«ՊԱՏԱՍԽԱՆ` 100 ՏԱՐԻ ԱՆՑ.ԱՆՑՅԱԼԸ ՆԵՐԿԱՅՈՒՄ»

«ՊԱՏԱՍԽԱՆ`100 ՏԱՐԻ ԱՆՑ. ԱՆՑՅԱԼԸ ՆԵՐԿԱՅՈՒՄ»

Այսօր  Ե. Չարենցի անվան գրականության եւ արվեստի թանգարանում ամփոփվեց «Պատասխան` 100 տարի անց. անցյալը  ներկայում» գեղանկարչական , գրաֆիկական աշխատանքների եւ քանդակների մրցույթի արդյունքները: Ներկայացված  աշխատանքերը ստեղծվել են բացառապես Հայոց ցեղասպանությունը փաստող արխիվային 11 վավերագրերի թեմաներով: Այս մրցույթը  «Պատասխան` 100 տարի անց» խորագրով համալիր ծրագրի անբաժան մասն է կազմում, որը Հայոց ցեղասպանության 100-րդ տարելիցին ընդառաջ իրականացնում է Ե. Չարենցի անվան գրականության եւ արվեստի թանգարանը` ՀՀ մշակույթի նախարարության եւ Վիվա-Սել-ՄՏՍ ընկերության աջակցությամբ :

Ե. Չարենցի անվան գրականության եւ արվեստի թանգարանի տնօրեն ԿԱՐՈ ՎԱՐԴԱՆՅԱՆԻ խոսքով`նախորդ օրերի ընթացքում մրցույթի համար ձեւավորված հանձնախմբի անդամներն  արդեն առանձին-առանձին այցելել են թանգարան եւ ծանոթացել աշխատանքներին.«Մենք փորձել ենք այս նախագիծը ոչ ստանդարտ ձեւաչափով նեկայացնել, աշխատանքները գնահատելիս նույնպես հետեւել ենք այս սկզբունքին: Մասնագիտական հանձնախմբի անդամներըն առանձին են մտել թանգարան եւ ծանոթացել աշխատանքներին: Նման ձեւաչափի ընտրության պատաճառն այն էր, որ հանձնախմբի անդամներից  մեկի գնահատականը չազդի մյուսի գնահատականի  վրա »,-նշեց Կ. Վարդանյանը: Ըստ նրա` բոլոր աշխատանքերը վերջում կզետղվեն «Պատասխան`100 տարի անց» պատկերագրքում, որտեղ կլինեն նաեւ Ցեղասպանությունն վերապրածների վկայությունները:

ՀՀ մշակույթի փոխնախարար ՆԵՐՍԵՍ ՏԵՐ-ՎԱՐԴԱՆՅԱՆԸ փաստեց, որ այս ծրագիրը մյուս բոլոր ծրագրերից տարբերվում է, քանի որ այն մեծ հարթակ է սերունդների արտահայտման համար.«Այդ ամենն  արտացոլված է նրանց  արվեստի գործերում: Շատ հետաքրքիր է համադրել այն վավերագրերը, որոնք հիմք են հանդիսացել այս աշխատանքերը ստեղծելու համար: Համոզված եմ, որ վերջում ունենալու ենք շատ հետաքրքիր արդյունք`պատկերագրքիր տեսքով: Այս ծրագիրը խորհրդանշում է կյանքի շարունակականությունը»,-ընդգծեց Ն. Տեր-Վարդանյանը:

Վիվա-Սել-ՄՏՍ ընկերության գլխավոր տնօրեն  ՌԱԼՖ  ՅԻՐԻԿՅԱՆԸ նկատեց, որ Ցեղասպանությունն շարունակվում է մինչ օրս, քանի որ ամբողջ աշխարհը դեռ  չի ճանաչել եւ դատապարտել Հայոց ցեղասպանությունը.«Գիտակցաբար կամ  ոչ գիտակցաբար մարդիկ թույլ են տալիս նոր ցեղասպանություններ: Կարծում եմ ապագայում տեղի կունենան այլ ցեղասպանություններ եւս եւ այդ ամենը կշարունակվի այնքան ժամանակ , քանի դեռ  բոլորը չեն  գիտակցել  եւ հասկացել  այն, ինչ տեղի ունեցավ 1915 թվականին»,-ասաց Ռ.Յիրիկյանը:

Նշենք, որ մրցույթում հաղթեց Նարեկ Կնյազյանի «Վերջինը» քանդակը:

ԶՎԱՐԹ ԽԱՉԱՏՐՅԱՆ