Ս. ԽԱՆԶԱԴՅԱՆԻ ԱՆՎԱՆ 184 ԱՎԱԳ ԴՊՐՈՑԸ ՀՅՈՒՐԸՆԿԱԼԵՑ ՀՐԱՊԱՐԱԿԱԽՈՍ Բ. ԿԱՐԱՊԵՏՅԱՆԻՆ

Արխիվ 12-16 4 Մարտ, 2015 10:43

27 տարի առաջ Խորհրդային Ադրբեջանի Սումգայիթ քաղաքում ադրբեջանցի խուժանն իշխանությունների հորդորով եւ գիտությամբ իրականցրեց տեղի հայ բնակչության զանգվածային կոտորած: Ոճրագործությունը ծրագրավորված էր նախապես, ջարդերի հետեւանքով հազարավոր հայեր սպանվեցին եւ տեղահանվեցին: Այսօր, 27 տարի անց Ադրբեջանի իշխանությունները ժխտում են իրենց իսկ ձեռքով կատարած ոճրագործությունը եւ ստահոդ լուրեր տարածում եւ մեղադրում միայն հայերին:

Սումգայիթում տեղի ունեցած ամբողջ ճշմարտությունը մատաղ սերնդին ներկայացնելու համար Երեւանի Սերո Խանզադյանի անվան 184 ավագ դպրոցը հյուրընկալել էր Սումգայիթի վայրագությունների ականատեսներից մեկին` գրող, հրապարակախոս ԲԱԿՈՒՐ ԿԱՐԱՊԵՏՅԱՆԻՆ: Տասն օր շարունակ Բ. Կարապետյանը եղել է Սումգայիթում եւ կատարել նկարահանումներ, որի արդյունքում էլ ստեղծվել է «Սումգայիթյան ալիքեր» ֆիլմը: Ֆիլմում Սումգայիթի հայ բնակիչները պատմում են այն ջարդերի մասին, որոնցից մազապուրծ կարողացել են փրկվել: Ահա այս ֆիլմ էլ հրապարակախոսը ներկայացրեց աշակերտներին եւ պատմեց այն, ինչին ականատես էր եղել Սումգայիթում«Սումգայիթյան ջարդերը Հայոց ցեղասպանության շարունակությունն են, որովհետեւ միջազգային հանրությունը աչք փակեց 1915 թվականին կատարված հայերի ցեղասպանության վրա»,- նշեց Բակուր Կարապետյանը: Կարեւորելով դպրոցականների հետ նման հանդիպումները, հրապարակախոսը իր շնորհակալությունը հայտնեց դպրոցի տնօրեն Աշոտ Հարությունյանին, ով ամեն ինչ անում է, որպեսզի մատաղ սերունդը դաստիարակվի, որպես իսկական հայրենասերի, ապա ավելացրեց.«Եթե մենք չներկայացնենք մեր պատմության ամբողջ ճշմարտությունը, ապա դրանով կօգնենք Ադրբեջանին , որը տարիներ շարունակ վարում է ժխտողական քաղաքականություն: Սա հայոց պատմության այն հատվածն է, որին պետք է տեղյակ լինեն բոլորը»,-ընդգծեց Բ. Կարապետյանը:

Նշենք, որ սա Ս. Խանզադյանի անվան 184 ավագ դպրոցի տնօրինության եւ ուսուցչական անձնակազմի կազմակերպած հերթական հանդիպումն էր մտավորկանների հետ:

ԶՎԱՐԹ ԽԱՉԱՏՅԱՆ