Ի՞ՆՉ ՆՊԱՏԱԿ Է ԻՐԱԿԱՆԱՑՆՈՒՄ ՀԱՄԱՍԵՌԱՄՈԼՈՒԹՅՈՒՆ ՔԱՐՈԶՈՂ ԲՐԻՏԱՆԱԿԱՆ ՖԻԼՄԵՐԻ ՓԱՌԱՏՈՆԸ

Ի՞ՆՉ ՆՊԱՏԱԿ Է ԻՐԱԿԱՆԱՑՆՈՒՄ ՀԱՄԱՍԵՌԱՄՈԼՈՒԹՅՈՒՆ ՔԱՐՈԶՈՂ
ԲՐԻՏԱՆԱԿԱՆ ՖԻԼՄԵՐԻ ՓԱՌԱՏՈՆԸ

Բրիտանական խորհրդի կողմից ամեն տարի անցկացվող բրիտանական ֆիլմերի փառատոնը կարծես նպատակ ունի այլասերել հայ հասարակությանը, դա են վկայում ամեն տարի փառատոնի շրջանակներում Հայաստան բերված ֆիլմերը, որոնց մի մասը  համասեռամոլների քարոզն է ապահովում: Ինչպես մեզ ներկայացրեց բրիտանական մեր աղբյուրներից մեկը, Հայաստան բերած ֆիլմերի մեծ մասը ոչ միայն լավագույնը չեն, այլ ընդհանրապես իրենց մոտ այդ ֆիլմերին ծանոթ չեն, կան շատ այլ արժանավոր բրիտանական ֆիլմեր, որոնք Հայաստան չեն բերվում: "Իրավունքն" անդրադարձել էր այս թեմային եւ ներկայացրել մի քանի ուշագրավ փաստ, որ բավական չէ փառատոնային օրերին հանդիսատեսի մուտքն ազատ է եղել, մի բան էլ այդ շրջանակներում ցուցադրված ոչ մի ֆիլմի ազդագրում նշված չի եղել որեւէ տարիքային շեմ, թե դրանք որ տարիքի հանդիսատեսի համար են նախատեսված: Ինչի արդյունքում փառատոնի փակումն ազդարարող "Սերը ամեն ինչ է" ֆիլմի ժամանակ, որը, ըստ էության, քարոզում էր համասեռամոլների սերը եւ ավելին` ցուցադրում համասեռամոլների սեռական այլանդակությունները, մարդիկ ստիպված են եղել փակել դահլիճում գտնվող երեխաների աչքերը եւ արագ դուրս են եկել դահլիճից:
Այնուամենայնիվ, "Իրավունքը" խոստացել էր, որ հետեւողական կլինի եւ այս հարցի շուրջ կներկայացնի Մշակույթի եւ ԱԳ նախարարությունների, Հայ առաքելական եկեղեցու, Ազգային ժողովի ու մտավորականության խոսքը:

ԵՐԵՎԱՆՅԱՆ ՑՈՒՑԱԴՐՈՒԹՅՈՒՆՆԵՐԻՆ ՆԱԽԱՐԱՐՈՒԹՅՈՒՆԸ ԱՌՆՉՈՒԹՅՈՒՆ
ՉԻ ՈՒՆԵՑԵԼ

"Իրավունքի" հետ զրույցում ՀՀ մշակույթի նախարար ՀԱՍՄԻԿ ՊՈՂՈՍՅԱՆՆ ասաց, որ նախարարությունը հետեւողական է եղել միայն մարզերում ցուցադրված ֆիլմերին. "Նախարարության համապատասխան բաժնի աշխատակիցները դիտել են այն ֆիլմերը որոնք պետք է մարզերում ցուցադրվեին: Ձեր ասած ֆիլմերի մասին ես որեւէ տեղեկություն չունեմ: Մշակույթի նախարարությունը աջակցել է միայն, որ ծրագիրը իրականացվի մարզերում, ներկայացված էր ֆիլմերի որոշակի ցանկ, որի հետ մենք խնդիր չունեինք: Երեւան քաղաքում ինչ է ցուցադրվել, ճիշտն ասած, ինքս տեղյակ չեմ, որովհետեւ երեւանյան ցուցադրություններին Մշակույթի նախարաությունը որեւէ առնչություն չի ունեցել",- ասաց նախարարն ու մանրամասնեց. "Դա էլ այն ազատության գինն է, որը մենք ստացել ենք: Գիտեք, երբ սահմանափակում ենք, ասում են` ազատ երկրում չենք ապրում: Հիմա մեկնումեկը փորձի որեւէ կառույցի սահմանափակումներ դնել` խնդիր է առաջանում: Կարծում եմ` լավագույն տարբերակն այն է, որ եթե մարդկանց դուր չի գալիս, պետք է ուղղակի, մասնակից չլինեն ու հաղորդակից չդառնան այդ մշակույթին: Միայն Բրիտանական ֆիլմերի փառատոնի մասին չէ խոսքը: Որքան արգելք դնես, միեւնույնն է, այդ թեմայով հետաքրքրվողները շատանում են: Պետք է միշտ մերժել այն մշակույթը, որը քոնը չէ, եւ քո սրտին հոգեհարազատ չէ: Դրան միշտ կա տարբերակ` չսպառել, դուրս գալ եւ մասնակից չդառնալ դրան, այդ դեպքում դա դուրս կմղվի կյանքից, իսկ արժեքավորը կմնա: Փոխարենը` մենք անընդհատ ասում ենք` այստեղ այնպես եղավ, այնտեղ այսպես եղավ":

"ԱՌԱՆՑ
ՍԱՀՄԱՆԱՓԱԿՈՒՄՆԵՐԻ` ՉԻ ԿԱՐԵԼԻ ԱՅԴՊԻՍԻ ՖԻԼՄԵՐ ՑՈՒՑԱԴՐԵԼ"

ԱԺ ՀՀԿ խմբակցության պատգամավոր, ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամ ԿԱՐԻՆԵ ԱՃԵՄՅԱՆՆ էլ հավելեց. "Բրիտանական խորհրդի ու դեսպանատան գործունեությանը լավ եմ վերաբերվում, բազմաթիվ արդյունավետ ծրագրեր ենք իրականացրել: Բայց, ցավով պետք է ասեմ, որ ժամանակ չեմ ունեցել փառատոնի շրջանակներում ցուցադրվող որեւէ ֆիլմ դիտելու եւ չեմ սիրում մեկնաբանել այն, ինչ չեմ տեսել: Կարծում եմ` իհարկե, ցերեկային ժամերին կամ առանց սահմանափակումների, չի կարելի այդպիսի ֆիլմեր ցուցադրել, եթե իհարկե դա համապատասխանում է իրականությանը, որովհետեւ կրկնում եմ` ինքս չեմ նայել: Համասեռամոլների մասին էլ հնարավոր է, որ արժեքավոր ֆիլմ լինի, բայց սեւեռվել այդ թեմայի վրա ու ցերեկային ժամերին ցուցադրել կամ սահմանափակումներ չդնել, կարծում եմ, ճիշտ չէ, հատկապես մեր երկրում, որտեղ հայկական ավանդույթները պահպանվում են` հայերը ավանդապահ են եւ չեն ցանկանում, իրենց երեխաները  որ այդպիսի տեսարաններ կամ ֆիլմեր գիտեն":

ԼԻԼԻԹ ԵՂԻԱԶԱՐՅԱՆ