ՀԱԿ ՊԱՏԳԱՄԱՎՈՐ. «ԱՐՏԱՀԵՐԹ ՆԱԽԱԳԱՀԱԿԱՆ ԸՆՏՐՈՒԹՅՈՒՆՆԵՐ ՊԱՀԱՆՋՈՂՆԵՐՆ ԱՅԴՔԱՆ ԷԼ ԻՐԱՏԵՍ ՉԵՆ». ՏԵՍԱՆՅՈՒԹ

ՀԱԿ ՊԱՏԳԱՄԱՎՈՐ. «ԱՐՏԱՀԵՐԹ ՆԱԽԱԳԱՀԱԿԱՆ ԸՆՏՐՈՒԹՅՈՒՆՆԵՐ ՊԱՀԱՆՋՈՂՆԵՐՆ ԱՅԴՔԱՆ ԷԼ ԻՐԱՏԵՍ ՉԵՆ». ՏԵՍԱՆՅՈՒԹ

ՀԱԿ խմբակցության պատգամավոր, ՎՍԴՀԿ ատենապետուհի Լյուդմիլա Սարգսյանը լրագրողների հետ զրույցում անդրադարձավ ԲՀԿ-ի հետ հետագա ՀԱԿ-ի եւ ՎՍԴՀԿ-ի համագործակցությանը: «ՀԱԿ-ը պատրաստակամ է  համագործակցել ԲՀԿ-ի հետ, բայց քննարկում խմբակցությունում դեռ  չի եղել»,- ասաց Լյուդմիլա Սարգսյանը:

«Իրավունքի»  հարցին` կոնկրետ որ միասնական ծրագրերի դեպքում  է ՀԱԿ-ը պատրաստ համագործակցել ԲՀԿ-ի  հետ, տիկին Սարգսյանը հստակ չպատասխանեց, միայն ասաց, որ ընդդիմություն հայտարարելն արդեն իսկ  լավ առիթ է համագործակցության համար: «Կարծում եմ` ԲՀԿ-ի տրամադրության մեջ փոփոխություն չի լինի»,- ասաց  Լյուդմիլա Սարգսյանը:

Մեր մյուս հարցին` ինչպես է ՀԱԿ-ը համագործակցելու ԲՀԿ-ի հետ, եթե իրենք արտահերթ  խորհրդարանական եւ նախագահական ընտրություններ չեն պահանջելու, տիկին Սարգսյանն այսպես արձագանքեց. «Քաղաքականության մեջ  պետք է իրատես լինես: Այն քաղաքական ուժերը, որոնք պահանջում են արտահերթ նախագահական ընտրություններ, այդքան էլ իրատես չեն: Առաջիկա երկու ամսվա մեջ գոնե ռեալ չեմ համարում այդ պահանջը»,- ասաց պատգամավորը:

Հստակեցրինք` արդյոք ՀԱԿ-ը հանուն ԲՀԿ-ի հետ համագործակցության շարունակման, իր իշխանափոխության մասին պահանջը  կվերանայի: Տիկին Սարգսյանն ասաց, որ խմբակցությունում նման հարց չի քննարկվել:

Մանրամասները`տեսանյութերում:

ՍՈՆԱ ԴԱՎԹՅԱՆ