ՐԱՖՖԻ ՀՈՎՀԱՆՆԻՍՅԱՆԸ ՀԵՐԹԱԿԱՆ ԱՆԳԱՄ ԴԵՂԱՏՈՄՍ ՉՈՒՆԻ

ՐԱՖՖԻ ՀՈՎՀԱՆՆԻՍՅԱՆԸ ՀԵՐԹԱԿԱՆ ԱՆԳԱՄ ԴԵՂԱՏՈՄՍ ՉՈՒՆԻ

Ինչպես հայտնի է, «Ժառանգության» առաջնորդ Րաֆֆի Հովհաննիսյանն այսօր Ազատության հրապարակում հանրահավաք էր հրավիրել, որին մասնակցում էին երկու տասնյակի հասնող մարդիկ: Հովհաննիսյանը տեղեկացրեց, որ վաղը «Ժառանգությունը» մեկնում է Տավուշի մարզ` Չինար գյուղ` հարգելու Ադրբեջանում գերի ընկած ու սպանված Կարեն Պետրոսյանի հիշատակը: «Իրավունքը» պարոն Հովհաննիսյանից հետաքրքրվեց` արդյոք Տավուշ չի մեկնում նաեւ ժողովրդի զարկերակը ստուգելու, հասկանալու`պատրաստ են պայքարելու, թե՞ ոչ: «Մենք գնում ենք մեր զարկերակը փոխանցելու ժողովրդին»,- պատասխանեց Հովհաննիսյանը:

Մեր մյուս հարցին` ինչո՞ւ, ի վերջո, Րաֆֆի Հովհաննիսյանի կոչը` միացյալ հրապարակը, մեկ տարուց ավելի է, որ չի կայանում, ինչո՞ւ է ընդդիմադիր դաշտում անորոշություն ու անմիասնականություն է տիրում,  «Ժառանգության» առաջնորդն ասաց, որ միասնականություն կլինի շուտով:«Դա մեր ձեռքում է: Ես պատրաստի դեղատոմս չունեմ: Եթե  հասարակության մեծ մասը ուզում է փոփոխություն` միասին  պետք է կանգնենք հանուն  սահմանադրական ու ինքնիշխան Հայաստանի»,- եզրափակեց Հովհաննիսյանը:

Հ.Գ. Այնուամենայնիվ, Հովհաննիսյանը չհերքեց մեր հարցադրման բովանդակությունը եւ գուցե ներքուստ համամիտ է ՀԱԿ խմբակցության ղեկավար Լեւոն Զուրաբյանի այն պնդմանը, որ ընդդիմությունն այսօր մի քիչ կաղում է:

ՍՈՆԱ  ԴԱՎԹՅԱՆ