ԱԺ -ՈՒՄ ԹԵԺ Է. ԲԱԳՐԱՏՅԱՆ VS ՆԱՂԴԱԼՅԱՆ

ԱԺ -ՈՒՄ ԹԵԺ Է. ԲԱԳՐԱՏՅԱՆ VS ՆԱՂԴԱԼՅԱՆ

Շահութարհարկի վերաբերյալ օրինագիծն քվեարկության դնելը առաջացրեց ընդդիմադիր ՕԵԿ-ի ու ՀԱԿ-ի զայրույթը:

Հիշեցնենք, որ օրենքը ԱԺ էր բերվել 48 ժամ ռեժիմով:

ՕԵԿ խմբակցության ղեկավար Հեղինե Բիշարյանը հայտարարեց, որ բովանդակային քննարկում պետք է անել, նոր դնել քվեարկության:  ՕԵԿ խմբակցության քարտուղար Մհեր Շահգելդյանն էլ ասաց, որ եթե հիմա օրինագիծը  դրվի քննարկման, ապա այն  արտահանման մենաշնորհացման է տանելու:

Բիշարյանի կարծիքին համամիտ էր նաեւ ՀԱԿ-ը: Խմբակցության քարտուղար Արամ Մանուկյանը, ով ասաց, որ թըփ-շըփ-ով օրինագիծ չեն ընդունում:

Խոսքով հանդես եկավ նաեւ ՀՀ ԱԺ փոխնախագահ Հերմինե Նաղդալյանը, ով նկատեց, որ շըփ-թըփի հարց չկա: Տիկին Նաղդալյանին հատկացված ժամանակը լրանալուց հետո նա շարունակում էր իր պնդումները, սակայն ԱԺ նախագահ Գալուստ Սահակյանը ստիպված եղավ մի քանի անգամ ժամանակի ավարտի զգուշացման կոճակը սեղմել:

ՀԱԿ խմբակցության  պատգամավոր, նախկին վարչապետ Հրանտ Բագրատյանն էլ ասաց, որ տիկին Նաղդալյանը հակասում է տնտեսագիտության օրենքին: «Կամ ձեզ փոխեք, կամ տնտեսագիտությունը».- ասաց նա: Մի հարցնող լինի ձեր կառավարման տարիներին ձեզ ո՞վ փոխեց: Ձեզ թվում է, պարոն Բագրատյան, ժողովուրդը մոռացե՞լ է, թե ձեր կառավարման տարիներին ձեր տնտեսագիտական գիտելիքները ինչպես Հայաստանի տնտեսությունը բերեցին զրոյական վիճակի: Ինչեւէ, ի պատասխան` տիկին Նաղդալյանը հակադարձեց Բագրատյանին, ասելով, որ տնտեսագիտության պրոֆեսորը  նա է, որը առաջացրեց ԱԺ նախագահ Գալուստ Սահակյանի զայրույթը: Վերջինս սաստող հայացքով նայեց Նաղդալյանին` հասկացնելով, թե չի  կարելի առանց ձայնի իրավունքի խոսել:

Այնուամենայնիվ, շահութահարկի մասին օրենքը դրվեց քվեարկության եւ 64 կողմ, 4 դեմ ձայների մեծամասնությամբ ընդունվեց:

Մինչ հաջորդ հարցի` կառավարման ճգնաժամի մասին հարցի քվեարկության դրվելը, ՀԱԿ խմբակցությունը 20 րոպե ընդմիջում խնդրեց, սակայն նիստերի դահլիճից դուրս չեկավ:

ՍՈՆԱ ԴԱՎԹՅԱՆ