"ԼԵՎՈՆ ՏԵՐ-ՊԵՏՐՈՍՅԱՆԸ, ԵԹԵ ԵՐԿՐՈՐԴ ՀԱՆՐԱՀԱՎԱՔՆ ԱՆԻ, ՊԱՏԿԵՐՆ ԱՎԵԼԻ ՏԽՈՒՐ ԿԼԻՆԻ"

"ԼԵՎՈՆ ՏԵՐ-ՊԵՏՐՈՍՅԱՆԸ, ԵԹԵ ԵՐԿՐՈՐԴ ՀԱՆՐԱՀԱՎԱՔՆ ԱՆԻ, ՊԱՏԿԵՐՆ ԱՎԵԼԻ ՏԽՈՒՐ ԿԼԻՆԻ"

Երեկ "Ազդակ" լրագրողական ակումբում ԱԺ ՀՀԿ խմբակցության պատգամավոր ՄԿՐՏԻՉ ՄԻՆԱՍՅԱՆԸ ամփոփելով անցած քառօրյան` նշեց, որ այն հիմնականում բովանդակային էր: Այն հարցին, թե արդյոք սպասելի էր ԲՀԿ-ի քառօրյայի սկզբին բոյկոտի հայտարարությունը, պարոն Մինասյանը նշեց, որ իր համար կոնկրետ անակնկալ չէր. "Պետք է ասեմ, որ ԲՀԿ-ի հայտարարությունն ընդամենը էպիզոդիկ քաղաքական հայտարարություն էր, կարծում եմ, դրան չարժե անդրադառնալ: Մարտի 5-ին կլինի իրենց արտահերթ նիստը, ամեն ինչ պարզ կլինի: Ի վերջո, ԲՀԿ-ն քաղաքական ուժ է, ով ունի որոշակի բարդույթներ, սկզբունքային խնդիրներ, որի համար բնականաբար պետք է թայմ աութ վերցներ":
Ինչ վերաբերում է քառօրյա նստաշրջանին քննարկված երեք տնտեսական օրենքներին, ապա ըստ պատգամավորի.
-Ընդհանուր առմամբ, առաջընթաց եմ տեսնում` թե՛ շահութահարկի, թե՛ շրջանառության հարկի վերաբերյալ: Գտնում եմ, որ ընդունված չափորոշիչները հնարավորություն կստեղծեն` հայկական արտադրողի խնդիրները քիչ թե շատ լուծելու, որը կաջակցի եւ հնարավորություն կստեղծի, որպեսզի հայկական ապրանքը դրսում եւս վաճառվի` գրավելով նոր շուկաներ: Տեւական ժամանակ էր, ինչ մեր ժողովուրդը դժգոհություններ ուներ, թե ինչու պետք է պարտադիր լինի փաստաթղթավորումը, իսկ հիմա այն վերանայվեց, ըստ որի` հնարավորություն է տրվել գործարարներին ընտրություն կատարել` փաստաթղթավորել, թե` ոչ, եթե այո, ապա կվճարեն 1 տոկոս հարկ, իսկ եթե ոչ, ապա` 5 տոկոս: Այսինքն` տնտեսվարողներից երկու կողմն էլ շահեկան վիճակում հայտնվեցին:
Ինչ վերաբերում է 50 միլիարդի ապրանքաշրջանառության հետ կապված 20 տոկոսը 2 տոկոսով փոխարինելու գաղափարին, դա եւս հնարավորություն է տալիս ՀՀ-ում արտադրվող առանձին կազմակերպությունների կողմից հավաքագրել եւ արտահանել Հայաստանից, այդ դեպքում 20 տոկոսի փոխարեն կվճարեն 2 տոկոս, եւ հնարավորություն կտրվի, որպեսզի հայկական ապրանքները մրցունակ դառնան դրսում` ԵՏՄ-ում:
– Չե՞ք կարծում, որ այս կերպ մոնոպոլիա է առաջանում եւ դրանից կարող են օգտվել 2-3 հոգի: Իսկ դրա փոխարեն կարող էին սահմանել 20 կամ 15 միլիարդի շեմ, որպեսզի ավելի շատ մարդիկ օգտվեին:
– Նախ ոչ թե 2-3 հոգի, այլ 2-3 կազմակերպություն, իսկ մեր նման փոքր երկրի համար այդ 2-3-ն էլ քիչ չէ, որ կարողանան իրենց արտադրությունը դուրս հանել: Նրանք ընդամենը տեղափոխող են, տվյալ դեպքում ոչ արտադրող են, ոչ էլ` գին ներկայացնող:

"ԼԵՎՈՆ ՏԵՐ-ՊԵՏՐՈՍՅԱՆԸ ՔԱՂԱՔԱԿԱՆ ՏՐՅՈՒԿՆԵՐԻ
ԿԱՐՈՂ ՄԱՐԴ Է"

–ՀՀ 1-ին նախագահը մարտի 1-ին ելույթ ունեցավ, որտեղ պատվիրեց ԱԺ ընդդիմադիր խմբակցություններին հանդես գալ նախաձեռնությամբ եւ մարտի 1-ը սահմանել անմեղ զոհերի հիշատակի եւ պետական ահաբեկչության դեմ համազգային բողոքի օր: Ի՞նչ կասեք:
– ՀՀ 1-ին նախագահը քաղաքական տրյուկների կարող, փորձված մարդ է, եւ չեմ կարծում, որ ամեն ինչ պետք է ընդունել բացարձակ ճշմարտություն եւ վերջնագրի տեսքով: Պարզապես` ձայն բարբառո անապատի:
– Նա նաեւ ասել է, որ ամենաիրական ընդդիմությունը ՀԱԿ-ն է, ինչպես նաեւ հայտարարել է, որ երկու ամիս հանրահավաքներ չեն լինի...
– Իսկ դուք երբեւէ տեսե՞լ եք, որ նա ՀՀՇ-ին երկրորդական համարի ինչ-որ հարցում: Ինչ վերաբերում է հանրահավաքներ չանելուն, ապա ընդունենք, թե չնդունենք, նա փորձառու քաղաքական գործիչ է եւ հստակ գիտի` եթե այս պահին երկրորդ հանրահավաքն անի, ավելի տխուր կլինի պատկերը: Նա ժամանակ է շահում, ամենայն հավանականությամբ, հույս ունենալով, որ այս ընթացքում հանգամանքները հնարավոր կլինի օգտագործել ի շահ իրեն:
– Հանրահավաքի ժամանակ հնչեց կարծիք, որ ՀԱԿ-ը մենակ է մնացել: Դուք ե՞ւս այդպես եք կարծում:
– Կարող է եւ մենակ են մնացել, դա իրենք կիմանան: Ամենայն հավանականությամբ, արդեն բացահայտվել են իրենց իրական ցանկությունները, եւ այն մարդիկ, ովքեր կարծում էին, որ ՀԱԿ-ը ազնիվ նկրտումներով է իրենց հետ, հիմա հասկացան, որ իրենց ուժերն օգտագործելու համար են եղել, դրա համար հիմա մենակ են մնացել:

"ԱՎԱՐԱՅՐԻ ՃԱԿԱՏԱՄԱՐՏԸ ՏԵՐ-ՊԵՏՐՈՍՅԱՆԻ
ՔԱՂԱՔԱԳԻՏԱԿԱՆ ԳՈՐԾՈՒՆԵՈՒԹՅԱՄԲ
ՊԱՅՄԱՆԱՎՈՐՎԱԾ ՉԷ"

–Տեր-Պետրոսյանը իր մարտիմեկյան ելույթում կրկին ասաց, որ իշխանություններն իրեն մեղադրել են շատ հարցերում, անգամ` Ավարայրի ճակատամարտի: Ի՞նչ կասեք այս առումով:
– Եթե նա իր մասին այդպես է մտածում, ես ի՞նչ իրավունք ունեմ կասկածելու, իրենից լավ իրեն ոչ ոք չի ճանաչում: Բայց Ավարայրի ճակատամարտը, որը մեր բարոյական հաղթանակն էր, հաստատ Տեր-Պետրոսյանի քաղաքագիտական գործունեությամբ չի պայմանավորված:
– Պարոն Մինասյան, բոլորին էր հայտնի, որ քառօրյայի սկզբին պետք է քվեարկության դրվեր պատգամավոր Նիկոլ Փաշինյանի` ՀՀ նախագահին իմպիչմենտ հայտարարելու մասին նախագիծը: Պատահակա՞ն եք համարում, որ ԲՀԿ-ն դա իմանալով հանդերձ, իրեն ապահովագրեց եւ չմասնակցեց այդ քվեարկությանը:
– Հնարավոր է նաեւ այդպես լինի, բայց ես ենթադրում եմ, որ կուսակցության ներսում իսկապես կան լուծման անհրաժեշտ խնդիրներ, հիմնահարցեր, որի համար ժամանակ էր հարկավոր:
– Չե՞ք կարծում, որ կարող էին ընդհանրապես չգալ ու ներկա չստանալ, այլ միանգամից բոյկոտել:
– Ոչ, այդ դեպքում իրենց բացակայելը եւ բոյկոտելը` որպես քաղաքական քայլ, այն ուժը չէր ունենա: Հանրությունն իմացավ, որ իրենք եկան, կուսակցությունը գոյություն ունի, որոշում կայացրեցին եւ դուրս եկան:
– Դուք նշեցիք, որ Տեր-Պետրոսյանը բավականին փորձառու քաղաքական գործիչ է: Չե՞ք կարծում, որ իր քաղաքական հաշվարկներում սխալվեց այն պահից, երբ միացավ ԲՀԿ-ին, որի արդյունքում տեղի ունեցավ այն, ինչ տեղի ունեցավ:
– Իսկ եթե հանկարծ ստացվեր այն, ինչ իրենք էին պլանավորում, եւ չէր բացառվում, որ նա կարող էր ճիշտ լինել իր կանխատեսումներում, մարդկանց համոզեր բերեր դաշտ, ուղեղները լվանար եւ դառնար միակ լիդերը:
– Հիմա ունենք այն, ինչ ունենք, ելնելով տեղի ունեցածից, 1-ին նախագահը շահողի՞, թե՞ պարտվողի դերում հայտնվեց:
– Պետք չէ ասել` հաղթող կամ պարտվող, այլ ասենք` բացահայտողի, եւ, ըստ էության, նա բացահայտեց, որ ինքը մենակ է մնացել: Իսկ դա հաղթանակ է, թե պարտություն, թող ընթերցողը մտածի, կարծում եմ` հաղթանակ չէ: Բայց այն, որ նա միշտ ցանկացել է առաջինն ու միակը լինել անուրանալի իրողություն է:
– Արդյո՞ք այսօր իշխանությունները եւս իրենց միայնակ չեն զգում` հավասարազոր ընդդիմություն չունենալու առումով:
– Բոլոր դեպքերում, ընդդիմադիր քաղաքական ուժեր կան, անկախ նրանից ուժեղ են, թե` թույլ, եւ, ինչ խոսք, յուրաքանչյուր իշխանության համար ցանկալի է ունենալ ուժեղ ու հզոր, կառուցողական ընդդիմություն: Համենայնդեպս իշխանություններն այն միայնակությունը չի զգում, ինչի մասին խոսք եղավ հարցազրույցի ընթացքում:

ԱՐՄԵՆՈՒՀԻ ՀԱԿՈԲՅԱՆ