ՀՌԱՀ-Ը ԱՐՏՈՆԱԳԻՐ Է ՏԱԼԻՍ, ԲԱՅՑ ՉԻ ՎԵՐԱՀՍԿՈՒՄ, ԹԵ ԻՆՉ ԵՆ ՑՈՒՅՑ ՏԱԼԻՍ

ՀՌԱՀ-Ը ԱՐՏՈՆԱԳԻՐ Է ՏԱԼԻՍ, ԲԱՅՑ ՉԻ ՎԵՐԱՀՍԿՈՒՄ,

ԹԵ ԻՆՉ ԵՆ ՑՈՒՅՑ ՏԱԼԻՍ

ՀՌԱՀ տնօրեն Գագիկ Բունիաթյանը պարզվում է, տեղյակ չէ, որ կան մալուխային հեռուստաընկերություններ, որոնք աղանդ են քարոզում: ԱԺ-ում ՀՀԿ պատգամավոր Մարգարիտ Եսայանի հարցադրումը կարծես թե անակնկալի բերեց Բունիաթյանին, որ որոշ մալուխային հեռուստաընկերություններով տարատեսակ աղանդների մասին հաղորդումներ են ցուցադրում հարցը համարեց «նուրբ» եւ խոստացավ քննարկել առանձին: Այս թեմայով «Իրավունքը» մի քանի հարց ուղղեց ՀՌԱՀ-ի տնօրենին:

- Պրն Բունիաթյան, կան մալուխային հեռուստաընկերություններ, որոնք, պարզվում է, աղանդ են քարոզում: Դուք մի՞թե տեղյակ չեք այդ մասին:

- Մենք մալուխային հեռուստաընկերություններին վերահեռարձակման արտոնագիր տալիս ենք: Հայաստանում այսօր գործում է մոտ 50 մալուխային հեռուստաընկերություն, որոնք իրենց ցանկում բավական մեծ թվով ալիքներ են հեռարձակում:

- Իսկ տեղյա՞կ եք` ինչ են  ներկայացնում հանրությանը:

- Մենք գիտենք ինչ են ներկայացնում…

- Աղանդները քարոզող հեռուստահաղորդումներ չե՞ն հեռարձակվում:

- Ոչ, չենք հանդիպել: Տիկին Եսայանի հետ խոսեցինք, կճշտենք` խոսքն ինչի մասին է: Եթե   օրենքի սահմաններից դուրս է այդ ալիքը, մենք կարձագանքենք:

- Ի՞նչն է պատճառը, որ քիչ են  հանրություն-եկեղեցի կապն ամրացնող հեռուստահաղորդումներ: Չե՞ք կարծում, որ  նման հաղորդումների սակավ լինելու պատճառով են ակտիվացել աղանդները: Երեւի տեղյակ եք, որ Հայաստանում պաշտոնական թվերով կա 300.000 աղանդավոր:

- Շատ բարդ հարց է: Միգուցե:

- Ինչո՞ւ են քիչ նման հաղորդումները:

- Ինձ թվում է` հանրությունը խնդիր ունի:

-Ի՞նչ խնդիր:

- Ավելի ակտիվ լինելու, եկեղեցին էլ… (նկատի ունի եկեղեցին պետք է ակտիվ լինի-խմբ.)

- Այսինքն` հանրությո՞ւնը պետք է պահանջի հեռուստաընկերություններից, որ   հասարակություն-եկեղեցի կապն ամրապնդող հաղորդումնե/ր  պատրաստեն:

- Պահանջելու հարցը չէ, այլ նախաձեռնողականության: Ենթադրում եմ` բոլորը շահագրգռված են, որ նման հաղորդումները շատ լինեն:  Ընդհանրապես ազգային, հայրենասիրական հաղորդումների պակաս կա: Պետք է ավելացնել նման հաղորդումները:

- Իսկ ինչո՞ւ չի ավելացվում: Միգուցե հեռուստաընկերությունները միայն վարկանիշային հաղորդումներն են կարեւորում:

- Չէ, միայն դրա համար չէ: Արվում է, ինչ-որ առաջընթաց կա: Ուղղակի ենթադրում եմ, որ մեր ցանկությունը ավելի մեծ է:

- Դիպուկ ասացիք` ցանկությունը մեծ է, իսկ ինչո՞ւ քայլեր չեն արվում:

- Եկեք դիմեք  հեռուստաընկերություններին` ինչու չեն անում: Պարզապես նման հաղորդումների քանակն է քիչ:

ՍՈՆԱ ԴԱՎԹՅԱՆ