«ԵՎՐԱՏԵՍԻԼՈՒՄ» ԱՆՄՈՌՈՒԿԻ 3 ԹԵՐԹԻԿՆ ԱՐԴԵՆ ԲԱՑԱՀԱՅՏՎԱԾ Է

«ԵՎՐԱՏԵՍԻԼՈՒՄ» ԱՆՄՈՌՈՒԿԻ 3  ԹԵՐԹԻԿՆ

ԱՐԴԵՆ ԲԱՑԱՀԱՅՏՎԱԾ Է

«Իրավունքն» արդեն տեղեկացրել էր, որ այս տարի` մայիսի 19-ին, 21-ին եւ 23-ին, Վիեննայում` «Կառուցելով կամուրջներ» նշանաբանի ներքո կայանալիք «Եվրատեսիլ-2015»-ին Հայաստանը ներկայացնելու է նորաստեղծ «Genealogy» խումբը, որը  համախմբելու է 1915 թվականին աշխարհի 5 աշխարհամասերում (Եվրոպա, Ասիա, Ամերիկա, Աֆրիկա, Ավստրալիա) սփռված հայ ժողովրդի նոր սերնդին: Խմբում ծագումով հայ 6 արտիստներ են` իրենց 6 ճակատագրերով, բայց 1 պատմությամբ, որը մասնակիցները կներկայացնեն  «Don’t deny» «Մի՛ ժխտիր» երգով:

Խմբի 6 մասնակիցներից առաջինը ֆրանսահայ ճանաչված երգիչ Եսայի Ալթունյանն է, ով ներկայացնում է Եվրոպա աշխարհամասը, իսկ երկրորդը` ամերիկահայ սիրված երգչուհի Թամար Կապրելյանը: Երրորդը մասնակիցը` եթովպահայ սիրված երգիչ Վահե Թիլբյանն է, ով ներկայացնում է Աֆրիկա աշխարհամասը:

Խմբի 6 մասնակիցներից յուրաքանչյուրն ունի իր պատմությունը, ճակատագիրը, ինչն էլ միավորում է նրանց` նույնն են նրանց տատերի ու պապերի ճակատագրերը: Ոստի  Խմբի առաջին մասնակից ԵՍԱՅԻ ԱԼԹՈՒՆՅԱՆՆ ունենալով հայկական ծագում եւ արմատներ ապրել եւ իր երաժշտական առաջին քայլերն է կատարել Ֆրանսիայում: Նրա տատիկն ու պապիկը փախուստի են դիմել Խարբերդից Հայոց ցեղասպանության ժամանակ: Հինգ տարեկանում նրա պապը` Նշանը, փախել է Դեր-Զորի անապատից, երբ իր աչքի առաջ սպանել են իր մորն ու քույրերին: Նրան գտել են արաբ վերաբնակները անապատում եւ որոշել են խնամել: 18 տարեկանում նա պատահաբար հանդիպել է իր ազգականներից մեկին եւ տեղափոխվել Ֆրանսիա: Եսային մեծացել է Հայոց ցեղասպանության մասին պատմությունների ներքո, նրա պապն անգամ գիրք է հրատարակել, որպեսզի երբեք չմոռանա իր եւ 1915 թվականին հայ ժողովրդի հետ կատարվածը: Գիրքը կոչվում է «Անապատի երեխան» (the Child of the Desert): Եսային հավատում է, որ հիմա իր  ժամանակն է խոսելու եւ երգելու պատմության այս ողբերգական ժամանակահատվածի մասին:

Իսկ Նյու Յորքում բնակվող ԹԱՄԱՐ ԿԱՊՐԵԼՅԱՆԸ ամերիկահայ երգչուհի է եւ երգահան, ով հպարտանում է իր հայկական ժառանգությամբ եւ սիրում է խոսել իր հայկական արմատների մասին: Թամարի պապիկը` Ժիրայր Կապրելյանը, ծնվել է Խարբերդում, իսկ տատիկը՝ Հասմիկ Կապրելյանը՝ Մուսելում:

Երրորդ մասնակից ՎԱՀԵ ԹԻԼԲՅԱՆԸ, ով ծնվել եւ մեծացել է Եթովպիայում, ծնողները (Գարո Թիլբյանն ու Անի Ասլանյանը) ծագումով հայ են. հայրական կողմի պապը Հայոց ցեղասպանությունից փրկված հայերից է, մայրական կողմի ընտանիքի բոլոր անդամները լքել են Արեւմտյան Հայաստանը՝ 1890-1900-ականներին:

Փետրվարի 27-ին արդեն հայտնի կդառնա «Genealogy» խմբի չորրորդ մասնակցի անունը:

ԼԻԼԻԹ ԵՂԻԱԶԱՐՅԱՆ