"ՈՒԶՈՒՄ ԵՆ 100-ՐԴ ՏԱՐԵԼԻՑՆ ՕԳՏԱԳՈՐԾԵԼ ԻՇԽԱՆԱՓՈԽՈՒԹՅԱՆ ՀԱՄԱՐ"

"ՈՒԶՈՒՄ ԵՆ 100-ՐԴ ՏԱՐԵԼԻՑՆ ՕԳՏԱԳՈՐԾԵԼ
ԻՇԽԱՆԱՓՈԽՈՒԹՅԱՆ ՀԱՄԱՐ"

Ըստ բանաստեղծ ՌԱԶՄԻԿ ԴԱՎՈՅԱՆԻ` օրերս նախագահն իր կոշտ ու կտրուկ ելույթով ժողովրդին առաջարկում էր բարեգործական մուրացկանությունից տեղափոխվել արժանապատիվ աշխատանքի եւ բարեկեցիկ կյանքի: "Իրավունքի" հետ զրույցում բանաստեղծը համամիտ էր նախագահի այն խոսքին, որ քաղաքականությամբ պետք է զբաղվեն միայն քաղաքական գործիչները:

"ԲԱՐԵԳՈՐԾԱԿԱՆ ՄՈՒՐԱՑԿԱՆՈՒԹՅՈՒՆԸ
ԵՐԿՐԻ ՀԱՄԱՐ ԱՊԱԳԱ ՉԷ"

-Նախագահը պետությանը, ժողովրդին առաջարկում է բարեգործական մուրացկանությունից տեղափոխվել արժանապատիվ աշխատանքի եւ բարեկեցիկ կյանքի: Այսինքն` բարեգործական մուրացկանությունը երկրի համար ապագա չէ, եւ առաջարկում է, որ ամեն մարդ իր գործով զբաղվի, քաղաքական դաշտը մաքուր լինի քաղաքական գործիչների համար` ասպարեզը տրամադրված լինի քաղաքական գործիչներին:

"ԵՐԿՐԻ ՃԱԿԱՏԱԳԻՐԸ, ԵՐԿՐԻ ԲԱԽՏԸ ՉԵՆ ԿԱՐՈՂ ԱՅԴ ՏԵՍԱԿ ՄԱՐԴԻԿ ՏՆՕՐԻՆԵԼ"

-Այսինքն` քաղաքականությամբ միայն քաղաքական գործիչները պիտի զբաղվեն:
- Այո, մեզ մոտ, երբ ասում են ներքին քաղաքական զարգացումներ, նման բան գոյություն չունի: Քաղաքականություն ասվածը, բառի, այսպես ասած, ծանրակշիռ իմաստով, չունենք եւ չենք ունեցել մինչեւ այսօր, որովհետեւ քաղաքականությամբ զբաղվել են բոլորը անխտիր: Բոլորի նկատմամբ էլ հարգանքով կվերաբերվեմ, բայց երբ ձգտումը միայն դեպի իշխանություն է նրանց կողմից, ովքեր ժողովրդի հարստությունը սեփականել են եւ դրա վրա էլ հիմա շարունակում են ու հետն էլ ինչ-որ բարեգործությամբ են զբաղվում... Երկրի ճակատագիրը, երկրի բախտը չեն կարող այդ տեսակ մարդիկ տնօրինել: Իմ առաջարկը հետեւյալն է` եթե իսկապես ուզում են ժողովրդի համար լավ բան անել եւ ժողովրդին ասում են, թե քո բոլոր հոգսերը կհոգանք` դու  այնպես արա, որ իշխանությունը տան ինձ, ապա գոյություն ուներ ազգային սեփականություն, որը իրենք սեփականել են անհատապես: Իրենց այդ կուտակած հարստությունը թող ամբողջությամբ դնեն պետական տրամադրության տակ եւ պարտադրեն, որ դա ծառայի ժողովրդի շահերին, հավասարապես բաշխվի տնտեսության բոլոր ճյուղերում: Իսկ վերակացուները` վերահսկիչները, թող լինեն իրենք, որպեսզի այնտեղ չարաշահումներ չլինեն: Կապիտալիստական Անգլիան շատ ծանր վիճակի մեջ էր եւ չէր կարողանում դուրս գալ տնտեսական ճգնաժամից, բայց հաղթահարեց` բոլոր խոշոր տրեստներն ու սինդիկատները ազգայնացնելով. պետությունը վերցրեց դա, եւ Անգլիան դուրս եկավ ահավոր ճգնաժամից: Հիմա աշխարհի ամենազարգացած երկրներից մեկն է: Եթե իսկապես բարի կամք ունեն եւ իշխանությունը չէ, որ իրենց էդպես գայթակղում է, այլ ժողովրդի որոշակի բարելավումը, ես այս մոդելն եմ առաջարկում: Լիքը միլիարդատերեր ունենք, թող իրենց միլիարդները դնեն պետության տրամադրության տակ, այն ժամանակ այլեւս չեն խոսի արտաքին պարտքի մեծացման մասին: Միլիարդները դրել են իրենց տակ եւ խոսում են պետության արտաքին պարտքի մեծացման մասին, թե 3 միլիարդ պարտք ենք կուտակել. ո՞ւր են այդ փողերը: Այդ փողերը գնացել է այնտեղ, որտեղից դուք տարել եք ձեր միլիարդները:

"ԴՐԱՆՔ ԲԱՐՈՅԱԿԱՆ ԽՆԴԻՐՆԵՐ ԵՆ"

-100-րդ տարելիցն է մոտենում, լարված տարի է, շատերն ասում են` պիտի այս շրջանում չլիներ նման խոսակցություն:
- Դրանք բարոյական խնդիրներ են, չեմ կարծում, թե հանրապետության նախագահը, որ ամբողջ աշխարհը շարժեց Հայոց ցեղասպանության խնդրի շուրջ եւ ինքը 100-րդ տարելիցը նշելու կամք է ցուցաբերում` նման մասշտաբային ձեւով, հաշվի առած չլինի այդ հանգամանքը: Եթե այսօր այդ խնդիրները սրվել են այնքան, որ ուզում են 100-րդ տարելիցն օգտագործել իշխանափոխության համար, այդ իրավունքը չի վերապահվում նրանց: Իսկ հանրապետության նախագահն էլ իսկապես ազգային մարդ է, պետական խոշոր մտածողություն ունի, ապահովել է մեր երկրի համար կշիռ` արտաքին աշխարհում: Թույլ պիտի չտա օրենքով եւ թույլ էլ չի տալիս:

"ՄԵՐ ԺՈՂՈՎՈՒՐԴԸ ԻՐ ՇԱՀԻ ԳԻՏԱԿՑՈՒՄԸ ՉՈՒՆԻ"

-Արդեն խոսվում է առաջիկայում հանրահավաքի, նստացույցի մասին, մտավախություն չկա՞, որ մայդանի ու Մարտի 1-ի կվերածվի:
- Ճիշտ է, գտնում եմ, որ այդպիսի ելույթ ունեցողը եւ հայտարարություն անողը պետք է որ նախապատրաստված լինի բոլոր տեսակի խնդիրների համար, բայց միաժամանակ թեթեւ մտավախություն կա մեջս, որ մեր ժողովուրդը իր շահի գիտակցումը չունի: Չի ունեցել էն գլխից` անկախությունից ի վեր` նախագահներ, պատգամավորներ ընտրելիս, եւ հիմա էլ կարող է այդպես մակերեսային ձեւով, խոստումների հետեւից վազելով` դուրս գա հրապարակ: Բայց, տա Աստված, որ սադրանքներից հեռու մնան եւ զուր տեղը բաներ չանեն: Երբ ժողովրդին ասում ես` այս հարստությունը նրանց որտեղի՞ց է կուտակվել, ասում են` դե, փշրանքները տալիս են մեզ: Մեր ժողովուրդը սովորել է, էլի, մուրացկանությանը: Ըստ էության, տխուր է վիճակը, հուսամ, որ առողջ տրամաբանությունը եւ բանականությունը որոշ չափով կօգնի, որպեսզի նրանք հեռու մնան այդ տեսակ սադրանքներից: Մեր պետությունը կազմավորման շրջանում է, մեր  գլխավոր գործը մեր հայրենիքը, Ղարաբաղի անկախությունը պաշտպանելն է: Իսկ մնացածը, ինչ-որ առաջնահերթություններ է հռչակել հանրապետության նախագահը` գյուղատնտեսությունը, գյուղացիական, աշխատավորական դասակարգը վերականգնելը, շատ կարեւոր խնդիրներ են: Էլի եմ կրկնում, թող բերեն ու այդ ամբողջ հարստությունը դնեն, գյուղը վերականգնեն, էլ ո՞վ դրսից արտաքին պարտքի մասին կմտածի: Ոչ թե ասեն` իշխանությունն էլ տվեք, մնացածը ձեր գործը չէ:

Զրույցը` ԼԻԼԻԹ ԵՂԻԱԶԱՐՅԱՆԻ