ԶԱՐՄԱՆՔ

ԱՄՆ պետքարտուղարի օգնական ՎԻԿՏՈՐՅԱ ՆՈՒԼԱՆԴԻ այցից, բնականաբար, ոչ ոք ոչ մի լավ բան չի սպասում: Դե պարզ է` ուր հայտնվել է այդ չարագուշակ վամպիրուհին, այնտեղ ներքին խառնակչություններ են եղել եւ տարատեսակ աղետալի իրադարձություններ: Բայց մենք համեմատաբար էժան պրծանք` ընդամենը տիկին Նուլանդի զարմանալի ու ծայրահեղ ցինիկ առաջարկությամբ: Նա ոչ ավել, ոչ պակաս առաջարկում է Ադրբեջանին վերադարձնել երկու դիվերսանտներին. "Այն, ինչ տեղի է ունեցել, անշուշտ սոսկալի հանցագործություն է, բայց դրա հետ մեկտեղ` մենք կոչ ենք անում պատկան մարմիններին, կատարել այս հումանիստական ժեստը": Դե, ինչ ասես, այստեղ մնում է սույն ծայրաստիճան տհաճ տիկնոջը ցույց տալ հանրահայտ ռուսական հասցեի ուղղությունը:
Վերջերս զարմանալիորեն շատ է սկսել գրել ԼԵՎՈՆ ՏԵՐ-ՊԵՏՐՈՍՅԱՆԸ: Դեռ նոր էինք մարսել նրա` Ցեղասպանության 100-ամյակին նվիրված բաց նամակը, երբ նա հանդես եկավ "Սրտիս պարտքը" անունով հոդվածով: Անշուշտ, կարելի է միանգամից հռետորական հարցադրում հնչեցնել` իսկ դու սիրտ ունե՞ս, որ սրտի պարտք էլ ունենաս: Բայց հետաքրքիրն այն է, որ ԼՏՊ-ն որոշել է ներկայացնել իր տեսակետը` ԲՀԿ-ի գործած սխալների վերաբերյալ: Գումարած դրան, նա նաեւ անչափ մեծ գովք է շռայլել Գագիկ Ծառուկյանի հասցեին` այն Գագիկ Ծառուկյանի, ում հաջողացրեց հարմար պահին դավաճանել: Դե ինչ, զարմանալով հանդերձ, մնում է միայն արձանագրել, որ Տեր-Պետրոսյանի գովքը քիչ բանով է տարբերվում Հուդայի համբույրից:
Ի դեպ, ԲՀԿ-ի վրա գալովի է ոստիկանական ռեյդերի արդյունքում հյուրանոցներում մարմնավաճառներ հայտնաբերելը: Դեռ նոր էր լրատվական դաշտով պտույտ գործել այն սկանդալային տեղեկատվությունը, որ Ռուբեն Գեւորգյանին պատկանող հյուրանոցում հայտնաբերվել են մարմնավաճառներ, հիմա էլ նույնը տեղի ունեցավ ԲՀԿ խմբակցության անդամ ՄԵՐՈՒԺԱՆ ՍԻՄՈՆՅԱՆԻՆ պատկանող հյուրանոցային համալիրում, այն էլ` Սյունիքի մարզում: Ինչ-որ տեղ դա խորհրդանշական է, քանզի ԲՀԿ-ի ձախողումները կապված են այն հանգամանքի հետ, որ նրանց քաղաքական գծում, կներեք արտահայատության համար, բարդակ էր տիրում: Ինչեւէ, երեւի թե ժամանակն է, որպեսզի մարմնավաճառների ծառայություններից օգտվողները կառավարության շենքի մոտ ցույց անեն եւ պահանջեն, որ հյուրանոցատերերը հյուրանոցի ցուցանակի կողքը պարտադիր կարգով փակցնեն իրենց կուսակցական տոմսի պատճեն: Թե չէ, անհարմար բան է ստացվում` հայտնվում են "02-ի" տեսանյութերում, հետո էլ կինը` գրտնակը կամ թավան ձեռքին կազմ ու պատրաստ սպասում է:
Եվ վերջապես, մեզ զարմացրեց ԱԱԾ-ի պետի նախկին տեղակալ ԳՈՒՐԳԵՆ ԵՂԻԱԶԱՐՅԱՆԸ: Նա մեջբերելով Սողոմոնի մատանու գրությունը` "ոչինչ նույնը չի մնում", հայտարարեց. "Առաջիկայում ամեն ինչ կպարզվի, ու 10 օրից կկանգնենք նույն իրողությունների առջեւ, եւ առաջիկայում ԲՀԿ-ի ղեկավարությամբ կպայքարենք իշխանափոխության համար": Այն, ինչ ասում է Եղիազարյանը, այժմ նույնիսկ մանկապարտեզի երեխային չի կարող հավատ ներշնչել, եւ զարմանալով հանդերձ, մնում է հարցադրել` իսկ ի՞նչ է ծխել Եղիազարյանը` այդպիսի բան ասելուց առաջ:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ