«ՁՄԵՌԱՅԻՆ ԶՈՐԱԿՈՉԻՆ ՊԱՏՎԱՍՏՈՒՄԱՅԻՆ ԲԱՐԴՈՒԹՅՈՒՆՆԵՐ ՉԵՆՔ ՈՒՆԵՑԵԼ»

«ՁՄԵՌԱՅԻՆ ԶՈՐԱԿՈՉԻՆ ՊԱՏՎԱՍՏՈՒՄԱՅԻՆ ԲԱՐԴՈՒԹՅՈՒՆՆԵՐ ՉԵՆՔ ՈՒՆԵՑԵԼ»

«Իրավունքի» «Ուղիղ կապ» խորագրի հյուրն այս անգամ ՀՀ առողջապահության նախարարության բժշկական օգնության քաղաքականության վարչության պետ ԾԱՂԻԿ ՎԱՐԴԱՆՅԱՆՆ էր: Հաշվի առնելով մեր հյուրի մասնագիտությունը, թերեւս պատահական չէր, որ տասնյակ մարդիկ զանգահարում էին իրենց անձնական խնդիրներով` ակնկալելով տիկին Վարդանյանի խորհրդատվությունը:

ԻՆՖԵԿՑԻՈՆ
ՀԻՎԱՆԴՈՒԹՅՈՒՆՆԵՐԸ ԿՏՐՈՒԿ ՆՎԱԶԵԼ ԵՆ

- Ի՞նչ կասեք պատվաստումների մասին, դրանք կատարվո՞ւմ են անվճար հիմունքներով: (ՍՈՒՍԻ ԿԱՐԱՊԵՏՅԱՆ, ք. Երեւան)
-Հիվանդացության, մահացության ցուցանիշների մեջ ինֆեկցիոն հիվանդությունների տոկոսը վերջին 10 տարիներին կտրուկ նվազել է: Ավելին` հպարտությամբ ասում ենք, որ մեծ ինֆեկցիոն բռնկումներ չեն լինում:

Ամբուլատոր պոլիկլինիկական ցանցում, որտեղ տեղադրված են մեր իմունոկանխարգելիչ կաբինետները, եւ որտեղ դուք, ձեր երեխաները հաշվառված եք, պատվաստումները պետական պատվերով են իրականացվում: Այլ խնդիր է, որ դուք կարող եք դիմել մասնավոր կազմակերպություն, որտեղ պետք է վճարեք:
- Ի դեպ, որքանով տեղյակ ենք, զինակոչիկների պատվաստումների կարգը փոխվել է: Ինչո՞վ է պայմանավորված: («Իրավունք»)
-Այս տարի զորակոչիկները նույնպես իրենց պատվաստումները ստացան քաղաքացիական ժամանակահատվածում: Վերլուծությունը ցույց տվեց, որ հավաքակայանում պատվաստելն ու միանգամից ծառայության ուղարկելը խնդիրներ են առաջացնում: Ավելի ճիշտ է, որ զորակոչիկներն իրենց միկրոկլիմայում, այնտեղ, որտեղ ապրել են, նախապես փուլ առ փուլ ստանան այդ պատվաստումները եւ մնան հսկողության տակ: Այսօր արդեն առաջին արդյունքները կան, եւ մենք տեսնում ենք, որ ձմեռային զորակոչին պատվաստումային բարդություններ` որպես այդպիսին, չենք ունեցել:

«0-7 ՏԱՐԵԿԱՆ ԵՐԵԽԱՆ ՄԵՐ ԱՊԱԳԱՆ Է»

- Ի՞նչ կասեք 0-7 տարեկան երեխաներին անվճար բուժօգնություն տրամադրելու մասին: Ինչո՞ւ է մեր հիվանդանոցների բժշկական աշխատակազմը մոռանում այս օրենքը: (Աստղիկ Սուքիասյան, ք. Երեւան)
-Պետական պատվերի վերաբերյալ մայր փաստաթղթում ամրագրված են 24 խմբեր, եւ դրանցից մեկն էլ 0-7 տարեկան երեխաների անվճար բուժօգնության կազմակերպումն է` ե՛ւ առաջնային օղակում, ե՛ւ հիվանդանոցային: Եթե որեւէ տեղ, ինչպես տիկին Աստղիկն է ասում, մոռացել են կամ ինչ-որ այլ խնդիր է առաջացել, մենք պատրաստ ենք հարցը քննարկել եւ համապատասխան լուծում տալ: Այլ բան է, որ հնարավոր է սուր իրավիճակ չի եղել, ու ընդամենը հերթագրումների խնդիր կա, որը դժգոհություն է առաջացրել: Առողջապահության նախարարությունում հերթագրման սկզբունք է դրվել, որ եթե դեպքը շտապ, անհետաձգելի չէ, ապա հիվանդը կարող է հերթագրվել եւ համապատասխան  օրը գնալ ու իր բուժօգնությունը ստանալ: Գտնում եմ, որ մանկությունը պետք է ապահովագրված լինի մեր երկրում, քանի որ 0-7 տարեկան երեխան մեր ապագան է: Եվ դրա համար էլ մանկությունը, մայրությունը մեր առողջապահական նպատակային ծրագրում համար առաջին տեղում են:
- Մորաքույրս միայնակ թոշակառու է, «Փարոսից» է օգտվում: Նա  ունի աչքի կատարակտ, եւ վիրահատության կարիք կա: Կասե՞ք` ինչ-որ արտոնություն հասնո՞ւմ է նրան: (ՀՀ քաղաքացի)
-«Փարոսից» օգտվողների անապահովության շեմը որոշելու համար բալային համակարգ է գործում: Ձեր մորաքույրը 30 եւ ավել բալ ունենալու դեպքում պետական պատվերով իրավունք ունի կատարակտը բուժելու, բացառությամբ` ոսպնյակը: Այն Ձեր մորաքույրը պետք է ձեռք բերի, իսկ մենք փոխհատուցում ենք պետական պատվերի սահմաններում վիրահատության գինը: Այնպես որ, եթե նա 30 եւ ավել բալ ունի, ուրեմն` թող գնա իր տեղամասային պոկլիկլինիկան, որտեղ հաշվառված է եւ այնտեղից վերցնի պետական պատվերի ուղեգիր ու գնա համապատասխան կլինիկա: Նշեմ նաեւ, որ 36-ից ավելի բալ ունեցողների սիրտն էլ է անվճար վիրահատվում:  

ՀԵՌԱԲԺՇԿՈՒԹՅԱՆ ԻՐԱԿԱՆԱՑՈՒՄ ԵՎ ՌԵՖԵՐԵՆՍ
ԼԱԲՈՐԱՏՈՐԻԱՆԵՐԻ ՍՏԵՂԾՈՒՄ

- Հայաստանում մոտ ապագայում ստեղծվելու է ռեֆերենս լաբորատորիա, որի շնորհիվ հնարավոր կլինի գնահատել երկրում գործող լաբորատորիաների որակն ու արված հետազոտությունների ճշգրտությունը: Ե՞րբ կիրականացվի այդ ծրագիրը: (ՆՈՅԵՄ ՍԱՐԳՍՅԱՆ, ք. Երեւան)
-Ռեֆերենս լաբորատորիայի էությունը  ընդհանուր առմամբ համակարգում ինդենտիֆիկացիա ապահովելն է եւ հնարավորինս արդյունավետ ու ճշգրիտ լաբորատոր հետազոտման արդյունքներ ունենալը: Հայաստանում այս պահին ռեֆերենս լաբորատորիա գործում է տուբերկուլյոզի, միկրոբիոլոգիական մասով: 2013 թվականից ունենք հիվանդությունների կանխարգելման եւ վերահսկման կենտրոն եւ այն ձեռնամուխ է եղել այս հանրային առողջապահական ռեֆերենս լաբորատորիայի ստեղծման ծավալուն աշխատանքի իրականացմանը: Օրինակ, ԱՄՆ-ում ռեֆերենս կլինիկական լաբորատորիայի ստեղծումը 8 տարի է տեւել, քանի որ այն փուլեր ունի. առաջին փուլում պետք է փաստաթղթային դաշտը կարգավորվի, ապա պետք է կրթություն ստանան համապատասխան մասնագետները, որից հետո պետք է սարքավորումներով հագեցած այդ լաբորատոր ցանցը ստեղծվի: Արդեն մեր աշխատանքային խմբերը փաստաթղթային փուլի վրա են աշխատում, որ բազա ստեղծվի, որից հետո անցնելու ենք կրթական բազային: Իսկ հանրային առողջապահական մասով երեւի առաջիկա մեկ-երկու տարում արդեն կունենանք իրագործվող լաբորատոր ցանց: Կարծում եմ` բուժման համար առաջին խնդիրը լաբորատոր գործիքային ճիշտ հետազոտություններ անցկացնելն է:
- Առողջապահության նախարարությունը, որքանով տեղյակ եմ, ծրագրել է հանրապետությունով մեկ ներդնել հեռաբժշկության մոդելը, որպեսզի կարողանան ապահովել մարզերի եւ Երեւանի բժիշկների կապը: Ի՞նչ առաջխաղացումներ եք տեսնում այստեղ: (ՆԱՐԻՆԵ ՍԱՐԳՍՅԱՆ, ք. Երեւան)
-Հեռաբժշկությունը շատ անհրաժեշտ է Հայաստանի Հանրապետության համար, մանավանդ այն տարածքների, որտեղ նեղ մասնագիտական խորհրդատվությունները շատ կարեւոր են: Մենք չենք կարողանում հեռավոր շրջանները ապահովել բոլոր անհրաժեշտ կադրերով եւ, իհարկե, հեռաբժշկությունը այս խնդիրը բավականին կլուծի: Առողջապահության արդիականացման ծրագրով բժշկական 7 կազմակերպություն վերանորոգվել են` հաշվի առնելով տարածքային, տեխնիկական հարցերը, որտեղ պետք է լինեն սենյակներ` հատուկ հեռաբժշկության իրականացման համար: Այս ծրագրի սկիզբը դրվեց 2014 թվականի հունիսի 24-ին, երբ ՀՀ եւ Հնդկաստանի կառավարությունների միջեւ կնքվեց համագործակցության հուշագիր` Հայաստանում հեռաբժշկության մոդելի ներդրման հետ կապված: Թեպետ դրանից ընդամենը 6-7 ամիս է անցել, բայց արդեն Հայաստանում է տեխնիկական աջակցությունը: Մենք ստացել ենք բոլոր համապատասխան տեխնիկական սարքավորումները, որոնք այս պահին արդեն Առողջապահության նախարարության տնօրինության տակ են: Առաջիկա մեկ-երկու ամսում սպասում ենք, որ Հնդկաստանից ժամանեն մասնագետներ, ու կսկսենք տեխնիկայի տեղադրումը` նախատեսված 10 մարզերի մարզային կենտրոններում եւ Երեւան քաղաքում, ապա կսկսենք թրեյնինգային աշխատանքները: Այս տարվա մեջ ակնկալվում է այս աշխատանքների մեջ մեծ առաջընթաց, մարզեր-Երեւան ցանցի ստեղծում, որի հիմնական շեշտադրումը լինելու է ավելի դժվար հասանելի, ավելի հեռավոր տարածքների վրա:
Նշեմ, որ նախատեսվում է նաեւ էլեկտրոնային առողջապահական ծրագրի ներդրումը սկսել, որը զուգահեռ է հեռաբժշկությանը: Այսինքն`  այն արդեն պիլոտային փուլում է, որից հետո որոշակի վերլուծություն կկատարվի, եւ կանցնենք ընդհանուր ներդրման:
- Քանի որ անդրադարձաք ծրագրերին, հետաքրքիր է, թե ինչ արդյունքներ եք գրանցել 2015թ. հունվարի 1-ից մեկնարկած սրտի անհետաձգելի վիրահատության ծրագրի շրջանակում: («Իրավունք»)
-Ծրագիրը բավական հաջող է ընթանում, այս պահի դրությամբ 176 մարդ բժշկական օգնություն է ստացել. ստենտավորվել է ոչ դեղապատ ստենտով: 3 ամիս հետո վերջնական կամփոփենք ծրագիրը ու կտեսնենք, թե ինչպես ենք ընդլայնվում, որ բուժհաստատություններն ենք ներգրավում այս ծրագրի մեջ եւ ինչ խնդիրներ ունենք այս երեք ամսում:

ՀՐԱՆՏ ՍԱՐԱՖՅԱՆ

Հ.Գ.- Շարունակությունը կարդացե՛ք այստեղ`

http://www.iravunk.com/index.php?option=com_content&view=article&id=24382:p&catid=41:lurer&Itemid=57