Ի՞ՆՉ ՆՈՐ ՍԵՎ ԿԱՏՈՒ Է ԱՆՑԵԼ ՀԱԿ-Ի ԵՎ ԱԼԵՔՍԱՆԴՐ ԱՐԶՈՒՄԱՆՅԱՆԻ ՄԻՋԵՎ

Ի՞ՆՉ ՆՈՐ ՍԵՎ ԿԱՏՈՒ Է ԱՆՑԵԼ ՀԱԿ-Ի ԵՎ ԱԼԵՔՍԱՆԴՐ ԱՐԶՈՒՄԱՆՅԱՆԻ ՄԻՋԵՎ

Նախկին ՀՀՇ-ական ԱԳ նախարար, «Ազատ դեմոկրատներ» կուսակցության նախկին անդամ, պատգամավոր,  վերակազմավորված ՀՀՇ-ի անդամ, մի  խոսքով` մի քանի ճամբար փոխած, բայց հոգով ՀՀՇ-ական մնացած Ալեքսանդր Արզումանյանի եւ ՀԱԿ խմբակցության հարաբերությունները, ըստ շրջանառվող լուրերի շարունակում են լարված մնալ: Դա ընդգծվեց փետրվարի 27-ին «A1+»-ի եթերում տեղի ունեցած բանավեճի ժամանակ, որի ընթացքում քննարկվում էր ընդդիմադիր բեւեռի` ԲՀԿ-ի կազմաքանդումը: Բանավեճին մասնակցնում էին պատգամավորներ Արամ Մանուկյանը, Ալեքսանդր Արզումանյանը, ՀՀԿ խմբակցության քարտուղար Գագիկ Մելիքյանը, ՀՅԴ պատգամավոր Արծվիկ Մինասյանն ու  «Ժառանգության» անդամ Ստեփան Սաֆարյանը:

Արզումանյանը բանավեճի ժամանակ ՀԱԿ-ի հետ համագործակցող ԲՀԿ-ին համարեց  իշխանության կողմից ստեղծված կուսակցություն, ապա պատասխանելով Արամ Մանուկյանի այն ակնարկին, թե ինքը «Ժառանգության» անդամ է, հայտարարեց, որ ինքը ֆորմալ առումով է «Ժառանգություն» խմբակցության անդամ է: Իրականում Արզումանյանը վերակազմյալ ՀՀՇ-ի դիրքորոշումն է ներկայացնում, այնպես, ինչպես ՀԱԿ-ում կան մարդիկ, որոնք չեն ներկայացնում ՀԱԿ-ի դիրքորոշումը: Արզումանյանը, ըստ էության, սրանով ակնարկեց  ՀԱԿ-ի պառակտվածությունը` հինգ հոգով յոթ երգ երգելու հանգամանքը:

Հիշեցնենք` Ալեքսանդր Արզումանյանը 2008 թ-ի նախագահական ընտրությունների ժամանակ եղել է ՀՀ նախագահի թեկնածու Լեւոն Տեր-Պետրոսյանի նախընտրական շտաբի պետ, սակայն հետագայում Արզումանյանը «ծիխարի» խզեց իր կապերը ՀԱԿ-ի հետ` տարբեր, ավելի տաքուկ ճամբարներ փնտրելով: Նշենք նաեւ, որ վերոնշյալ լարված հարաբերությունները սկսեցին ավելի կոնկրետ հասունանալ այն ժամանակ, երբ պարոն Արզումանյանը ՀՀ 1-ին նախագահին 2008 թվականին առաջարկեց «Ցախավելների» հեղափոխություն կատարել, իսկ վերջինս էլ չտվեց իր համաձայնությունը, սակայն տեղի ունեցավ այն, ինչ տեղի ունեցավ մարտի 1-ին: Իսկ հետո, երբ Տեր-Պետրոսյանը հայտարարեց ՀՀՇ-ի կազմաքանդման եւ ՀԱԿԿ-ի ստեղծման մասին, այստեղ արդեն Արզումանյանը չդիմացավ ու գնաց միացավ Արարատ զուրաբյաններին, ովքեր հայտարարեցին, որ իրական ՀՀՇ-ականները իրենք են: Դե իսկ համացանցում հայտնված այն խայտառակ գաղտնի ձայնագրությունները, որը վերաբերում էր Արզումանյանի մարտիմեկյան քաջագործություններին,  վերջնականապես պատռեց նրա դեմքը: Այսքանից հետո իսկ Արզումանյանին մնում էր հեռանալ տեր-պետրոսյանական ճամբարից` անգլիական ձեւով:

Տեղեկացնենք, որ Արզումանյանը խորհրդարան է անցնել «Ժառանգություն» կուսակցության ցուցակով, սակայն, ինչպես երկու տարի առաջ հայտարարեց նա, Ժառանգության» խմբակցությունում իր մնալը ձեւական բնույթ է կրում: Սա վկայում է այն, որ այս քաղաքական գործիչը իր ողջ գործունեության ընթացքում ձեւական ֆիգուր է եղել` մեր երկրում զբաղեցնելով շատ կարեւոր պաշտոններ:

Վերոնշյալ բանավեճից հետո լուրեր տարածվեցին, որ ՀԱԿ-ի եւ Արզումանյանի հարաբերություններն այնքան էլ հարթ չեն:

«Իրավունքը» ՀԱԿ խմբակցության պատգամավոր Արամ Մանուկյանից պարզեց` լուրերը որքանո՞վ են համապատասխանում իրականությանը: Պատգամավորը նախ զարմացած նայեց մեզ, ապա ասաց. «Մեկնաբանություն չկա»: Փաստորեն, պատգամավորը չհերքեց լուրերի իսկությունը:

Ի դեպ, երբ մեր հարցի պատասխանն էինք լսում Արամ Մանուկյանից, ՀԱԿ խմբակցության ղեկավար Լեւոն Զուրաբյանը խառնակչի նման միջամտեց մեր զրույցին` զարմանալով, թե ինչպես կարող է իր գործընկերը պատասխանել «Իրավունք» թերթի հարցերին: Մի հարցնող լինի, դուք տեղյա՞կ եք, թե ինչ կերպ է արձագանքում հանրությունը ձեր ոչ ադեկվատ կերպարին ու պահվածքին:

ՍՈՆԱ ԴԱՎԹՅԱՆ