ՍՏԵՓԱՆ ՍԱՖԱՐՅԱՆԸ «ՁԵ՞Ռ Է ՔԱՇԵԼ» ՐԱՖՖԻ ՀՈՎՀԱՆՆԻՍՅԱՆԻՑ

ՍՏԵՓԱՆ ՍԱՖԱՐՅԱՆԸ «ՁԵ՞Ռ Է ՔԱՇԵԼ» ՐԱՖՖԻ ՀՈՎՀԱՆՆԻՍՅԱՆԻՑ

«Ազգային անվտանգություն» կուսակցության ղեկավար Գառնիկ Իսագուլյանը օրեր առաջ մեղադրեց ՀԱԿ առաջնորդ Լեւոն Տեր-Պետրոսյանին ու  «Ժառանգություն» կուսակցության ղեկավար Րաֆֆի Հովհաննիսյանին` ԲՀԿ նախկին առաջնորդ Գագիկ Ծառուկյանին միայնակ թողնելու ու փետրվարի 20-ին հանրահավաքը  չեղյալ համարելու համար: «ժառանգության» անդամ, Ստեփան Սաֆարյանից «Իրավունքը» հետաքրքրվեց, թե որքանով է «Ժառանգություն» խմբակցության նախկին քարտուղարը տեսնում իր արեւմտամետ առաջնորդի մեղավորության բաժինը, հեղաշրջման փորձի տապալման հարցում: Ես չեմ կարող Րաֆֆի Հովհաննիսյանի փոխարեն պատասխանել, այդ երկու կուսակցությունը պետք  է արձագանքի հայտարարությանը: «Բայց այն, որ այս տապալման համար պետք  է մեղավորներ փնտրեին, ակնհայտ է»,- ասաց նա:

Ըստ Սաֆարյանի` մեղադրանքների առաջին ռաունդը սկսվեց ՀԱԿ-ի ու ԲՀԿ-ի միջեւ`  Լեւոն Տեր-Պետրոսյանի` Սերժ Սարգսյանին ուղղված բաց նամակով, երկրորդը` Լեւոն Տեր-Պետրոսյանի «Սրտիս պարտքը»  հոդվածով, որտեղ մեղադրում էր Գագիկ Ծառուկյանի մերձավոր շրջապատին: «Հավանաբար,  այդ մերձավոր շրջապատի  մեջ մտնում է նաեւ Գառնիկ Իսագուլյանը: Տեր-Պետրոսյանն ասել էր վերլուծաբանների հավակնող մարդիկ` նկատի ունենալով մի քանի լրատվամիջոցների ղեկավարների ու Գառնիկ Իսագուլյանին, ով եւս պետք է պաշտպանվեր Տեր-Պետրոսյանի մեղադրանքներից»,- ասաց Սաֆարյանը:

- Գառնիկ Իսագուլյանի մեղադրանքը «Ժառանգության» առաջնորդ Րաֆֆի Հովհաննիսյանին  տեղի՞ն եք համարում:

- Երեք ուժերից եւ ոչ մեկը չի ներկայացրել հիմնավորում` ինչու է չեղյալ համարվել  հանրահավաքը: Որքան էլ նրանք  միասին են ընդունել հանրահավաք անցկացնելու որոշումը, նրանք ժողովրդին չեն բացատրել` ինչու այն տեղի չունեցավ:

- «Ժառանգության»  առաջնորդին առաջվա նման չե՞ք պաշտպանում  հարձակումներից…

- Որովհետեւ ես «Ժառանգություն» կուսակցությանը չեմ ներկայացնում, բացի այդ` ես պատասխանատու չեմ դրա համար: Նաեւ հավատացեք, եթե եռյակի ներսում իրար են մեղադրում, «եռյակն» ինքը պետք  է պատասխանի:

- Իսկ  համամի՞տ եք ձեր գործընկերոջ Զարուհի Փոստանջյանի այն  հայտարարությանը, թե «Եռյակ» ի սկզբանե  չի եղել:

- Զարուհին նկատի ուներ, որ «եռյակն» օրակարգ չուներ, պարզապես ճիշտ բառը չի օգտագործել: «Եռյակ» եղել է, օրակարգ չի ունեցել:

- Լեւոն Տեր-Պետրոսյանի ելույթի  կոդավորված  հատվածը, որով  ՀԱԿ առաջնորդը հեգնում է  իր նախկին գործընկերներին` Նիկոլ Փաշինյանին, Ալեքսանդր Արզումանյանին, Արամ Զավենի Սարգսյանին, Րաֆֆի Հովհաննիսյանին, Պարույր Հայրիկյանին, ի՞նչ մեսիջ էր մեր հանրությանը:

- Դա ավելի շատ ու առաջին հերթին մեսիջ էր Ռուսաստանին, որ եթե թողնեն նա ազատի Ազատության հրապարակը (նկատի ունի  հեռանալ հրապարակից-խմբ.), իր փոխարեն այստեղ կգան քաղաքական  ավելի վատ ուժեր եւ կպահանջեն Պուտինի հրաժարականը: Քանի որ Լեւոն Տեր-Պետրոսյանը ներսում իրեն զրկել է որեւէ մեկի հետ համագործակցելու հնարավորությունից, նա հիմա պետք է ազդեցիկ այլ ուժերի  միջոցով պահպանի իր դիրքը քաղաքական դաշտում 2017 թ-ին խորհրդարանական ընտրություններին ընդառաջ:

ՍՈՆԱ ԴԱՎԹՅԱՆ