ԻՆՉ ՏՎԵՑ ՇԱԼԱՆԴԻ ՄԻԱՄՅԱԿԸ ՄԵՐ ՀԱՎԱՔԱԿԱՆԻՆ

ԻՆՉ ՏՎԵՑ ՇԱԼԱՆԴԻ ՄԻԱՄՅԱԿԸ ՄԵՐ ՀԱՎԱՔԱԿԱՆԻՆ

Մեկ տարի առաջ 2014 թվականի փետրվարի 28-ին, ֆուտբոլի Հայաստանի հավաքականի գլխավոր մարզիչ նշանակվեց շվեյցարացի մասնագետ Բեռնար Շալանդը: Ու, թերեւս, արդեն ժամանակն է, որ փորձենք գնահատել, թե ինչ տվեց այդ նշանակումը մեր ֆուտբոլին:
Ի սկզբանե Շալանդի առաջ դրված էր խնդիր` դուրս բերել Հայաստանի հավաքականը Եվրո-2016-ի եզրափակիչ փուլ: Բեռնար Շալանդի գլխավորությամբ Հայաստանի ազգային հավաքականը հեշտ օրեր չապրեց` հենց սկզբում կրելով 4 անընդմեջ պարտություն: Պարտությունների շարքը սկսվեց մայիսի 31-ին` Ալժիրի հավաքականի հետ կայացած ընկերական խաղում (1:3): Ապա հետեւեց խոշոր հաշվով ջախջախիչ պարտությունն (1:6) աշխարհի ապագա չեմպիոն Գերմանիայի ընտրանուց, որին հաջորդեցին անհաջողությունները Լատվիայի (0:2) եւ Դանիայի (1:2) հավաքականների հետ մրցախաղերում: 4 հանդիպումներում մեր հավաքականն ընդամենը 3 գոլ խփեց, փոխարենը սեփական դարպասը բաց թողնելով 13 գնդակ:

Հետագա խաղերում դրությունը մի փոքր մեղմվեց, բայց էլի պարտություններ. նվազագույն հաշվով արտագնա խաղում զիջեցինք Պորտուգալիային, ապա` ֆրանսիացիներին, բայց արդեն ընկերական հանդիպման շրաջանակներում: Արդյունքում` Եվրո-2016-ի ընտրական փուլում 2014-ի աշնանային մասի ընդմիջումից հետո Հայաստանը զիջում է իր բոլոր մրցակիցներին` Դանիային, Պորտուգալիային, Ալբանիային եւ Սերբիային: Այս արդյունքները կասկածի տակ դրեցին ՀՖՖ նախագահի` թիմի գլխավոր մարզչի միանձնյա ընտրության էֆեկտիվությունը: Ասենք` Ռուբեն Հայրապետյանն ինքն էլ է բազմիցս անդրադարձել է այս հարցին` դժգոհելով իր իսկ նշանակած մարզչի գործողություններից: Մինչեւ անգամ, որ Շալանդը հրաժարական կտա, եթե թիմը չհաղթի Ալբանիայի հավաքականին. "Ապագայի վերաբերյալ խոսել եմ Շալանդի հետ: Նա ընդունել է, որ սխալներ թույլ է տվել, սակայն նաեւ նշել է, որ այլ խնդիրներ են եղել: Մասնավորապեսª ֆուտբոլիստները վախեցել են առաջ գնալ Պորտուգալիայի դեմ խաղում: Շալանդը խոստացել է, որ հաղթելու ենք Ալբանիայի հավաքականին: Ես նրա առաջ այդպիսի խնդիր եմ դրել, մենք պետք է դուրս գանք Եվրոպայի առաջնություն: Եթե Ալբանիային չհաղթենք, Շալանդը հրաժարական կտա":
Մի խոսքով` ասել թե Բեռնար Շալանդը արդարացրեց հայ ֆուտբոլասերների սպասելիքները, չի կարելի: Բայց միեւնույն ժամանակ պետք է նշել, որ հիշատակված գրեթե բոլոր խաղերում հավաքականը Շալանդի տրամադրության տակ իր լավագույն կազմով ու մարզավիճակով չէր, եւ դրանում բնավ չկար շվեյցարացի մասնագետի մեղքը: Բայց արդեն հավաքականի մարտական կազմը գրեթե վերականգնված է, այսինքն` նշված հանգամանքն այլեւս Շալանդի օգտին չի կարող աշխատել: Էլ չասած, որ եթե անգամ այս պահին Շալանդից մի քանի գլուխ ավելի բարձրակարգ մարզիչ հրավիրվի, դա կդառնա միայն ժամանակի զուր կորուստ ու Եվրո-2016-ի եզրափակիչից վերջնականապես հույսներս կորցնելու երաշխիք:
Այսպիսով, մարտի 29-ին Հայաստանի ազգային հավաքականը ալբանական Էլբասան քաղաքի "Էլբասան" արենա մարզադաշտում 2015 թվականի առաջին հանդիպումը կանցկացնի Ալբանիայի ազգային ընտրանու հետ, որն էլ որոշիչ նշանակություն կունենա ե՛ւ Բեռնար Շալանդի, ե՛ւ Եվրո-2016-ում Հայաստանի ընտրանու հետագա ճակատագրի համար:

ՔՐԻՍՏԻՆԵ ՊԵՏՐՈՍՅԱՆ