ՋԵՐՄՈՒԿԸ` ՁՅՈՒՆԵ ՔԱՆԴԱԿՆԵՐԻ ՔԱՂԱՔ

ՋԵՐՄՈՒԿԸ` ՁՅՈՒՆԵ ՔԱՆԴԱԿՆԵՐԻ ՔԱՂԱՔ

«Ջերմուկի զարգացման կենտրոն» հասարակական կազմակերպության նախաձեռնությամբ  փետրվարի 20-22-ը Ջերմուկ քաղաքում տեղի ունեցավ «Ձնեմարդուկ-2015» փառատոնը, որի հիմնական նպատակն է Ջերմուկում զարգացնել ձմեռային զբոսաշրջությունը: Նկատելի է դառնում, որ  չորրորդ տարին անցկացվող փառատոնը  ծառայում է  իր նպատակին, քանի որ տարեցտարի ավելանում է ե′ւ զբոսաշրջիկների ե′ւ փառատոնի մասնակիցների թիվը: Այս տարի փառատոնին իր մասնակցությունն էր բերել նաեւ սիրողական հեծանվային սպորտի եւ հեծանվային զբոսաշրջության ֆեդերացիան: «Ջերմուկի զարգացման կենտրոն» ՀԿ նախագահ ՎԱԶԳԵՆ ԳԱԼՍՏԱՆՅԱՆԻ խոսքով`այս տարի «Ձնեմարդուկ» փառատոնի առանձնահատկությունն այն էր, որ հրավիրված են եղել  պրոֆեսիոնալ քանդակագորական խմբեր.«Փառատոնի դժվարությունները կապված էին եղանակային պայմանների հետ: Կազմակերպչական առումով որեւէ խնդիր չունեցանք, քանի որ արդունավետ իրականացրեցինք այն բոլոր առաջադրանքները, որոնք մեր առջեւ դրված էին»,-նշեց Վ. Գալստյանը եւ ընդգծեց, որ փառատոնի ամենամեծ ձեռքբերումը փառատոնի ճանաչելիությունն է եւ ձմեռային զբոսաշրջության ոլորտում հետաքրքրվողների ներգավումը,  քանի որ ձմեռային տուրիզմը Հայաստանում կայացած չէ.«Մեծ հաշվող ձմեռային փառատոներ Հայաստանում քիչ են անցկացվում եւ մենք փորձում ենք այդ բացը լրացնել»,-ավելացրեց Վազգեն Գալստյանը:

ՀՀ էկոնոմիկայի նախարարության տուրիզմի վարչության պետ ՄԵԽԱԿ ԱՊՐԵՍՅԱՆԸ կարեւորեց փառատոների եւ հատկապես ձմեռային փառատոների անցկացումը.«Փառատոները շատ կարեւոր են տվյալ համայնքը ներքին եւ միջազգային շուկայում ներկայացնելու համար: «Ձնեմարդուկ» փառատոնը գնալով մեծ ճանաչում է ձեռք բերում: Ցանկությունը մեծ է, որ փառատոնը դառնա ամենամյա եւ ավանդաբար նշվի: Այնպես պետք է անենք, որ Ջերմուկը տարվա չորս եղանակներին դառնա հանգստի ակտիվ կենտրոն»,-շեշտեց Մ. Ապրեսյանը:

Ադեն երկրորդ տարին է փառատոնին մասնակցում է նաեւ «Կարին» ավանդական երգի պարի համույթը`ԳԱԳԻԿ ԳԻՆՈՍՅԱՆԻ գլխավորությամբ: Ըստ Գ. Գինոսյանի դժվար է ձյան վրա պարել, մանավանդ այն դեպքում, երբ հավաքված հանդիսատեսին նույնպես պետք էր սովորեցնել պարել.«Իհարկե դժվար էր պարել ձյան վրա, եթե դժվարություններից պետք է վախենանք, մենք երկար ճանապարհ չենք անցնի: Կարծում եմ հայի համար դժվարությունները երբեք վախենալու չեն եղել եւ հայ մարդու ամենամեծ առաքելությունը դժվարություն հաղթահարելն է»,-փաստեց Գագիկ Գինոսյանը եւ մեջբերելով փիլիսոփայական այն միտքը, որ  հազար մղոնանոց ճանապարհը սկսվում է առաջին քայլից `նկատեց,  որ այս փառատոնում էլ նման սկզբունքով պետք է շարժվել:

ԶՎԱՐԹ ԽԱՉԱՏՐՅԱՆ