"ՀԻՄՆԱԴԻՐ ԽՈՐՀՐԴԱՐԱՆԻ" "ՄԵԾԱՊԱՏԻՎ ՄՈՒՐԱՑԿԱՆՈՒԹՅՈՒՆԸ"

"ՀԻՄՆԱԴԻՐ ԽՈՐՀՐԴԱՐԱՆԻ" "ՄԵԾԱՊԱՏԻՎ ՄՈՒՐԱՑԿԱՆՈՒԹՅՈՒՆԸ"

Հունվարի 31-ին Բերձորում սադրանք կազմակերպելուց հետո "Հիմնադիր խորհրդարան" կոչվող կառույցը մի քանի օր անց հանդես եկավ հայտարարությամբ: Թվում էր, թե այն պետք է տեղեկացներ որեւէ կարեւոր փաստի կամ իրադարձության մասին, սակայն այդ հայտարարությունը պարզապես դրամահավաքության կոչ էր` ուղղված Հայաստանի եւ արտերկրի հայերին: Որպես այդ "մեծապատիվ մուրացկանության" հիմնավորում` Սէֆիլյանն ու ընկերները նշել էին, թե իբր հավաքված գումարով փոխհատուցելու են իրենց կրած վնասը, նույնիսկ նշել էին վնասի կոնկրետ չափը` ուղիղ 35.000$:
Սակայն դրանից օրեր անց "Հիմնադիր խորհրդարանի" կայքում հայտնվեց մի տեղեկություն, համաձայն որի` ամերիկյան indiegogo.com կայքում բացվել է մի էջ, որի միջոցով Սէֆիլյանն ու ընկերները հորդորում են նույն վնասի փոխհատուցման նպատակով գումարներ փոխանցել իրենց կողմից բացված հաշվեհամարների վրա, բայց արդեն ոչ թե 35, այլ 40.000$: Ի դեպ, indiegogo.com կայքն ունի դրամահավաքության կազմակերպման որոշակի կանոններ, որոնց համաձայն էլ Սեֆիլյանը մտադիր է 40 օրում հավաքել 40.000$, իսկ եթե դա նրան չհաջողվի, ապա հավաքված գումարից կայքը որպես միջնորդավճար պահելու է ավելի բարձր տոկոսներ: Հետաքրքրական է նաեւ այն, որ դրամի, դոլարի, եվրոյի եւ ռուբլու հաշվեհամարները բացվել են "Հիմնադիր խորհրդարանի" անդամներ Վարուժան Ավետիսյանի ու Վարդան Բալյանի անուններով: Ասել է, թե նրանք ազատորեն կարող են իրենց հայեցողությամբ տնօրինել սեփական հաշվեհամարներին փոխանցվող գումարները: "Հիմնադիր խորհրդարանի" կայքի տվյալների համաձայն, այս պահի դրությամբ indiegogo.com կայքի միջոցով Սէֆիլյանն ու ընկերներն արդեն հավաքել են մոտ 7.700$:
Հիմա այստեղ մի շարք հարցեր են առաջանում. ինչպե՞ս եւ ի՞նչ սկզբունքներով են "Հիմնադիր խորհրդարանի" սադրիչները որոշել վնասի չափը, եւ դա այն դեպքում, երբ իրենք իրավապահներին չէին դիմել այդ հարցով, փորձաքննություն չէր անցկացվել: Եվ այդ ինչպե՞ս է մի քանի մեքենայի կոտրած դիմապակիները եւ 2-3 վնասված տեսախցիկը գնահատվել 35, հետո էլ 40.000$: Ինչո՞ւ հենց 40.000: Միգուցե, հիմա իրենց հենց այդքա՞ն գումար է անհրաժեշտ` ինչ-որ անձնական խնդիրներ լուծելու համար, եւ ահա մեր "ազգափրկիչները" որոշել են այդ գումարը կորզել ժողովրդից:
Այս հարցերի պատասխանը դժվար չի ենթադրելը, եւ այն կրկին ցույց է տալիս "Հիմնադիր խորհրդարան" կոչեցյալի անդամների իրական դեմքն ու իրական նպատակները:

"100-ԱՄՅԱԿԸ ԱՌԱՆՑ ԺԻՐԱՅՐ ՍԷՖԻԼՅԱՆԻ" ՖԵՅՍԲՈՒՔՅԱՆ ԷՋ