ԶԱՐՄԱՆՔ

Երբեմն քաղաքական գործիչ կոչեցյալները այնպիսի մարազմատիկ բաներ են հնչեցնում, որ զարմանալիորեն սկսում եմ անկեղծորեն նախանձել քաղաքականությամբ չհետաքրքրվողներին: Այսպես, մարդ-կուսակցություն ԱՐԱՄ ՀԱՐՈՒԹՅՈՒՆՅԱՆԸ, ով իրավամբ բոլոր ընտրությունների արդյունքներով վաստակել է "պարոն զրո ամբողջ տոկոս" կոչումը, ոչ ավել, ոչ պակաս հայտարարեց. "Չէր բացառվում, որ Սերժ Սարգսյանը, պատանդի կարգավիճակում պահելով Ծառուկյանին, օրերից մի օր օգներ նույն Ծառուկյանին` ինքնասպան լինել": Ականջդ կանչի Ռոբերտ Քոչարյան, ուր են քո հիշատակած "ուրիշ մասնագետները", թեեւ այս դեպքում երեւի թե նրանք էլ չեն փրկի: Պարզապես, երեւի թե, իմաստ ունի եւ տրամաբանական կլինի որոշ օրենքներ փոխել` եթե հասարակ ավտոմեքենա քշելու համար պետք է "փսիխո" անցնել, ապա ինչո՞ւ առանց այդ կարեւորագույն տեղեկանքի, Պետռեգիստրը մարդկանց գրանցում է որպես կուսակցապետ:
Արամ Հարությունյանի համեմատ, մի տեսակ լուսավոր ու նույնիսկ համակրելի է երեւում դժբախտագույն ԼԵՎՈՆ ԶՈՒՐԱԲՅԱՆԸ: Նա անկեղծորեն մեզ զարմացրեց եւ ուրախացրեց, երբ "ռեժիմը խուճապի մեջ է" իր մշտական բանաձեւին հավելեց նորություն. "Հայաստանի բոլոր առողջ ուժերը միավորվել են բռնապետության վերարտադրման ծրագրի դեմ, եւ բնականաբար, սա մի դաշտ է, որտեղ մենք կարող ենք համագործակցել: ԱԺ-ում նույնպես բազմաթիվ հարցերի շուրջ կարող ենք համագործակցել: Այնպես որ, համագործակցության դաշտը շատ մեծ է":
Եթե շատերի "յանը տարել է" "Սերժ Սարգսյանի ռեժիմի" վրա, ապա զարմանալիորեն որոշ ընդդիմադիր պարոնների իդեա-ֆիքսը Վլադիմիր Պուտինից ազատվելն է: Այսպես` ԶԼՄ-ները տարածել են հաղորդագրություն, որ Ռուսաստանի նախագահ Վլադիմիր Պուտինը երկրի Կենտրոնական բանկին եւ կառավարությանը հանձնարարել է որոշել Եվրասիական տնտեսական միության շրջանակում արժութային եւ ֆինանսական ինտեգրման հետագա ուղղությունները, ինչպես նաեւ ուսումնասիրել ապագայում արժութային միության ստեղծման նպատակահարմարությունն ու հնարավորությունը:  Պուտինի այս հանձնարարականի արդյունքները պետք է զեկուցվեն մինչեւ այս տարվա սեպտեմբերի 1-ը: Թվում է, թե քաղաքագետի կամ այլ լուրջ մասնագետի կոչմանը հավակնող ցանկացած ոք կքննարկեր` ինչքանո՞վ է իրատեսական հենց այս տարի կազմել ընդհանուր արժույթի նախագիծը, ինչքանո՞վ է նպատակահարմար դա քաղաքական տեսակետից, դա ի՞նչ  կտա կամ չի տա Հայաստանին: Բայց արի ու տես, որ ինքն իրեն քաղաքագետ անվանող ՍՏՅՈՊԱ ՍԱՖԱՐՅԱՆԸ զարմանալիորեն որոշել է Պուտինի "դատավճիռը" կարդալ. "Սույն ինքնասիրահարվածը յուր հետույքը փրկելու փոխարեն շարունակում է երազել ու իրեն կռուտոյ տղա երեւակայել...": Հետաքրքիր է, իսկ գոնե Կրեմլի պահակի մակարդակով Մոսկվայում տեղյա՞կ են Ստյոպա Սաֆարյանի գոյության մասին:
Ոչ պակաս պուտինատյաց, նույնպես քաղաքագետ համարվող ՌՈՒԲԵՆ ՄԵՀՐԱԲՅԱՆՆ էլ զարմանալիորեն կպավ կանանց ջանից: Հիշում եք, ժամանակին ԱՐ հեռուստաընկերությունում ստեղծվել էր "չֆիլմ" ոճը: Եվ ահա Մեհրաբյանը որոշեց հետ չմնալ եւ մոգոնեց չշնորհավորանք. "Ես չեմ ուզում կասկածանքի տակ դնել սերս եւ հարգանքս կանանց նկատմամբ, շնորհավորելով էսօրվա սավոկ ու գյադա "տոնի" կապակցությամբ: Առանց հերթապահ զեղումների, մաղթում եմ ամենայն բարիք, հայցելով կանանց ներողամտությունն իմ մասով, որ մենք չունենք նորմալ պետություն, որտեղ նման սավոկ եւ գյադա "տոները" տեղ չունեն: Լավ եղեք, սիրելի կանայք, ձեր լավ լինելը կենսականորեն կարեւոր է մեզ համար": Դե, ինչ ասես սրան` հեռու մեզանից, հեռու սեղանից:
Բայց իհարկե, ամենամեծ դառնությունը ապրում է հայկական ազգանուն կրող չհայ կինոռեժիսոր ՏԻԳՐԱՆ ԽԶՄԱԼՅԱՆԸ, ով հարկադրված արեց հետեւյալ դառը խոստովանությունը. "Ինչեւէ, մեզանում ստեղծվեց այսօր մի անհեթեթ իրավիճակ, երբ երկիրը սնանկ եւ իրավազուրկ դարձրած իշխանությունը առավել հասկանալի եւ ընդունելի է աշխարհի ու, ամենասարսափելին` սեփական ժողովրդի համար, քան խայտաբղետ բայց անդեմ ու անատամ ընդդիմությունը":

Զարմացած է
ՀՈՎՀԱՆՆԵՍ ԳԱԼԱՋՅԱՆԸ