ԱՆԳԱՄ ԸՆԴԴԻՄՈՒԹՅՈՒՆԸ ՉԱՋԱԿՑԵՑ ՀԱԿ-ԻՆ

ԱՆԳԱՄ ԸՆԴԴԻՄՈՒԹՅՈՒՆԸ ՉԱՋԱԿՑԵՑ ՀԱԿ-ԻՆ

ՀԱԿ-ի եւ ԲՀԿ-ի կողմից առաջարկված կառավարման ճգնաժամի մասին ԱԺ քննարկումները հետաքրքիր զարգացումներ ստացան: Նախ` ինչպես հայտնի է, նույն ԲՀԿ-ն ոչ միայն չի մասնակցել քննարկումներին, այլ ընդհանրապես բացակայում է նիստերի դահլիճից` բոյկոտելով նաեւ այս հարցը: Այս նախաձեռնությանը չեն աջակցել նաեւ մյուս ընդդիմադիրները: ՕԵԿ խմբակցության ղեկավար Հեղինե Բիշարյանը իր ելույթում նշեց, որ համաձայն չէ իր գործընկեր Լեւոն Զուրաբյանի հետ: "Ժառանգություն" խմբակցության ղեկավար Ռուբիկ Հակոբյանն էլ միանշանակ չվերաբերվեց հարցին եւ հիշեցրեց ՀԱԿ-ի ՀՀՇ-ական անցյալը: Նա զուգահեռներ անցկացրեց Սերժ Սարգսյանի փետրվարի 12-ի եւ Լեւոն Տեր-Պետրոսյանի 1994 թվականի դեկտեմբերի ելույթների միջեւ, սակայն փաստեց, որ ՀՀ նախագահի ելույթն ավելի կատարելագործված էր:
ՀՅԴ-ի անունից հանդես եկող Արծվիկ Մինասյանն ունեցավ տեսական բնույթի դասախոսություն, տարբեր բառարաններից մեջբերելով ճգնաժամ բառի ստուգաբանությունը` կոչ անելով ելույթ ունեցողներին չվիրավորել միմյանց: Եթե սրան ավելացնենք անկախ պատգամավոր Էդմոն Մարուքյանի երկուշաբթվա ելույթը, որտեղ նա հայտարարեց, որ ՀԱԿ-ը այլընտրանք չէ իշխանությունների համար եւ, որ վերջապես ՀԱԿ-ի մի մասը, մասնավորապես Նիկոլ Փաշինյանը ու Հրանտ Բագրատյանը, նույնպես համաձայն չեն Լեւոն Զուրաբյանի հետ, ստացվում է, որ Լ. Զուրաբյանն Ազգային ժողովում ուներ կես խմբակցության աջակցություն, եւ դա պարզորոշ երեւաց քվեարկության ժամանակ: Արդյո՞ք պետք էր Լյովիկին երկու օր զբաղեցներ խորհրդարանը, որպեսզի նրա համար պարզ դառնա, որ պատգամավորների 90 տոկոսից ավելին համարում է, որ նա սխալ է:

ԱՐՄԵՆՈՒՀԻ ՀԱԿՈԲՅԱՆ