"ՄԵԶ ԱՅԺՄ ԸՆԴՀԱՆՐԱՊԵՍ ՊԵՏՔ ՉԷ ՔԱՈՍ"

"ՄԵԶ ԱՅԺՄ ԸՆԴՀԱՆՐԱՊԵՍ ՊԵՏՔ ՉԷ ՔԱՈՍ"

Ապրում ենք այնպիսի ժամանակներում, երբ գրեթե յուրաքանչյուր օր կարելի է հանդիպել հերթական "ազգափրկիչ" նախաձեռնությանը: Ծնվում է հերթականը, մեկ օր էլ չապրելովª մեռնում, հետո նորը, եւ այդպես շարունակ: Օրերս իր ֆեյսբուքյան էջում  հերթական  նախաձեռնության հայտարարությամբ հանդես եկավ "Հիմնադիր խորհրդարանի" ներկայացուցիչ Ժիրայր Սէֆիլյանը, թե ձեւավորում է "քաղաքացիական բանակ", որը, ըստ նրա, լինելու է ժողովրդին համախմբող եւ քաղաքացիական անհնազանդության խաղաղ գործողություններովª ռեժիմին հեռացնող կազմակերպական ուժ: Բայց նաեւ, որ անունը բանակ է, բայց դա չի լինելու զինված կառույց: Իսկ այդ դեպքում` ինչո՞ւ է կոչ անում դրան անդամակցել "երիտասարդներին եւ իրենց հոգին չվաճառած ազատամարտիկներին", մնում է ենթադրել: Բայց մեր իրողությունները, մասնավորապես` հայ-ադրբեջանական սահմանի լարվածությունը թույլ տալի՞ս է նման "բանակներ" ստեղծել. "Իրավունքը" վերլուծաբաններից փորձեց ստանալ այս հարցի պատասխանը:
ՊՆ նախկին փոխնախարար ՎԱՀԱՆ ՇԻՐԽԱՆՅԱՆՆ ընդգծեց.
-Ես չգիտեմ, թե ինչ նպատակով ու ինչ բանակ է ցանկանում ձեւավորել Ժ. Սէֆիլյանը: Հայաստանն ունի իր խնդիրները, որոնք դրվում են ըստ առաջնահերթությունների: Մեզ համար թիվ մեկ խնդիրը մեր սահմանների անվտանգության ապահովության խնդիրն է: Ես այժմ չեմ կարող ասել, թե ինչ նպատակ ունի Սէֆիլյանը. գուցե նա հայտարարի, թե ինչու է քաղաքացիական բանակի ձեւավորումը համարում առաջնահերթ խնդիր: Բայց եթե մարդը իր առջեւ դրված խնդիրներ ունի, պետք է որ քայլեր կատարի:
Ազատամարտիկ ՄՈՒԿՈՒՉ ՋԱՎԱԴՅԱՆԸ շեշտեց.
-Մեզ այժմ ընդհանրապես պետք չէ քաոս, միայն ցանկանում եմ, որ միասնական լինենք: Մենք ազգի հետ ենք, ով ուզում է լինի, չի կարող մեզ պառակտել: Եթե լինեն այնպիսիք, ովքեր մեզ կփորձեն շեղել, ազատամարտիկներին ինչ-որ անհասկանալի կառույցների միջոցով տրոհել, համոզված եղեք, որ կարգի կհրավիրենք: Ազգը մերն է, մենք էլ մեր ազգինը: Իմ ազատամարտիկ ընկերներին բոլորին էլ սիրում եմ եւ հույս ունեմ, որ օրերից մի օր ուշքի կգան եւ կհասկանան իրենց քայլերի հետեւանքը: Մենք ֆիդայիներ ենք, որոնց գերագույն նպատակը իրենց հայրենիքին եւ ժողովրդին պաշտպանելն է:
Քաղաքագետ ԼԵՎՈՆ ՇԻՐԻՆՅԱՆԸ նշեց.
-Եթե նշված կառուցը խաղաղ է, Սահմանադրության շրջանակներում է եւ երաշխավորված,  ապա մարդիկ իրավունք ունեն ձեւավորելու թեկուզեւ "քաղաքացիական բանակ": Որպես քաղաքակիրթ երկիրª Սահմանադրությամբ ինչ որ երաշխավորված է եւ թույլատրելի, կարելի է անել: Ես նույնիսկ չեմ լսել այդ արտահայտությունը` "քաղաքացիական բանակ", չնայածª Ժիրայր Սէֆիլյանը պատերազմում կռվել է եւ լավ գիտի, թե ինչ է բանակը: Պետք է հետեւենք զարգացումներին եւ տեսնենք , թե ուր կտանի այս ամենը:


Z-PR սոցհարցման կենտրոնը Երեւան քաղաքում կատարել է հարցում` պարզելու համար, թե ինչ կարծիքի է հանրությունը, պե՞տք է ձեւավորվի քաղաքացիական բանակ, թե` ոչ:
1. Բանակ արտահայտությունն արդեն իսկ յուրաքանչյուրի մոտ ոչ երկիմաստ կարծիք է ստեղծում, ինչքան էլ որ հետո ասեն, թե դա զինված կառույց չի լինելու: Եթե այդպես է, ինչո՞ւ է անունը բանակ դնում, այլ տերմին չկա՞ր: Այսինքնª երկրի ներսում "բանակներ" ստեղծելն անթույլատրելի է - 67 %:
2. Հերթական անիմաստ եւ անհեռանկար գաղափարն է, պետք չէ ուշադրություն դարձնել - 21%:
3. Եթե նախաձեռնությունը օրենքի շրջանակներում է, իր գործն է - 7 %:
4. Դժվարանում են պատասխանել- 5%:

ԶՎԱՐԹ ԽԱՉԱՏՐՅԱՆ