"ԲՀԿ-Ն ՉԻ ՊԱՀԱՆՋԻ ԱՐՏԱՀԵՐԹ ՆԱԽԱԳԱՀԱԿԱՆ ԵՎ ԽՈՐՀՐԴԱՐԱՆԱԿԱՆ ԸՆՏՐՈՒԹՅՈՒՆՆԵՐ"

"ԲՀԿ-Ն ՉԻ ՊԱՀԱՆՋԻ ԱՐՏԱՀԵՐԹ ՆԱԽԱԳԱՀԱԿԱՆ
ԵՎ ԽՈՐՀՐԴԱՐԱՆԱԿԱՆ ԸՆՏՐՈՒԹՅՈՒՆՆԵՐ"

Մարտի 5-ին կայանալիք ԲՀԿ համագումարից առաջ ԲՀԿ պատգամավորները խմբակցության քարտուղար Նաիրա Զոհրաբյանի գլխավորությամբ  որոշել են, ավելի ճիշտ` փորձում են ձկան նման լռել եւ ոչինչ չասել: Հանկարծ` լեզվի սայթաքում` կյանքի խորտակում:

"ԲՀԿ ԱՌԱՋՆՈՐԴԸ  ԾԱՌՈՒԿՅԱՆ ԳԱԳԻԿՆ Է"

"Իրավունքը" փորձեց մի քանի հարց ուղղել  ԲՀԿ խմբակցության պատգամավոր ՍՏԵՓԱՆ ՄԱՐԳԱՐՅԱՆԻՆ:
– Պրն Մարգարյան,  ԲՀԿ կհամագործակցի՞ ՀԱԿ-ի ու "Ժառանգության" հետ: – Կներեք, ես հարցազրույց այսօր չեմ տալիս: Բոլոր հարցերը` համագումարից հետո:
– Բայց այս հարցը համագումարի հետ կապ չունի…
– Ունի…
– Դուք ուղղակի ասեք` համագործակցելո՞ւ եք, թե` ոչ:
– Ես հիմա հարցազրույց չեմ տալիս:
– ԲՀԿ-ի  հանդեպ հետապնդումներ կա՞ն:
– Ներող եղեք,  չեմ խոսում:
– Ո՞վ է լինելու ԲՀԿ առաջնոդը:
– Կիմանաք: ԲՀԿ առաջնորդն  այսօր Ծառուկյան Գագիկն է:

"ԱՅՍ ՊԱՀԻՆ ՄԵՆՔ ԸՆԴԴԻՄԱԴԻՐ ԴԱՇՏՈՒՄ ԿԳՈՐԾԵՆՔ"

ԲՀԿ պատգամավոր ՎԱՀԱՆ ԲԱԲԱՅԱՆԻՆ եւս ուղղեցինք մի քանի հրատապ հարց:
– Պրն Բաբայան, ԲՀԿ-ն այսուհետ քաղաքական ո՞ր դաշտում է գործելու:
– ԲՀԿ համագումարին մենք հանդես կգանք հայտարարությամբ:
– Ձեր գործընկերներից մի քանիսը նշում են, որ գործելու են ընդդիմադիր դաշտում:
– Կոլեգաներն ասում են իրենց անձնական կարծիքը:
– Դուք էլ ձեր անձնական կարծիքը հայտնեք:
– ԲՀԿ-ի անունից ես իրավասու չեմ կարծիք հայտնել, իսկ իմ կարծիքը, կարծում եմ, ձեզ չի հետաքրքրում:
– Այնուամենայնիվ, գործելու եք ընդդիմադի՞ր դաշտում:
– Իմ անձնական կարծիքով` այս պահին մենք ընդդիմադիր դաշտում ենք:
– Իսկ ծայրահե՞ղ, թե կառուցողական ընդդիմադիր դիրքորոշում կորդեգրեք:
– Ես միշտ դեմ եմ եղել ցնցումներին, ապակայունացման քաղաքականությանը, իհարկե, կողմնակից լինելով զանգվածային միջոցառումներին` երթերին, բողոքի ակցիաներին, ցույցերին, բայց հիմա նոր իրավիճակ է ստեղծվել` մենք ունենք քննարկելու նոր բաներ:
– Դուք ասացիք, որ դեմ եք ցնցումներին: Բայց ԲՀԿ առաջնորդը հայտարարություն տարածեց, որտեղ գրված էր, որ չեղյալ է համարվում փետրվարի 20-ի հանրահավաքը, որպեսզի արյուն չթափվի: ԲՀԿ-ն մինչ այդ չգիտե՞ր, որ հնարավոր է արյուն թափվի: Չէի՞ք հաշվարկել, որ հանրահավաքին կլինեին ցնցումներ:
– Իսկ ո՞վ է ասել, որ մենք մինչ այդ կողմ ենք եղել ցնցումներին: Որեւէ մեկը նման բան ասե՞լ է:
– Դուք չգիտեի՞ք, որ հանրահավաքները հիմնականում բերում են ցնցումներ…
– Դուք գիտե՞ք, որ քաղաքականությունը գործընթաց է, որն անընդհատ զարգանում է: Որեւէ մարդ գուշակ չէ, որ իմանա` ինչ կարող է լինել վաղը չէ, մյուս օրը:
– Փետրվարի 20-ի հանրահավաքը չէ՞ր բերի արյունահեղության:
– Ես չեմ ուզում վերլուծություններ անել անցյալի վերաբերյալ: Եկեք նայենք դեպի ապագան:
– ԲՀԿ առաջնորդն ո՞վ է լինելու: Բացի Նաիրա Զոհրաբյանից` շրջանառվում է նաեւ Վարդան Օսկանյանի անունը:
– Ես այսօր ոչինչ չեմ կարող բացառել: Մարդիկ իրենք են որոշում իրենց ապագան:
– ԲՀԿ խմբակցությունից դուրս եկածները հնարավո՞ր է` փոխեն իրենց որոշումը ու վերադառնան:
– Ոչինչ չի բացառվում:
– Դուք տեղյա՞կ եք` ԲՀԿ խմբակցությունից դուրս եկածների հետ բանակցություններ վարո՞ւմ է կուսակցությունը` նրանց հետ բերելու համար:
– Օրինակ, Դուք այսօր տեսաք, որ Մելիք Մանուկյանն օրեր առաջ հրաժարվել էր մանդատից, իսկ այսօր պարզվեց` փոխել է որոշումը:
– ԲՀԿ-ն կպահանջի՞ արտահերթ նախագահական եւ խորհրդարանական ընտրություններ:
– Իմ անձնական կարծիքով` ոչ:
– Ինչո՞ւ:
– Ես այդպես եմ կարծում:

ՍՈՆԱ ԴԱՎԹՅԱՆ