ՊԱՐՈՒՅՐ ՀԱՅՐԻԿՅԱՆԸ`ՎԱՀԱՆ ԲԱԲԱՅԱՆԻՆ. «ԽԵՂՃ ՏՂԱ Է, ԴԺԲԱԽՏ ՏՂԱ Է...»

ՊԱՐՈՒՅՐ ՀԱՅՐԻԿՅԱՆԸ` ՎԱՀԱՆ ԲԱԲԱՅԱՆԻՆ. «ԽԵՂՃ

ՏՂԱ Է, ԴԺԲԱԽՏ ՏՂԱ Է...»

ԱԻՄ առաջնորդ Պարույր Հայրիկյանից այսօր «Իրավունքը» պարզաբանում ստացավ ԲՀԿ առաջնորդ Նաիրա Զոհրաբյանի ու ԲՀԿ մամուլի ժամանակավոր պատասխանատու Վահան Բաբայանի` Հայրիկյանի հասցեին հնչեցված հայտարարություններին:

Հիշեցնենք` Նաիրա Զոհրաբյանը հայտարարել էր, որ իր արժանապատվությունից ցածր  է համարում պատասխանել Հայրիկյանին: Վահան Բաբայանն էլ  հայտարարել էր, որ սազական չէ քաղաքական գործչին անել նման հայտարարություններ (նկատի ունի  ԲՀԿ-ի հասցեին հնչեցված  Հայրիկյանի հետեւյալ հայտարարությունը` «Երեկ լսում էի նրանց նոր ղեկավարի հայտարարությունը, իր բառերով ասեմ՝ կարծես կլոունի տեսնեի: Ասում է՝ մենք մեր որոշումով ենք այս քայլերին դիմել: Ամբողջ աշխարհը գիտի, որ Սերժ Սարգսյանը կանչեց, ասաց՝ այսպես պիտի անես, իրենք էլ արեցին»):

Ի պատասխան ԱԻՄ առաջնորդն ասաց, որ իր ֆեյսբուքյան էջում անդրադարձել է վերոնշյալ քաղաքական  գործիչների հայտարարություններին: «Եթե իրենց արժանապատվությունից ցածր են համարում արձագանքելը, ինչո՞ւ են արձագանքել: Փաստորեն արձագանքել են»,- ծիծաղեց Հայրիկյանը:

Ըստ նրա` այդ երկու քաղաքական գործիչները ապուշություններ են դուրս տվել: «Նրանք ասում են, որ ես ինչ-որ մականուն եմ ունեցել բանտում նստած տարիներին: Ես էլ ասում եմ, եթե այդ մականունը չասես, տղայիկ ջան, կանգնելու ես պատասխանատվության առաջ: Ես բանտում եղել եմ ամենահարգված մարդը: Հայրիկյանն ինչ կասեր, համարվում էր չափանիշ»,- ասաց նախագահի նախկին թեկնածուն, ապա հիշեցրեց` իր մասին բավական շատ օտարալեզու գրքեր ու հոդվածներ են հրապարակվել, որտեղ խոսվում է  ԱԻՄ առաջնորդի անցած ճանապարհի ու Հայաստանի անկախության համար ունեցած ներդրումի մասին:

ԲՀԿ-ականները, սակայն, դրա մասին չեն հիշում, եւ ըստ քաղաքական գործչի` պարտավոր չեն հիշել. «Իրենք պարտավոր են հիշել իրենց առաջնորդին: Նաիրա Զոհրաբյա՞նն  է  իրենց առաջնորդը»:

Պարույր Հայրիկյանն իր հասցեին հնչեցված հայտարարությունների համար ոչ մի քայլ չի պատրաստվում անել. «Խեղճ տղա է, դժբախտ տղա է (նկատի ունի Վահան Բաբայանին-խմբ.): Էդ տեսակ գործերն էլ փաստաբանի վրա եմ թողնում: Բայց ես շանս տվել եմ: Թող` ես ինչ մականուն եմ ունեցել, ա՛յ տղայիկ, ա՛յ պուճուրիկ»:

Ի դեպ, նախագահի նախկին թեկնածուն հիշեցրեց, որ ԲՀԿ-ն վատ պահեց իրեն նաեւ այն ժամանակ, երբ մահափորձ էր կազմակերպվել իր հանդեպ:  «Ես իրենց դեմ ոչինչ չունեմ: Աստված իրենց հետ»,- եզրափակեց ԱԻՄ առաջնորդը:

ՍՈՆԱ ԴԱՎԹՅԱՆ