ՏԱՐՈՍԸ ԵԽԽՎ-ԻՆ

ՏԱՐՈՍԸ ԵԽԽՎ-ԻՆ

ԱԺ նիստի ժամանակ երեկ ԱԺ փոխնախագահ ԷԴՈՒԱՐԴ ՇԱՐՄԱԶԱՆՈՎԸ շնորհակալություն հայտնեց Եվրոպական ժողովրդական կուսակցությանը` Հայոց ցեղասպանության 100-րդ տարելիցին նվիրված բանաձեւ ընդունելու համար, որտեղ հստակ ամրագրված է «ցեղասպանություն» եւ «հայրենազրկում» եզրույթները: Այս մասին նիստից հետո առավել մանրամասն խոսելով` Է. Շարմազանովը նշեց. «Պետք է ասեմ, որ ԵԺԿ-ում ընդունված բանաձեւը` Հայոց ցեղասպանության դատապարտման վերաբերյալ, աննախադեպ եւ պատմական փաստ էր, նախեւառաջ նրա համար, որ ԵԺԿ-ն` որպես քաղաքական ուժ, դատապարտում է Հայոց ցեղասպանությունը, հայրենազրկումը: Եվ երկրորդ` ԵԺԿ-ն ընդունում է, որ ցեղասպանությունը եղել է Կիլիկյան Հայաստանում Աբդուլ Համիդի ժամանակներից սկսած, այնուհետեւ Օսմանյան Թուրքիայի ժամանակաշրջանում: Շատ կարեւոր է, որ այդ հայտարարության մեջ հստակ նշվում է, որ նույնքան դատապարտելի է ժխտողականությունը եւ դա հետեւողական հանցագործություն է: Երրորդը, որի վրա կուզեի ուշադրություն դարձնել, այն փաստն է, որ Հայոց ցեղասպանության հետեւանքով բռնագաղթվել եւ ոչնչացվել են հույներն ու ասորիները, ովքեր ապրում էին Օսմանյան Թուրքիայում: Չորրորդը` կարեւոր եմ համարում կոչը Թուրքիայի իշխանություններին` իրականցնել իրենց վրա դրված պարտավորությունները: Ինչպես նաեւ շատ եմ կարեւորում այն, որ ԵԺԿ-ում ընդգրկված հայոց խորհրդարանական երեք ուժեր` «Ժառանգությունը», «Օրինաց երկիրը» եւ Հանրապետականը միասնական աշխատանք իրականացրեցին եւ միասնական աշխատանքի արդյունքում հասան նման կարեւորագույն, աննախադեպ հայտարարության եւ որոշման ընդունման: Կարծում եմ` սա նոր պայքարի սկիզբ կլինի եւ սրան կհաջորդեն այլ բանաջեւեր ոչ պակաս կարեւոր կառույցներում»: «Իրավունքի» այն հարցին, թե արդյո՞ք սա վառ օրինակ չպետք է լինի նաեւ ԵԽԽՎ-ի համար, ԱԺ փոխնախագահը ասաց. «Հենց ԵԺԿ-ն կոչ է արել բոլոր միջազգային եւ առաջին հերթին եվրապական կառույցներին` նախ ապրիլի 24-ը ընդունել որպես հիշատակի օր, եւ երկրորդը` դատապարտել Հայոց ցեղասպանությունն ու հայրենազրկումը»:

ՀՐԱՆՏ ՍԱՐԱՖՅԱՆ