«ԵՎՐԱՏԵՍԻԼՈՒՄ» ԱՆՄՈՌՈՒԿԻ ԵՐԿՐՈՐԴ ԹԵՐԹԻԿԸ ԹԱՄԱՐԱ ԿԱՊՐԵԼՅԱՆՆ Է

«ԵՎՐԱՏԵՍԻԼՈՒՄ» ԱՆՄՈՌՈՒԿԻ ԵՐԿՐՈՐԴ

ԹԵՐԹԻԿԸ ԹԱՄԱՐԱ ԿԱՊՐԵԼՅԱՆՆ Է

«Իրավունքը» տեղեկացրել էր, որ «Եվրատեսիլ-2015»-ին` երաժշտական հեղինակավոր 60-րդ մրցույթին, Հայաստանն այս տարի կներկայանա նոր ձեւաչափով ու նոր խմբով: Ավելին` հավատարիմ մնալով մրցույթի այս տարվա «Կառուցելով կամուրջներ» նշանաբանին, ոգեշնչվելով Հայոց ցեղասպանության 100-ամյա տարելիցի խորհրդանիշ անմոռուկի գաղափարով, ինչպես նաեւ առաջնորդվելով բազմաթիվ սփյուռքահայերի ցանկությամբ, ովքեր միշտ եղել են եվրատեսիլյան պատվիրակների կողքին, Հանրային հեռուստաընկերության ստեղծագործական խումբը որոշել է մրցույթին ներկայացնել նոր ձեւաչափ: Կարեւորելով խաղաղության, միասնության եւ հանդուրժողականության գաղափարը` որոշվել է այս տարի համախմբել 1915-ին աշխարհի 5 աշխարհամասերում` Եվրոպայում, Ասիայում, Ամերիկայում, Աֆրիկայում, Ավստրալիայում սփռված հայ ժողովրդի նոր սերնդին: Խմբում ծագումով հայ 5 երգիչներ են, որոնք զուգակցվում են անմոռուկի 5 թերթիկների հետ: Նրանց կմիանա եւս մեկ մասնակից Հայաստանից, որը կհամախմբի թերթիկները: Հատուկ մրցույթի համար ձեւավորվելիք խումբը կկրի Genealogy անվանումը` 6 արտիստ, 6 ճակատագիր, 1 պատմություն:  Իսկ երգը վերնագրված է «Don't deny»` «Մի՛ ժխտիր»:

Արդեն հայտնի է որ նորաստեղծ Genealogy խմբի 6 մասնակիցներից մեկի անունը` Եվրոպա աշխարհամասը ներկայացնող ֆրանսահայ ճանաչված երգիչ, երգահան, դաշնակահար եւ դերասան ԵՍԱՅԻ ԱԼԹՈՒՆՅԱՆԸ, ում համար երաժշտությունը մարդկանց եւ նրանց սրտերը միավորելու միջոց է, խաղաղության կոչ:

Այսօր արդեն պարզվեց, որ Genealogy խմբի երկրորդ մասնակիցը Ամերիկա աշխարհամասից ամերիկահայ ճանաչված երգչուհի, երգահան ԹԱՄԱՐ ԿԱՐՊԵԼՅԱՆՆ Է, ով բնակվելով Նյու Յորքում հպարտանում է իր հայկական ժառանգությամբ եւ սիրում է խոսել իր հայկական արմատների մասին: Թամարի պապիկը՝ Ժիրայր Կապրելյանը, ծնվել է Խարբերդում, իսկ տատիկը՝ Հասմիկ Կապրելյանը՝ Մուսելում: Թամարը լրջորեն երաժշտությամբ է սկսել հետաքրքրվել, երբ ծանոթացել է Billy Joel-ի և Paul McCartney-ի աշխատանքներին: Թամարը երգեր սկսել է գրել 14 տարեկանից՝ առանց  որևէ երաժշտական գործիքի տիրապետելու: Արդեն 17 տարեկանում սկսել է դաշնամուր նվագել, ինչը հնարավորություն է տվել փոքրիկ ձայնագրիչի միջոցով ձայնագրել իր հորինած երաժշտություններն ու երգերը: 2008-ի մարտին նա հաղթել է One Republic խմբի YouTube-ում հայտարարած Apologize երգի լավագույն վերարտադրման մրցույթում: Թամար Կապրելյանն իր առաջին ձայներիզը թողարկել է 2010-ի օգօստոսին Interscope Records-ի հետ համատեղ և անվանել այն «Մեղավոր, թե անմեղ» (Sinner or a Saint):  Նույն թվականին նա The Far East Movement-ի հետ հանդես է եկել կենդանի հնչողությամբ մի շարք համերգների ընթացքում` կատարելով «Like a G6» երգը Dev-ի փոխարեն: Իր առաջին Universal’s Killer Tracks Artist Series-ի EP, California-ն թողարկվել է 2012 թվականի հունիսի 19-ին, որը Xandy Barry հետ համատեղ աշխատանքի արդյունքն էր:

Ի դեպ, հաջորդ մասնակցի անունը հայտնի կդառնա փետրվարի 23-ին:

ԼԻԼԻԹ ԵՂԻԱԶԱՐՅԱՆ