ԲԵՅՐՈՒԹԻ ՓԱՌԱՏՈՆՈՒՄ ՀԱՆԴԵՍ ԵՆ ԳԱԼԻՍ ՀԱՅՈՑ ՑԵՂԱՍՊԱՆՈՒԹՅԱՆ ԽՈՐՀՐԴԱՆԻՇ «ԱՆՄՈՌՈՒԿ» ԿՐԾՔԱՆՇԱՆՈՎ

ԲԵՅՐՈՒԹԻ ՓԱՌԱՏՈՆՈՒՄ ՀԱՆԴԵՍ ԵՆ ԳԱԼԻՍ ՀԱՅՈՑ ՑԵՂԱՍՊԱՆՈՒԹՅԱՆ ԽՈՐՀՐԴԱՆԻՇ «ԱՆՄՈՌՈՒԿ» ԿՐԾՔԱՆՇԱՆՈՎ

Փետրվարի 17-ից մարտի 22-ը Բեյրութում անցկացվող Ալ Բուստան միջազգային փառատոնին Հայաստանի պետական երիտասարդական նվագախումբը, որպես պաշտոնական նվագախումբ, մասնակցում է երկրորդ անգամ: Հեղիանկավոր միջազգային փառատոնին, որն իր ծրագրում ներառում է օպերային, սիմֆոնիկ, խմբերգային, կամերային, ջազային, արևելյան երաժշտություն, ինչպես նաև պարային և թատերական ներկայացումներ, այս տարի տարբեր երկրներից մասնակցում է 300 արտիստ:

Հայաստանի պետական երիտասարդական նվագախումբն այս տարի միջազգային փառատոնի շրջանակներում իր ելույթները նվիրում է Հայոց ցեղասպանության 100-րդ տարելիցին. երիտասարդ հայ երաժիշտները փառատոնի շրջանակում՝ փետրվարի 26-ից մարտի 10-ը հանդես կգան 5 համերգով: Համերգի մեկնարկը տրվել է Վինչենցո Բելլինիի «Նորմա» օպերայի կատարումով, կհնչեն նաև Մոցարտի, Բեթհովենի, Չայկովսկու և այլ կոմպոզիտորների ստեղծագործություններ:

Ելույթների առաջին իսկ օրից նվագախմբի երաժիշտները և փառատոնի գեղարվեստական ղեկավար, դիրիժոր Ջանլուկա Մարչիանոն հանդես են գալիս Հայոց ցեղասպանության 100-րդ տարելիցի խորհրդանիշ «Անմոռուկ» կրծքանշանով:

Փառատոնի գեղարվեստական ղեկավարը տպավորված է Հայաստանի երիտասարդական նվագախմբի ելույթներով. «Նվագախումբը փառատոն է ժամանել ավելի քան պատրաստված… այս նվագախումբը վաղուց արդեն դուրս է եկել երիտասարդական նվագախմբի բնորոշումից, քանի որ հասուն, բարձր պրոֆեսիոնալիզմ ունեցող կոլեկտիվ է»:

Ալ Բուստան միջազգային երաժշտական փառատոնը մինչ օրս հրավիրել է ավելի քան 4000 արվեստագետի` տարբեր երկրներից: Փառատոնի շրջանակում կազմակերպվում են վարպետության դասեր, սեմինարներ:

ԼԻԼԻԹ ԵՂԻԱԶԱՐՅԱՆ