ՀԷՑ-ԵՐԸ ՀԱՍԱՆ ԾԱՆՐ ՎԻՃԱԿԻ

ՀԷՑ-ԵՐԸ ՀԱՍԱՆ ԾԱՆՐ ՎԻՃԱԿԻ

Երեկ Ազգային ժողովում հանդես եկավ ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը: Վերջինիս նաեւ հարցերով դիմեցին մի շարք պատգամավորներ:
Մասնավորապես, ՍԻՄ նախագահ Հայկ Բաբուխանյանը հարց բարձրացրեց, որ փոքր հէկ-երը կառուցվում են այնպիսի գետերի վրա, որոնց պատճառով խափանվում է ջրվեժների բնական պայմանները, ինչը իր հերթին վնաս է հասցնում զբոսաշրջությանը եւ մեր քաղաքացիների հանգիստի կազմակերպմանը: Հարցին պատասխանելիս Ռ. Նազարյանը նշեց, որ իր ղեկավարած հանձնաժողովը լուրջ դերակատարություն այս հարցում չունի եւ ջրօգտագործման թույլտվության պատասխանատվությունը կրում է Բնապահպանության նախարարությունը:
Հայկ Բաբուխանյանի հաջորդ հարցերը վերաբերում էին սպառողների էլեկտրամատակարարմանը, մասնավորապեսª չնախատեսված անջատումներին, երբ հոսանքի տատանման արդյունքում փչանում են կենցաղային էլեկտրական սարքավորումները: Մյուս հարցն էլ վերաբերում էր սպառողների այն բողոքներին, որ հաշվիչների ցուցմունքները գերազանցում են իրենց սպառած էլեկտրաէներգիան: Այս հարցերին պատասխանելիս Ռ. Նազարյանը խորհուրդ տվեց բնակիչներինª իրենց ուզած ձեւով կապարակնքել հաշվիչները, կամ ստուգիչ հաշվիչներ տեղադրել տանը, եւ բոլոր դեպքերում, երբ խախտվում են սպառողների իրավունքները, բողոք ներկայացնեն հանձնաժողովին:
Իսկ ահա պատգամավոր Էդմոն Մարուքյանը հայտարարեց, որ էլեկտրական ցանցերի ներկայացվող վնասները եւ մի շարք ներդրումները կեղծ են: Իրականում դա ոչ այլ ինչ է, քան այդ կազմակերպությունում տիրող կոռուպցիայի արտահայտություն, որի հետեւանքով ՀԷՑ-երը հայտնվել են ծանր ֆինանսական դրության մեջ: Ռոբերտ Նազարյանը չժխտեց ՀԷՑ-երում կորուստների անչափ բարձր մակարդակըª նշելով, որ իր հանձնաժողովը սահմանել էր կորուստների 11,2 տոկոսի շեմը, սակայն ՀԷՑ-երը ներկայացնում են 13 տոկոսի կորուստ, ինչը ընկերությունում ստեղծված ծանր ֆինանսական վիճակի պատճառներից մեկն է: Ռ. Նազարյանը նշեց նաեւ, որ նա մերժել է ընդունել ՀԷՑ-երի կողմից ներկայացված ներդրումների 20 միլիարդ դրամ հատվածը, քանի որ դրանք չէին առնչվում համակարգի զարգացմանը: