մարտի 5-ին` ԲՀԿ-ի համագումարից հետո, ԲՀԿ համամասնական ցուցակը զբաղեցնող երկրորդ համարը` Վարդան Օսկանյանը, հայտարարեց, որ դուրս է գալիս նաեւ այն բանի համար, որ կուսակցությունը չիրականացրեց բացարձակ մեծամասնության ցանկությունը` այս փուլում արմատական փոփոխություններ իրականացնելու համար: Կարելի՞ է ենթադրել, որ Օսկանյանը, արմատական փոփոխություններ ասելով` նկատի ուներ հեղաշրջում ու մայդան իրականացնել Հայաստանում, որի մասին տեղյակ չէր ԲՀԿ-ն:
– Ես տեղյակ չեմ` պրն Օսկանյանն ինչ է ցանկացել ասել: Դա պրն Օսկանյանի անձնական ու գործնական իրավունքն է: Չեմ ուզում մեկնաբանել մեր ներկա ու նախկին գործընկերների հայտարարությունները: Ես ԲՀԿ-ի պաշտոնական տեսակետն եմ ներկայացնում:
– Եթե անգամ նա ԲՀԿ ցուցակի երկրորդ համա՞րն էր:
– Ես հարգանքով եմ վերաբերվում մեր բոլոր ներկա ու նախկին գործընկերներին, որոնք իրավունք ունեն հրապարակային հայտնել իրենց կարծիքը:
– ԲՀԿ-ն իր նախընտրական ծրագրում կողմ է արտահայտվել կառավարման խորհրդարանական համակարգին, որը կլինի միայն սահմանադրական բարեփոխումներից հետո: Ինչո՞ւ է հիմա ԲՀԿ-ն դեմ այդ բարեփոխումներին:
– Մենք հիմա տրանսֆորմացիոն շրջան ենք անցնում: ԲՀԿ-ն հիմա զբաղված է բոլորովին այլ գործառույթներով: Երբ կարգավորվեն մեր ներքին խնդիրները, տրանսֆորմացիան ավարտվի, մենք կպատասխանենք ներքին ու արտաքին քաղաքական խնդիրների մասին ձեր հարցերին:
– Այսինքն` սահմանադրական բարեփոխումների վերաբերյալ հնչեցրած իր տեսակետը ԲՀԿ-ն հնարավո՞ր է վերանայի:
– Ես կրկնում եմ` ԲՀԿ-ն տրանսֆորմացիոն շրջանում է: Մենք պետք է անցկացնենք քննարկումներ` բազմաթիվ ներքին ու արտաքին քաղաքական խնդիրների շուրջ, հստակեցնենք մեր դիրքորոշումը: Իսկ դա կախված է նրանից, թե ԲՀԿ-ի խորհրդարանական խմբակցությունում ու կուսակցությունում, որ գործիչները կմնան, որ գործիչները կլքեն, ինչպիսի քաղաքական թիմ կձեւավորվի: Դրանից հետո մենք կխոսենք կոնկրետ հարցերի շուրջ, այդ թվում` սահմանադրական բարեփոխումների մասին:
– ԲՀԿ խմբակցության ղեկավարի գործառույթներն ո՞վ է այս պահին կատարում:
– ԲՀԿ խմբակցությունը պետք է անցկացնի նիստ, ընտրի ղեկավար:
– "Իրավունքին" տված Ձեր վերջին հարցազրույցում հայտնելով Ձեր անձնական կարծիքը` ասել էիք, որ ԲՀԿ-ն չի պահանջի արտահերթ նախագահական ու խորհրդարանական ընտրություններ, ասել է թե` իշխանափոխություն, սակայն օրեր առաջ հայտարարել էիք, որ ընդդիմությունը պետք է իշխանափոխություն պահանջի: Հիմա, ինչ է, մտքափոխվե՞լ եք:
– Մտքափոխվելու խնդիր չկա: Կրկնում եմ` ԲՀԿ-ն հիմա տրանսֆորմացիոն փուլում է, թիմային խնդիրներ կան, ֆորս-մաժորային իրավիճակ է: Հետեւաբար, այս պահին խոսել արտահերթ գործընթացների մասին, ուղղակի անլուրջ է:
– Եթե Գագիկ Ծառուկյանը հայտարարում է, որ քաղաքականությամբ չի զբաղվելու, պատգամավորական մանդատն էլ վայր չի դնելու, ինչո՞վ է զբաղվելու Ծառուկյանը ԱԺ-ում:
– Այդ հարցերը իմ լիազորության շրջանակներում չեն: Ուղղեք հարցեր, որոնք առնչվում են մեր կուսակցությանն ու ինձ:

ՍՈՆԱ ԴԱՎԹՅԱՆ