«Աղանդավորական կազմակերպություններն ամբողջությամբ ֆինանսավորվում են եվրոպայից». Հասարակական գործիչ

«Աղանդավորական կազմակերպություններն ամբողջությամբ ֆինանսավորվում են եվրոպայից». Հասարակական գործիչ

Հայաստանի համար իսկական չարիք են դարձել աղանդները, որոնց նպատակը մեկն է` ոչնչացնել ազգային արժեքները եւ պառակտել մարդկանց միասնությունը: Աղանդների մի մասը ՀՀ տարածքում իր  քարոզչությունն  իրականացնում է անօրինական ճանապարհով: Դրանցից մեկն էլ «Եհովայի վկաներ» կոչվող աղանդն է, որն արդեն մի քանի ամիս է ինչ Երեւան քաղաքի մարդաշատ վայրերում աղանդավորական գրքեր է անվճար բաժանում մարդկանց, ինչն էլ «Ազգային արժեքների պահպանման ճակատ» ՀԿ նախագահ ՍԵՎԱՆ ԱՂԱՋԱՆՅԱՆԻ խոսքով`անօրինական է.

«ՀՀ Կրոնական կազմակերպությունների մասին օրենքը սահմանում է, որ կրոնական կազմակերպություններն իրավունք ունեն քարոզ իրականացնելու  իրենց կողմից նախատեսված վայրերում: Սակայն հասարակական վայրը չի հանդիսանում իրենց կողմից նախատեսված վայր: Հասարակական վայրում քարոզ ու ակցիա իրականացնելու համար պետք է քաղաքապետարանի կամ տվյալ վարչական շրջանի թույլտվությունը, տվյալ պարագայում եհովականներն այդ թույլտվությունը չունեն»,-նշեց Ս. Աղաջանյանը եւ ավելացրեց, որ այս խնդրի  պատճառով մի քանի անգամ բախվել են ոստիկանության հետ եւ հայտնվել  ոստիկանական բաժանմունքում.

«Եհովայի վկաների պատճառով մի քանի անագամ մեզ բաժին են հրավիրել, այն դեպքում, երբ օրենքը փաստացի խախտում են եհովայի վկաները: Վերջերս բաց նամակով դիմել ենք նաեւ ՀՀ ոստիկանապետին, որպեսզի իրավական գնահատական տան եհովայի վկաների քարոզչությանը»,-տեղեկացեց Սեւան Աղաջանյանը:

«Իրավունքի» այն հարցին, թե ինչո՞ւ  Է ոստիկանությունն ամեն կերպ աջակցում եհովայի վկաներին Ս. Աղաջանյանը պատասխանեց. «Իմ կարծիքով , պատճառը ամերիկյան լոբբիստների գործն է, Ամերիկայի դեսպանի գլխավորությամբ»:

Սոցիալիստական շարժում կուսակցության ղեկավար ՌՈԲԵՐՏ ԱՀԱՐՈՆՅԱՆԸ բոլորին հորդորեց սթափվել, քանի որ մարդիկ այսօր հայտնվել են անդունդի եզրին.

«Ես չգիտեմ, թե դեպի ուր ենք գնում: Պետք է վերջ տանք եվրոպական մոտեցումներին, որովհետեւ համոզված եմ, որ աղանդավորական կազմակերպություններն ամբողջությամբ ֆինանսավորվում են եվրոպայից»,-շեշտեց Ռ. Ահարոնյանը:

ԶՎԱՐԹ ԽԱՉԱՏՐՅԱՆ