"ԲՈԼՈՐ ՀԱՐՑԵՐԻ ՊԱՏԱՍԽԱՆՆԵՐԸ ԿՏԱ ՄԻԱՅՆ ԲՀԿ ՀԱՄԱԳՈՒՄԱՐԸ"

"ԲՈԼՈՐ ՀԱՐՑԵՐԻ ՊԱՏԱՍԽԱՆՆԵՐԸ ԿՏԱ ՄԻԱՅՆ ԲՀԿ ՀԱՄԱԳՈՒՄԱՐԸ"

Չնայած այս օրերին կրկին լարված իրավիճակ է հայ-ադրբեջանական սահմանին, Հայաստանում թիվ մեկ քննարկման առարկան շարունակում է մնալ "Բարգավաճ Հայաստան" կուսակցության ներսում եւ շուրջ տեղի ունեցող իրադարձությունները: Կուսակցության պատգամավորները շարունակում են դուրս գալ խմբակցության կազմից, մնացողներն էլ գերադասում են լռելª խուսափելով ներկուսակցական հնարավոր զարգացումների մասին մեկնաբանություններից: Դրա հետ մեկտեղ էլ լուրեր են պտտվում ոչ միայն այն մասին, որ ԲՀԿ ղեկավար Գագիկ Ծառուկյանը պատրաստվում է հրաժարվել կուսակցության ղեկավարի պաշտոնից, այլ նաեւ, որ հաստատ պակաս կարեւոր չէ, իր մի քանի խոշոր բիզնեսներից, ինչն էլ, ըստ փորձագետների, վատ կանդրադառնա նաեւ ՀՀ երկրորդ նախագահ Ռոբերտ Քոչարյանի վրա: Իսկ թե այդ ամենն ի՞նչ ազդեցություն կունենա Հայաստանի տնտեսական եւ քաղաքական կյանքի վրա, փորձեցինք ճշտել փորձագետներից եւ քաղաքական գործիչներից: Բայց պարզվում է, որ նրանք էլ նույն անորոշությունների մեջ են, ինչ` ողջ հանրությունը:
ԱԺ "Ժառանգություն" խմբակցության  պատգամավոր ԹԵՎԱՆ ՊՈՂՈՍՅԱՆԸ որեւէ հստակ մեկնաբանություն չտվեց եւ խորհուրդ տվեց սպասել մինչեւ մարտի 5-ը. "ԲՀԿ-ի շուրջ տեղի ունեցող իրադարձությունների մասին որեւէ ռեալ մեկնաբանություն չեմ կարող տալ: Առայժմ մեկնաբանել, թե ինչ տեղի կունենա, դժվար է, քանի որ ամեն ինչ կախված է ԲՀԿ-ի մարտի 5-ին կայանալիք համագումարից: Եթե կուսակցությունը որոշի, որ  լուծարվելու է` կլուծարվի, իսկ եթե ոչ, ապա կշարունակի իր նախկին գործունեությունը: Բոլոր այս հարցերի պատասխանները կարող է տալ միայն ԲՀԿ-ն եւ մարտի 5-ից հետո":
Նախկին ԲՀԿ-ական պատգամավոր, տնտեսագետ ՎԱՐԴԱՆ ԲՈՍՏԱՆՋՅԱՆԸ նույնպես նույն անորոշ վիճակում է. "Ես ոչ թե հակված չեմ տալ մեկնաբանություններ, այլ հստակ ոչինչ չեմ կարող ասել: Անհեռանկարային է այս պարագայում ենթադրություններ անել: ԲՀԿ-ի ընդհանուր գործողությունների եւ նրա շուջ ծագած զարգացումների վերաբերյալ կարող են խոսել այնպիսի մարդիկ, ովքեր գտնվում են կուսակցության հարեւանությամբ եւ քաջատեղյակ են ամբողջ անցուդարձին:  Իմ բռնած դիրքով ես բոլորովին մխրճված չեմ այս տիրույթում, որպեսզի կարողանամ եզրակացություններ անել":
Եվ, վերջապես, անորոշությունների մեջ է նաեւ փորձագիտական հանրությունը: Մասնավորապեսª քաղաքագետ ՍԵՐԳԵՅ ՄԻՆԱՍՅԱՆԸ դժվարացավ նշել, որ եթե ԲՀԿ ղեկավարն այնուամենայնիվ զրկվի իր որոշ խոշոր բիզնեսներից ¥այս պահին առաջին պլանում են կոնյակի եւ ցեմենտի գործարանների մասին խոսակցությունները¤, ապա դա ինչ ազդեցություն կունենա ՀՀ տնտեսության վրա: Սակայն պարոն Մինասյանը գոնե նկատեց, որ ամեն դեպքում ԲՀԿ-ն Հայաստանում կորցնում է իր քաղաքական դիրքերը. "Այս ամենը քաղաքական այս կամ այն գործունեությունը սխալ հաշվառելու հետեւանքն է. այդ սխալների արդյունքն այն է, ինչ մենք այսօր տեսնում ենք: Թե ինչքան ժամանակ այս իրավիճակը կտեւի Հայաստանում` դժվարանում եմ ասել: Բայց այն, որ ԱԺ  ընտրություններից 2-3  տարի առաջ մեր ընդդիմադիր դաշտում այսպիսի տխուր իրավիճակ ունենք, կարծում եմ նաեւ այդ ընտրությունների վրա իր ազդեցությունը կունենա":

ԶՎԱՐԹ ԽԱՉԱՏՐՅԱՆ