«ԱՌԱՋԱՐԿ ՍՏԱՆԱԼՈՒՆ ՊԵՍ ԱՍԱՑԻ` Ո՛Չ»

«ԱՌԱՋԱՐԿ ՍՏԱՆԱԼՈՒՆ ՊԵՍ ԱՍԱՑԻ` Ո՛Չ»

Հայկական արտադրության ֆիլմերին շուտով կավելանա եւս մեկը` «Ես սիրում եմ քեզ, Երեւան»: Ֆիլմի նկարահանումներն սկսվել են մոտ երկու ամիս առաջ, նախատեսված է հայ հանդիսատեսին ներկայացնել այս ամռանը: Ֆիլմը ներառում է մի քանի նովելներ` յուրաքանչյուր նովելում ներկայացվում է մի կյանքի պատմություն:

«Ես քեզ սիրում եմ, Երեւան» ֆիլմի գլխավոր հերոսուհուն մարմնավորել է ռադիոհաղորդավարուհի ԱՆԿԱՆ (Անի Սարիբեկյան), ում խոսքով` ֆիլմի ստեղծողները փորձել են ընտրել ավյունով լեցուն երիտասարդների, քանի որ այն ավելի շատ երիտասարդների համար է: Անձամբ դերասանուհին շատ դժվարությամբ է համաձայնել նկարահանվել ֆիլմում. «Սկզբում հրաժարվեցի, քանի որ դերասանական կրթություն չունեմ, որոշ ժամանակ այցելել եմ դերասանական ստուդիա եւ վերջ: Նկարահանվել ֆիլմում, այն էլ գեղարվեստական, շատ պատասխանատու էր: Առաջարկ ստանալուն պես պատասխանեցի` ո՛չ, ես հրաժարվում եմ»,- «Իրավունքի» հետ զրույցում նշեց Անկան: Սակայն որոշ ժամանակ անց ռադիոհաղորդավարուհին խորհրդակցելով դերասան ընկերների հետ, ծանոթանալով ֆիլմի սցենարին` դրել է նախապայման. «Կնկարահանվեմ մեկ-երկու էպիզոդներում, եթե ստացվի, կշարունակեմ նկարահանվել: Միշտ ցանկացել եմ նկարահանվել ֆիլմում, եւ սա ինձ համար մեծ հնարավորություն էր: Պիլոտային տարբերակով նկարահանումն ավարտվեց, եւ որոշեցի նկարահանվել: Ճիշտ է, ֆիլմը կատակերգական ժանրի է, սակայն իմ կերպարի մեջ կատակերգությունն ու դրամատիզմը միախառնվում են: Իմ հերոսուհին բաժանվել է սիրելիից, սակայն հանգամանքների բերումով կրկին հանդիպում է նրան: Իմ դերը բարդ է նրանով, որ ես ներկայացնելու եմ կնոջ դառը հոգեվիճակը»,- ավելացրեց Անկան:
Թե ինչ է լինելու հերոսուհու հետ, նա չցանկացավ բացել բոլոր փակագծերը, միայն ընդգծեց, որ դեպքերը հետաքրքիր զարգացումներ են ունենում: Նշենք, որ ֆիլմում նկարահանվել են ռեփեր Համոն, դերասանուհի Անաիսա Սարդարյանը եւ այլ երիտասարդ ու սիրված դեմքեր:

ԶՎԱՐԹ ԽԱՉԱՏՐՅԱՆ