ՀՌԱՀ ՏՆՕՐԵՆ. «ՖՈՐՄԱԼ ԱՌՈՒՄՈՎ «ԿԵՆՏՐՈՆ» ՀԵՌՈՒՍՏԱԸՆԿԵՐՈՒԹՅՈՒՆԸ ԳԱԳԻԿ ԾԱՌՈՒԿՅԱՆԻՆԸ ՉԷ»

ՀՌԱՀ ՏՆՕՐԵՆ. «ՖՈՐՄԱԼ ԱՌՈՒՄՈՎ «ԿԵՆՏՐՈՆ»

ՀԵՌՈՒՍՏԱԸՆԿԵՐՈՒԹՅՈՒՆԸ ԳԱԳԻԿ ԾԱՌՈՒԿՅԱՆԻՆԸ ՉԷ»

ՀՌԱՀ տնօրեն Գագիկ Բունիաթյանն այսօր խորհրդարանում պատասխանեց պատգամավորների մի քանի հարցերին: Օրենսդիր մարմնի ներկայացուցիչների հիմնական մտահոգությունը հետեւյալն է` ի՞նչ է մատուցվում այսօր եթերից մեր հեռուստադիտողներին: Այս եւ այլ հարցերի մասին «Իրավունքը» զրուցեց Գագիկ Բունիաթյանի հետ:

- Պրն Բունիաթյան, հաշվի  առնելով ԲՀԿ-ի  քաղաքական պասիվությունը, լուրեր են կան, որ «Կենտրոն» հեռուստաընկերությունը  վաճառվելու է եւ դառնալու է ԵՏՄ-ին սպասարկող հեռուստաընկերություն:

- Ես նման  տեղեկատվություն չունեմ: Եթե վաճառված լիներ, գործարք լիներ, մենք կիմանայինք:

- ՍԻՄ նախագահ, ԱԺ պատգամավոր Հայկ Բաբուխանյանը հնչեցրեց հարցադրում այն մասին, որ կան հեռուստաընկերություններ, որոնք միայն մի կուսակցության գաղափարախոսությունն են անընդհատ առաջ տանում: Արդյոք սա, ըստ Ձեզ, ուղեղների լվացում չէ եւ սխալ չէ նաեւ  օրենքի տեսանկյունից:

- Ակնհայտ նման հեռուստաընկերություն չկա, որը մի կուսակցության  քարոզի…

- Օրինակ, «Կենտրոն» հեռուստաընկերությունը միայն  ԲՀԿ ղեկավար Գագիկ Ծառուկյանի ու ԲՀԿ-ի  գաղափարների քարոզչությունն է առաջ  տանում:

- Ֆորմալ առումով «Կենտրոն» հեռուստաընկերությունը Գագիկ Ծառուկյանի հեռուստաալիքը չէ: Իսկ եթե ինչ-որ հեռուստաընկերություններ քաղաքական առումով ինչ-որ ուղղվածություն ունեն, հարում են ինչ-որ կուսակցությունների, դա քննարկման թեմա է: Բայց միանշանակ մի կուսակցությանը գովաբանեն, դա իհարկե…

- Բայց չե՞ք նկատում, որ «Կենտրոն» հեռուստաընկերությունը համամասնությունը  չի պահպանում: Միայն մի կուսակցության` ԲՀԿ-ի քարոզչությունն  է անում:

- Օրենքի սահմանում պահպանվում է, թե խախտում լիներ, կարձանագրեինք:

Այս պատասխաններից կարելի է եզրակացնել` պրն Բունիաթյանը ՀՌԱՀ փոխտնօրեն Ժիրայր Դադասյանի նման եւս կարծես թե հայկական հեռուստաալիքներ չի նայում: ՀՌԱՀ տնօրենը «լուսնից նոր իջածի» կարգավիճակով էր պատախանում մեր հարցերին` տեղյակ չլինելով, թե ինչը ում է պատկանում: Իսկ այն, որ «Կենտրոն» հեռուստաընկերությունը պատկանում է ԲՀԿ առաջնորդին, այդ մասին գիտի նույնիսկ ոզնին անտառում:

ՍՈՆԱ ԴԱՎԹՅԱՆ