ՀԱՅ ՖՈՒՏԲՈԼԻՍՏՆԵՐԻ ԴԵԳԵՐՈՒՄՆԵՐՆ ԱՅԼ ԱՌԱՋՆՈՒԹՅՈՒՆՆԵՐՈՒՄ

ՀԱՅ ՖՈՒՏԲՈԼԻՍՏՆԵՐԻ ԴԵԳԵՐՈՒՄՆԵՐՆ ԱՅԼ ԱՌԱՋՆՈՒԹՅՈՒՆՆԵՐՈՒՄ

Ֆուտբոլի Հայաստանի ազգային հավաքականի, ինչպես նաեւ թիմի կազմում տեղ գտնելու թեկնածու ֆուտբոլիստներն իրենց բախտն են որոնում ամենատարբեր երկրների առաջնություններում:
Անթալիայում հավաք անցկացնող Մինսկի "Դինամոն", որտեղ փորձաշրջան է անցնում Արթուր Եդիգարյանը, ստուգողական խաղում 0:2 հաշվով պարտվել է Դոնեցկի "Շախտյորին": Հայաստանի հավաքականի կիսապաշտպանը մասնակցել է առաջին խաղակեսին: Եդիգարյանը. պահեստային նստարաններին մնալու վտանգի տակ է:
Հունաստանի առաջնությունում եւս ներկայացուցիչ ունենք. "Կերկիրանի" կազմում է հանդես գալիս Հայաստանի հավաքականի կիսապաշտպան Գեւորգ Ղազարյանը, ով մասնակցել է Հունաստանի առաջնության 25-րդ տուրի "Պլատանիասի" դեմ հանդիպման ողջ ընթացքին եւ փոխարինվել միայն ավելացված ժամանակում: Ղազարյանի ադապտացման պրոցեսը, հուսանք, շատ չի ձգձգվի. վերջինս հնարավորություն ունի պայքարել թիմի հիմնական կազմում տեղ գտնելու համար:
Ֆուտբոլի Լյուքսեմբուրգի առաջնությունում հանդես է գալիս ազգային ընտրանու հարձակվող Ալեքսանդր Կարապետյանը: Կարապետյանը "Դյուդելանժի" կազմում "Հոստերտի" դեմ խաղում գոլ է հեղինակել եւ վաստակել թիմի երկրպագուների համակրանքը:
Եթե վերը նշված բոլոր օրինակներում հայ ֆուտբոլիստները նախընտրել են ամեն ինչ, բացի Հայաստանի ներքին առաջնությունից, ապա Հայաստանի հավաքականի թեկնածու Զավեն Բադոյանը Բելառուսի "Գոմելը" փոխարինել է երեւանյան "Փյունիկ" ակումբով: Այսպիսի տեղափոխությունները փոքր-ինչ տարօրինակ են դիտվում, ավելի շատ ընդգծվում է ֆուտբոլիստի այլ տարբերակ չունենալու հանգամանքը: Թե՛ Լյուքսեմբուրգի, թե՛ Բելառուսի առաջնությունները չեն փայլում իրենց բարձր մակարդակով եւ որակներով, բայց, իհարկե, Հայաստանի ներքին առաջնությունից ավելի տխուր պատկերով որեւէ առաջնություն դժվար է պատկերացնել: Դրա վառ ապացույցը նոր մեկնարկելիք մրցաշրջանն է: Թիմերի քանակը առաջնությունում ամեն տարի կրճատվում է, եւ, ըստ երեւույթին, այստեղ որեւէ տարօրինակ բան չկա: Անհատները, ովքեր տնօրինում են այս կամ այն ֆուտբոլային ակումբը, դա չեն անում` ելնելով մարզաձեւի նկատմամբ անձնուրաց սիրուց, հասկանալի է, որ այստեղ գերխնդիրը սեփական շահույթն ապահովելն է: Բայց հայաստանյան աղքատիկ ֆուտբոլի պայմաններում դա դժվար է պատկերացնել: Ընդ որում, աղքատիկ` բոլոր առումներով` թե՛ խաղային, թե՛ ֆինանսական:
Իհարկե, չենք մոռանում նաեւ ՀՖՖ-ի ոչ այնքան աղքատիկ ֆինանսավորման մասին, որը ոչ մի կերպ առաջնության հարցերում զգացնել չի տալիս: Արդյունքում` ակումբները միմյանց հաջորդելով` սահմանափակում են գործունեությունը, իսկ երիտասարդ ֆուտբոլիստներն ընկնում են նոր ակումբ գտնելու դեգերումների մեջ: Մինչդեռ, շեշտը դնելով դրսում հանդես եկող ֆուտբոլիստներով հավաքական ունենալու վրա` կարելի է հուսախաբ լինել:

ՔՐԻՍՏԻՆԵ ՊԵՏՐՈՍՅԱՆ