ՆՈՐ ԲՀԿ-ԱԿԱՆՆԵՐԸ ՀՈՒՅՍ ՈՒՆԵՆ ԴԱՌՆԱԼ ԽԵԼՈՔ ԸՆԴԴԻՄՈՒԹՅՈՒՆ

ՆՈՐ ԲՀԿ-ԱԿԱՆՆԵՐԸ ՀՈՒՅՍ ՈՒՆԵՆ ԴԱՌՆԱԼ ԽԵԼՈՔ ԸՆԴԴԻՄՈՒԹՅՈՒՆ

Կայացավ ԲՀԿ արտահերթ համագումարը, որը ճակատագրական է այդ կուսակցության համար: Կուսակցականների մի մասն ասում է, որ դա ԲՀԿ քաղաքական դերակատարության "թաղման" համագումար է, իսկ մյուսները մեծ սպասելիքներ ունեն, քանի որ ինչպես որոշ ԲՀԿ-ականներ ասում են` դա ԲՀԿ-ի նոր թիմի ձեւավորում եւ մեկնարկ է: Բոլոր դեպքերում, ԲՀԿ-ից մարդիկ զանգվածաբար դուրս են գալիս:
Ըստ դիտորդների` պատգամավորական խմբակցությունում պատգամավորների մեծ մասը դուրս կգա կուսակցությունից, իսկ նոր թիմը` Նաիրա Զոհրաբյանի գլխավորությամբ, կկազմեն միշտ ջրի երես մնացող Միքայել Մելքումյանը եւ իր նման մի քանի ճարպիկ գործիչներ, որոնք, սակայն,  կգործեն խիստ սահմանափակ դաշտում: Ինչ վերաբերում է Գագիկ Ծառուկյանին, ապա  նա ոչ միայն հրաժարական տվեց կուսակցության նախագահի պաշտոնից, այլ նաեւ ընդհանրապես հեռացավ քաղաքականությունից` համենայնդեպս պահպանելով պատգամավորական մանդատը` "նավսյակի":
Գագիկ Ծառուկյանը հրաժարվել է նաեւ ԲՀԿ պատվավոր նախագահի կոչումից: ԵրիտԲՀԿ-ականները հույս ունեին նրան համոզել, որպեսզի շարքային ԲՀԿ-ականները արագորեն չլքեն խորտակվող նավը: Բացի այդ,  ԲՀԿ-ում շատ-շատերն անձնական խնդիրներ ունեն Նաիրա Զոհրաբյանի հետ, իսկ շատ տղամարդիկ պարզապես չեն պատկերացնում, որ իրենց առաջնորդը լինելու է Նաիրա Զոհրաբյանը: Իհարկե, Ծառուկյանի ԲՀԿ նախագահ մնալը կփրկեր իրավիճակը, սակայն այդ դեպքում կստացվեր, որ վերջինս չի կատարում քաղաքականությունից հեռանալու իր խոստումը: Սակայն նոր թիմի ներկայացուցիչները հույս ունեն, որ  Ծառուկյանի հեռանալը կլինի ժամանակավոր: Իրենց խոսքերում նրանք ասում են, որ դա կլինի  "որոշ ժամանակով պաուզա", անգամ բերում են Դը Գոլի օրինակը, որը հրաժարական տալուց հետո կրկին վերադարձել է քաղաքականություն: Նոր ԲՀԿ-ականները հույս ունեն նաեւ, որ 2017 թվականի ընտրությունների նախաշեմին կվերադառնա նաեւ Օսկանյանը:
Ինչ վերաբերում է նոր ԲՀԿ-ի քաղաքական դիրքորոշմանը, ապա այն այլեւս չի կոչվելու այլընտրանք, այլ առանց ավելորդ ամբիցիաների, դարձավ "շարքային ընդդիմություն"` ՕԵԿ-ի տիպի: Այն գործելու է զուտ պառլամենտական հարթակում, չի պահանջելու արտահերթ ընտրություններ ու հրաժարականներ, հանրահավաքներ եւ երթեր չի անելու, իսկ 2017 թ. խորհրդարանական ընտրություններից առաջ հավանաբար փորձելու է որպես ղեկավար վերադարձնել Ծառուկյանին` իր փողերով ու հետապնդվածի, ճնշվածի լուսապսակով: Դրանից հետո ԲՀԿ-ն հավանաբար կմտնի իշխանությունների հետ լուրջ առեւտրի մեջ` ապագա խորհրդարանում 2-րդ խորհրդարանական ուժի կարգավիճակը պահպանելու համար: Սակայն դա անելու է շատ զգույշ` առանց իշխանությունը ամբողջությամբ վերցնելու նկրտումների: Ի վերջո, կստանա այնքան, ինչքան նրան կտան: Ծառուկյանի վերադարձի դեպքում` գուցե մի քիչ շատ, բայց արդյո՞ք կվերադառնա Ծառուկյանը...

Հ. ՏԵՐ-ՎԱՀԱՆՅԱՆ