"ԲՀԿ-Ն ԱՌԱՅԺՄ ԿՄՆԱ"

"ԲՀԿ-Ն ԱՌԱՅԺՄ ԿՄՆԱ"

Հայաստանի քաղաքական դաշտում տեղի ունեցող վերջին խմորումները մի շարք անորոշություններ են առաջ բերել: Դրանցից հիմնականը, իհարկե, "Բարգավաճ Հայաստան" կուսակցության շուրջ ստեղծված իրավիճակն է: ԲՀԿ-ն, մինչ այս, թեեւ իրեն այլընտրանք էր համարում, սակայն փաստ է, որ գտնվում էր ընդդիմության լիդերի կարգավիճակում: Հասկանալի է, այդ դերը նրան այլեւս չի վերապահվի: Բայց դրանով հանդերձ էլ, հաշվի առնելով անգամ այն փաստը, որ կուսակցության շարքերի նոսրացմանը զուգահեռ` ԲՀԿ-ն կորցնում է նաեւ իր պատգամավորներին, սակայն, էլի ամենավատատեսական սցենարներով այն մնում է խորհրդարանական թիվ 2 ուժը: Եվ այդ առումով, բնականաբար, ԲՀԿ-ի հետագա վիճակի թեման մնում է մեր ներքաղաքական առաջնային հարցերի թվում: Ի վերջո, "Բարգավաճ Հայաստան" կուսակցությունը` որպես այդպիսին, կշարունակի՞ իր գործունեությունը, ի՞նչ տեսքով եւ կարգավիճակով, թե՞ առհասարակ կդադարի գոյություն ունենալ: Հարցին անդրադարձել են հայաստանյան մի քանի փորձագետներ:
Փորձագետ ՀԱՅԿԱԶՈՒՆ ԱԼՎՐՑՅԱՆԸ նշեց, որ ԲՀԿ-ն առայժմ չի կազմալուծվի, կշարունակի իր գործունեությունը` որպես կուսակցություն: Իսկ թե ինչ լինի հետագայում, կախված է կուսակցության քայլերից. "Չեմ կարծում, որ կոպիտ միջամտությամբ այն կլուծարվի, առայժմ կուսակցությունը կմնա":
"Քրիստոնեա-ժողովրդական վերածնունդ" կուսակցության նախագահ ՍՈՍ ԳԻՄԻՅՇԱՆԸ եւս այն մտքին է, որ ԲՀԿ-ն չի լուծարվի, սակայն չի էլ ունենալու այն դերակատարությունը, որը մինչ այս ուներ Հայաստանի քաղաքական կյանքում. "Այս կուսակցությունում կան մարդիկ, ովքեր օժտված են գիտելիքներով եւ շնորհքով: Չգիտեմ` նրանցից ովքեր կմնան կուսակցությունում, ովքեր դուրս կգան: Բայց կուսակցությունը հիմնականում կառուցված էր ֆինանսական ներուժի վրա, եւ այժմ այդ ներուժը թուլանում է: Ուստիեւª կուսակցությունն էլ չի կարող այն դերը կատարել, որի նպատակով ստեղծվել էր: Իսկ հիմնական դերը հետեւյալն էր` Հանրապետական եւ "Բարգավաճ" կուսակցությունները մեկը մյուսին փոխարինելով կամ միասին կոալիցիա կազմելով` պետք է պահպանեին իշխանությունը":
Քաղաքագետ ԼԵՎՈՆ ՇԻՐԻՆՅԱՆԻ խոսքով` դժվար է հստակ կանխորոշել, թե ինչ ճակատագիր կունենա ԲՀԿ-ն: Սակայն մեր այս զրուցակիցը եւս այն մտքին է, որ առայժմ կուսակցությունը կմնա. "Եթե նույնիսկ կուսակցությունից 16 պատգամավոր էլ հրաժարվի, միեւնույնն էª ԲՀԿ-ն ԱԺ-ում շարունակելու է մնալ մեծությամբ երկրորդ ուժը: Լուծարվելը կա ու կա, բայց այդ կուսակցությունն ունի մեկ հնարավորություն` փոխակերպվել: Հայաստանի քաղաքական շահերից ելնելով` լավ կլիներ, որ ԲՀԿ-ն դառնար իրական կուսակցություն: Բոլոր շանսերը կան, որ կուսակցությունը հաղթահարի դժվարությունները եւ դառնա լավ կուսակցություն: Բայց քանի դեռ կուսակցության ղեկավարությունը նորմալ հայտարարությամբ հանդես չի եկել, որպեսզի բոլորին հասկանալի դառնա, թե ինչ է կատարվում, մեզ մնում է միայն հետեւել դեպքերի զարգացմանը":

ԶՎԱՐԹ ԽԱՉԱՏՐՅԱՆ