ԿԵՆՏՐՈՆԻ ԹԱՂԱՊԵՏԸ ՓԱ՞Յ ՈՒՆԻ ԵԶՆԻԿ ԿՈՂԲԱՑԻ ՓՈՂՈՑՈՒՄ ԿԱՌՈՒՑՎՈՂ ՇԻՆՈՒԹՅՈՒՆԻՑ

ԿԵՆՏՐՈՆԻ ԹԱՂԱՊԵՏԸ  ՓԱ՞Յ ՈՒՆԻ ԵԶՆԻԿ ԿՈՂԲԱՑԻ

ՓՈՂՈՑՈՒՄ ԿԱՌՈՒՑՎՈՂ ՇԻՆՈՒԹՅՈՒՆԻՑ

«Իրավունքը» բազմիցս անդրադարձել է Եզնիկ Կողբացի 50/2  հասցեում` կանաչ տարածքի հաշվին կառուցվող դեռեւս անհասկանալի շինարարությանը: Փետրվարի 18-ին խնդրի առնչությամբ գրավոր հարցեր էինք ուղարկել   Կենտրոնի թաղապետարան (մինչ այդ էլ քաղաքապետարան, որը մեր վերջին հարցումն անպատասխան էր թողել), սակայն անցել է տասն օր, բայց  մեր հարցերի պատասխանը դեռ չենք ստացել:

Թաղապետարանի իրավասու աշխատակիցը մեզ հայտնեց, որ  ինքը նամակը ստանում է կամ առձեռն կամ փոստով, իսկ այս պահի դրությամբ «Իրավունքի» գրավոր հարցումը թաղապետը իրեն չի փոխանցել: Ստացվում է, որ կենտրոնի թաղապետ Արա Սադոյանը քաջատեղյակ է վերոնշյալ հասցեում կատարվող խնդրահարույց շինաշխատանքներից, սակայն ասելու ոչինչ չունի: Եվ  մնում է մեկ բան` «ցրողական» ու լղոզված պատասխաններ տալ լրատվամիջոցին:

Ըստ շրջանառվող ու չճշտված լուրերի` շինարարության պատվիրատու, «Վան» մոթելի տնօրեն Վահագն Վանթյանը «մարդ» ունի թե՛ կենտրոնի թաղապետարանում, թե ոստիկանությունում, որոնք ամեն ձեւով աջակցում են շինարարության արագ տեմպերով ընթանալուն: Տարածված լուրերի համաձայն`կառուցվող շինության հետ ինչ-որ հույսեր ու ծրագրեր է կապում նաեւ Կենտրոնի թաղապետը, թե կոնկրետ ինչ` առայժմ պարզ չէ:  Կրկին նույն շրջանառվող լուրերում նշվում է նաեւ, որ շինության կառուցումից հետո այն, հավանաբար, կտրվի վարձակալությամբ, իսկ հասույթը կբաժանվի մի քանի անձանց` Վահանգ Վանթյանի, Կենտրոնի թաղապետի ու ոստիկանության այն պաշտոնյայի միջեւ, որի հետ սերտ կապեր ունի Վանթյանը:

Եզնիկ Կողբացի 50/2 հասցեում կառուցվող շինությունը:

ՍՈՆԱ ԴԱՎԹՅԱՆ