"ԵԹԵ ՊԱՏԵՐԱԶՄ ԵՆ ՈՒԶՈՒՄ, ՄԵՆՔ ՄԻՇՏ ՊԱՏՐԱՍՏ ԵՆՔ"

"ԵԹԵ ՊԱՏԵՐԱԶՄ ԵՆ ՈՒԶՈՒՄ, ՄԵՆՔ ՄԻՇՏ ՊԱՏՐԱՍՏ ԵՆՔ"

Գաղտնիք չէ, որ վերջին օրերին հերթական անգամ սահմաններին իրավիճակը լարվել էր, ունեցանք նոր դիվերսիաներ, զոհեր: Խոսելով այս իրավիճակի եւ դրա հնարավոր հետեւանքների մասին` ԱԺ պատգամավոր, ազատամարտիկ ԱՌԱՔԵԼ ՄՈՎՍԻՍՅԱՆԸ մեզ հետ զրույցում ասաց.
-Թշնամին թշնամի է, եւ իր թշնամությունն է անում է: Ուղղակի, վերջին ժամանակաշրջանում շատ ավելի կատարալագործել է իր ստոր քայլերը: Բայց հավատացած եղեք, որ մենք ունենք ուժեղ եւ կանգուն բանակ, եւ թշնամու ցանկացած սադրանք ստանում է իրեն համապատասխան, լիարժեք պատասխան: Երբեւիցե չի արձանագրվել մի դեպք, որ թեկուզ մի փոքր քայլով նահանջեն. միշտ էլ ցանկացած սադրիչ գործողություններից հետո իրենք են մի երկու անգամ ավել զոհեր տալիս: Գիտեք, որ հիմա` հենց այս պահին, սահմաններին Ադրբեջանի կողմից չհայտարարված  պատերազմ է գնում, նրանք ցանկացած ստոր փորձեր արել ու շարունակում են անել` շատ լավ գիտակցելով, որ նրանց մոտ ոչինչ չի չստացվի: Այնպես որª վաղ թե ուշ, կարծում եմ, իրենք կհասկանան, որ հայ զինվորը կյանքը կտա, բայց չի նահանջի թուրքի դեմ: Կարծում եմª կհասկանան ու կլռեն: Իսկ եթե իսկական պատերազմ են ուզում, մենք միշտ պատրաստ ենք:
Թշնամու ակտիվությունը կապված է նաեւ Ցեղասպանության հարյուրամյա տարելիցի հետ: Բայց, ամեն դեպքում, թող թուրքն իր թրքությունն անի, իսկ մեր բանակն էլ կմնա իր տեղում, իր գործը կշարունակի, մենք էլ կզբաղվենք Ցեղասպանության ճանաչման գործընթացով: Ինչքան հնարավորություններ ունենք, պետք է օգտագործենք, մեր բոլոր ուժերը պետք է ներդնենք, մարդաշատ լինենք, որովհետեւ հատկապես այս ժամանակահատվածում մենք պետք է, ինչպես երբեւէ, զբաղվենք Ցեղասպանության ճանաչման հարցով:
- Ամեն դեպքում, տեսնո՞ւմ եք պատերազմի վերսկսման տարբերակ:
- Մենք միշտ պետք է պատրաստ լինենք, բայց չեմ կարծում, որ այսքան համարժեք պատասխաններ ստանալուց հետո, իրենք կգնան բացահայտ պատերազմի: Մենք պարզապես միշտ պետք է պատրաստ եւ համախմբված լինենք:  

ԻԼՈՆԱ ԱԶԱՐՅԱՆ