«ԸՆԴԱՄԵՆԸ ԲՀԿ-Ի ԲԱԶՄԱԹԻՎ ՊԱՏԳԱՄԱՎՈՐՆԵՐԻՑ ՄԵԿՆ ԵՄ...»

«ԸՆԴԱՄԵՆԸ ԲՀԿ-Ի ԲԱԶՄԱԹԻՎ
ՊԱՏԳԱՄԱՎՈՐՆԵՐԻՑ ՄԵԿՆ ԵՄ...»

«Ինձ համար թանկ է մեր քաղաքացիներից յուրաքանչյուրի կյանքն ու արժանապատվությունը: Ոչ մի նպատակ չի կարող արդարացնել նույնիսկ մեկ անմեղ մարդու արյուն: Թե՛ իշխանության, թե՛ ընդդիմության խնդիրն է չանցնել ողջամտության սահմանը:Բոլոր խնդիրները պետք է լուծվեն խաղաղ, օրինական, քաղաքական ճանապարհով»,

- ահա այսպիսի բովանդակությամբ հայտարարություն տարածելով` «Բարգավաճ Հայաստան» կուսակցության նախագահ, ԱԺ պատգամավոր Գագիկ Ծառուկյանը հրաժարվեց ոչ իշխանական «եռյակի» հետ Ազատության հրապարակում հանրահավաք անցկացնելու գաղափարից: Իսկ այսօր` փետրվարի 20-ին, խոստացված հանրահավաքը վերածվեց «Ժառանգություն» կուսակցության նախագահ, Ազատության հրապարակի նվիրյալ բանախոս Րաֆֆի Հովհաննիսյանի մամլո ասուլիսի: Վերոնշյալ հայտարարության ու ներքաղաքական զարգացումների մասին «Իրավունքը» զրուցեց ԱԺ ԲՀԿ խմբակցության պատգամավոր, «Բարգավաճ Հայաստան» կուսակցության մամլո խոսնակ ՏԻԳՐԱՆ ՈՒՐԻԽԱՆՅԱՆԻ հետ:

-Գագիկ Ծառուկյանն իր հայտարարությամբ չեղյալ հայտարարեց փետրվարի 20-ին նախատեսված հանրահավաքը, արդյո՞ք սա միանձնյա ընդունված որոշում էր, թե՞ խորհրդակցել էիք այդ մասին «եռյակի» անդամ քաղաքական ուժերի հետ:

- Կոմպետենտություն չունեմ այդ հարցին պատասխանելու:
- Նույն հայտարարության մեջ ԲՀԿ նախագահը նշեց նաեւ, որ ոչ մի նպատակ չի կարող արդարացնել նույնիսկ մեկ անմեղ մարդու արյուն: Արդյո՞ք դեպի ապակայունացում, արյունահեղություն տանող այդ փետրվարյան հանրահավաք անելու որոշում ընդունելու ժամանակ այս հարցը չէր քննարկվել կանխավ:
- «Բարգավաճ Հայաստանը» միշտ` իր ստեղծման առաջին իսկ օրվանից` հայտարարել է եւ այս անգամ եւս հայտարարում է, որ ոչ մի կերպ թույլ չի տալու արյունահեղություն Հայաստանի Հանրապետությունում:
- Այնուամենայնիվ, նման ներքաղաքական զարգացումներից հետո` ոչ իշխանական «եռյակի» ձեւաչափը կմնա՞:
- Կոմպետենտություն չունեմ այդ հարցին պատասխանելու:
- Հուսալով, որ նույն պատասխանին չեմ արժանանա` եւս մեկ հարց. ըստ Ձեզ, ԲՀԿ-ն այլեւս ընդդիմություն կդառնա՞:
- Ես ընդամենը ԲՀԿ-ի բազմաթիվ պատգամավորներից մեկն եմ եւ ընդամենը կուսակցության խոսնակն եմ, եթե ինձ որեւէ պաշտոնական տեղեկատվություն տրամադրվի` ձեզ փեխանցելու, կփոխանցեմ: Միանձնյա որոշումներ կայացնեու լիազորություններ ես չունեմ:

ՀՐԱՆՏ ՍԱՐԱՖՅԱՆ