ՊԱՐԳԵՎՆԵՐԻՑ ՈՒ ՄԵԴԱԼՆԵՐԻՑ ՀՐԱԺԱՐՎԵԼԸ ՎԻՐԱՎՈՐԱՆՔ Է Ե՛Վ ՊԵՏՈՒԹՅԱՆԸ, Ե՛Վ ԺՈՂՈՎՐԴԻՆ

ՊԱՐԳԵՎՆԵՐԻՑ ՈՒ ՄԵԴԱԼՆԵՐԻՑ ՀՐԱԺԱՐՎԵԼԸ ՎԻՐԱՎՈՐԱՆՔ Է Ե՛Վ ՊԵՏՈՒԹՅԱՆԸ, Ե՛Վ ԺՈՂՈՎՐԴԻՆ

Վերջին շրջանում որոշ մտավորականներ եւ հասարակական գործիչներ իրենց դժգոհությունն ու բողոքն արտահայտելու համար ընտրել են "յուրահատուկ" ձեւ` հրաժարվում են իրենց պարգեւներից եւ ստացած մեդալներից: Նման քայլով նրանք վիրավորում են ոչ միայն իրենց, այլեւ ժողովրդին, քանզի մտավորականի գործունեությունը գնահատողը նաեւ ժողովուրդն է: Իհարկե, պարգեւներից հրաժարվելով ոչինչ չի փոխվում, պարզապես տվյալ մտավորականի մասին մեկ-երկու օր բոլորը խոսում են եւ վերջ: Ի վերջո հրաժարվելով պարգեւներից` նրանք  հրաժարվում են նաեւ իրենց կոչումից ու գործից: Իսկ ահա կա մտավորականների մի շերտ, որը գնահատում է այն պարգեւները, որոնք ստացել է եւ բողոքելու փոխարեն ծառայում է իր կոչմանը` ստեղծագործել եւ վատը լավով փոխարինել:
Այս շաբաթ "Իրավունքն" անդրադարձել է այս հրատապ խնդրին եւ մշակույթի գործիչներից հետաքրքրվել, արդյո՞ք ճիշտ է, երբ մտավորականը հրաժարվում է պարգեւներից, ասել է թե` իր վաստակից:

"ՊԱՐԳԵՎՆԵՐԻՑ ՀՐԱԺԱՐՎԵԼԸ ԷԺԱՆԱԳԻՆ ՔԱՅԼ Է"

ՀՀ ժողովրդական արտիստ, կոմպոզիտոր ՌՈԲԵՐՏ ԱՄԻՐԽԱՆՅԱՆ.
- Յուրաքանչյուն իր փոխարեն կարող է պատասխանել, իրենց խղճին եմ թողնում նման արարքի մեկնաբանությունը: Ես իմ պարգեւներից երբեք չեմ հրաժարվել, չէ՞ որ այդ պարգեւները իմ կյանքի ու գործունեության գնահատականն են, իսկ գնահատականը պետք չէ վերադարձնել: Պարգեւներից հրաժարվելը էժանագին քայլ է, որ ցույց է տալիս տվյալ մարդու ինքնացուցադրությունը: Բնավ չեմ քաջալերում նման վերաբերմունքը:

"ՑԱՆԿԱՑԱԾ ՄՏԱՎՈՐԱԿԱՆԻ
ՀԱՄԱՐ ՊԱՐԳԵՎՆԵՐ ՍՏԱՆԱԼԸ ՄԵԾ ՊԱՏԻՎ Է"

Գրող, հրապարակախոս ՄԵՐՈՒԺԱՆ ՏԵՐ-ԳՈՒԼԱՆՅԱՆ.
- Պարգեւներից եւ կոչումներից հրաժարվելը վիրավորանք է եւ՛ պետության եւ՛ ժողովրդի հանդեպ: Ցանկացած երկրում պաշտոնյաներն անցնում են, իսկ պետությունը մնում է: Պարգեւները տրվում են պետության կողմից եւ սեփական երկրին վիրավորելը ես համարում եմ սխալ քայլ: Կոչումները հենց այնպես չեն տալիս, մեկ ամիս առաջ որոշում են, տվյալ մարդուց վերցնում կենսագրականը եւ լուսանկարներ, եթե մարդը պետք է ստանա մեդալներ եւ դրանից հրաժարվի, ապա թող հենց սկզբից հրաժարվի: Ցանկացած մտավորականի համար պարգեւներ ստանալը մեծ պատիվ է, դրանով ժողովուրդը, երկիրը գնահատում է մտավորականի գործունեությունը: Խորհրդային Միության ժամանակ ոչ ոք չէր համարձակվում մեդալներից հրաժարվել, բայց որ ապում են Հայաստանի Հանրապետությունում, պետք է նման վերաբերմո՞ւնք ցուցաբերեն: Ի՞նչ ենք անում, ինչո՞ւ ենք ստանում, որ հետո հրաժարվենք: Այս ամենը անհաջող թատերական ժեստ է այն մարդու կողմից, ով հրաժարվում է իր կոչումներից: Այս ամենը հաշվի առնելով` պետք է պարգեւներ տվողները լավ իմանանա, թե ում են պարգեւատրում:

Ներկայացրեց ԶՎԱՐԹ ԽԱՉԱՏՐՅԱՆԸ