ԱՅՍՕՐ ՆՇՎՈՒՄ Է ՄԵԾ ՊԱՀՔԻ ՄԻՋԻՆՔԸ

ԱՅՍՕՐ ՆՇՎՈՒՄ Է ՄԵԾ ՊԱՀՔԻ ՄԻՋԻՆՔԸ

Մեծ պահքի չորրորդ չորեքշաբթին կամ 24-րդ օրը կոչվում է Միջինք, որը կիսում է Մեծ պահքը: Ըստ Մաղաքիա արքեպիսկոպոս  Օրմանյանի` Միջինք անունը տրվում է Մեծ պահքը կիսող օրվան, որը հոգեւոր տոնական նշանակություն չունի: Այն ավելի շատ հագեցած է ժողովրդական սովորություններով: Մեծ պահքն այս տարի կիսվում է մարտի 11-ին, որով չի ընդհատվում պահքը, այսինքն` պահեցողները շարունակում են պահել պահք: Միջինքից սկսած` երեկոյան ժամերգության ընթացքում սկսում են երգել Ստեղի շարականները: Ըստ ժողովրդական ավանդության այդ օրը  տանտիկինները թխում են բաղարջ, որի մեջ դնում են նշան:

Հայրապետական թեմի առաջնորդանիստ Սուրբ Սարգիս եկեղեցու հովիվ ՏԵՐ ՊԵՏՐՈՍ քահանա ՄԱԼՅԱՆԻ խոսքով` Միջինքը մի հանգրվան է, երբ հավատացյալն ապրելով Մեծ պահքի կեսը իր աղոթքներով  շարունակում  է ճանապարհը դեպի հաջորդ հանգրվան`Քրիստոսի հրաշափառ հարությունը. «Միջինքը միշտ համընկնում է չորեքշաբթի օրվա հետ: Միջինքի հիմնական հոգեւոր խորհուրդը Մեծ պահքը կիսելու մեջ է: Միջինքի մնացած մասը արդեն զուտ մեր ժողովրդական սովորություներն են»,- նշեց քահանա Մալյանը:

Անդրադառնալով Միջինքի ժողովրդական սովորություններին եւ ծեսերին, Արարատյան Հայրապետական թեմի տեղեկատվական բաժնի թեմական ծրագրերի համակարգող ՀԱՍՄԻԿ ՄԻՐԶՈՅԱՆԸ ընդգծեց, որ  արդեն երկրորդ տարին է, ինչ թեմի երիտասարդների ջանքերով պատրաստվում է 10-ից ավելի Միջինքի ուտեստներ, որը մատուցվում է ոչ միայն երիտասադներին, այլեւ հավատավոր ժողովրդին. «Այս տարի եւս մենք այդ արարողությունը կնշենք ավելի մեծ շուքով: Մոտավորապես 11 ուտեստ  կպատրաստենք եւ կհյուրասրենք հայ ժողովրդին: Օրը հագեցած կլինի նաեւ  ազգագրական երգ ու պարով»,- տեղեկացրեց Հ Միրզոյանը:

ԶՎԱՐԹ ԽԱՉԱՏՐՅԱՆ