"ԳՈՐԻՍԻ ԲԵՐԴՆ Է ՍԱՐՔԵԼ ԳՅՈՒՄՐՈՒ ՔԱՂԱՔԱՊԵՏԱՐԱՆԸ"

"ԳՈՐԻՍԻ ԲԵՐԴՆ Է ՍԱՐՔԵԼ ԳՅՈՒՄՐՈՒ ՔԱՂԱՔԱՊԵՏԱՐԱՆԸ"

Ըստ տարածված լուրերի` օրերս կայացած եռյակի լիդերների հանդիպման ժամանակ "Ժառանգության" լիդեր Րաֆֆի Հովհաննիսյանն առաջարկել է "հեղափոխությունը" սկսել Գյումրիից, ինչին միանշանակ դեմ է արտահայտվել ՀԱԿ-ի ղեկավարըª Լեւոն Տեր-Պետրոսյանը, թե հայտնի ողբերգական դեպքերից հետո դա կլինի կոպիտ սխալ: Բայց ինչո՞ւ էր Րաֆֆիին թվում, թե Հայաստանում հնարավոր է "գունավոր հեղափոխություն" սկսել հենց Գյումրիից. այնտեղի ռուսական ռազմաբազա՞ն է նման վստահություն ներշնչել, թե՞ մտածում է, որ գյումրեցիներն "ամենահեղափոխականն" են ողջ Հայաստանում: Այս հարցի պատասխանը փորձեցինք ստանալ Գյումրիի նախկին քաղաքապետ ՎԱՐԴԱՆ ՂՈՒԿԱՍՅԱՆԸ:
-Այն, որ գյումրեցիները հեղափոխական են, դա փաստ է, բայց ոչ բառիս ներկայիս իմաստով: Ոչ մի "հեղափոխություն" էլ չի լինելու: Չեմ կարծում, որ որեւէ մեկին կհաջողվի "հեղափոխություն" անել, որովհետեւª "գայլը սարի հետեւում է" (ծիծաղում է- Ի. Ա.): Չի կարող "հեղափոխություն" լինել, որովհետեւ դա ազգն առնվազն տասը տարով հետ է տանում, իսկ ես դրան դեմ եմ: Ես ընդհանրապես դեմ եմ ցնցումներին, մայդաններին, այս փոքրիկ ազգին նման բաներ պետք չեն: Ընդհակառակը, մենք պետք է համախմբվենք, ոչ թե աթոռակռիվ անենք: Ես դեմ եմ, որ հանկարծակի ինչ-որ բախումներ լինեն, լուրջ ցնցումներ լինեն, բոլորն էլ հայ են, մեր հայ ժողովուրդն է:
Կամ ինչի համար են ուզում "հեղափոխություն" կամ ցույց անեն, էն, որ երկու տարի անընդմեջ իրենց հեռուստաեթերներով ում ինչ անուն ասես` կպցնում էին` էլ Վարդանիկ, էլ Լիսկա, ում ինչ անուն ասես` տվեցին, մի անգամ, եւ որ իրենց մի բան ասեցին, էդ ինչի՞ են խառնվել իրար: Երկու տարի վեց ամիս ես իրենց հեռուստատեսության եթերներից անպակաս էի լինում, խոսում էին մի մարդու մասին, ում հետեւից գնում է մի ողջ քաղաքի ժողովուրդ: Իրենց ԲՀԿ-ականին բերեցին, գումարներով ու կեղծիքներով դրեցին քաղաքապետ, բա իրենց դեմոկրատիան որտե՞ղ էր... Բայց էսքանից հետո ես էլի ասում եմª խաղաղություն, խաղաղություն, որ ոչ մի հայի մազն անգամ չընկնի:
- Հիշեցրիք, որ քաղաքապետի ընտրություններից հետո Գյումրին անցավ ԲՀԿ-ական քաղաքապետի ղեկավարության ներքո: Որպես գյումրեցի եւ ոչ թե որպես նախկին քաղաքապետ, այսինքնª սեփական անձը մի կողմ թողնելով, ազնվորեն կասե՞ք, թե դա լավ կամ վատ առումով ի՞նչ տվեց Գյումրիին:
- Նախ, ի՞նչ ընտրություն, ինչի՞, ընտրություն եղե՞լ է այստեղ, նա պարզապես նշանակվել է: Էդ ընտրությունների ժամանակ, չնայած ես թեկնածությունս չէի դրել, բայց բազում քվեաթերթիկների վրա գրված է եղել Վարդան Ղուկասյան: Ես մի բան գիտեմ, որ ես Գյումրու քաղաքապետ եմ եղել տասներեք տարի եւ ոչ մի անգամ ոչ փող բաժանելով եմ անցել, ոչ էլ կեղծիքներով...
Ինչ վերաբերում է փոփոխություններին, ապա Գյումրիում ոչինչ չփոխվեց: Ընդհակառակը, ոչ մի ներդրում չարվեց, փոքր եւ միջին բիզնեսը չխթանվեց, մարդիկ աշխատանք չունեն: Եկեք ինքներդ տեսեք, ներդրողները փողոցներում կանգնած սպասում են, թե երբ պետք է Վարդան Ղուկասյանը դուրս գա, որ գան ներդրում անեն: Մենակ գազալցակայաններ են բացում, ուրիշ ոչ մի բան: Էն էլ լոկ նրա համար, որ ես գազալցակայան ունեմ: Էլ էդ մարդու հետ ինչ խոսես... Ուղղակի նրան պետք է հիշեցնենք, որ իրականում նա քաղաքապետ է, ով մոտ 40 մլն դրամ արժողությամբ կիսափչացած շատրվաններով ուրախանալուց բացի, պարտավոր է հոգալ տեղի բնակիչների խնդիրների մասին եւ կարգավորել քաղաքում ստեղծված անհասկանալի իրավիճակները:
- Դուք նշեցիք, որ գյումրեցիները հանդուրժող չեն: Ինչո՞ւ չեն պահանջում քաղաքապետից, որ քաղաքի խնդիրներով զբաղվի:
- Ինքը ե՞րբ է Գյումրիում լինում, որ գյումրեցին էլ պահանջի, ինքը Հոլանդիա է գնում. գոնե մի նորմալ երկրի հետ կապ պահպաներ, էդտեղ էլ խայտառակ էղանք: Գյումրեցիները տանել չեն կարողանում դրան, եկեք տեսեք, թե ինչ անեծքի տակ է: Մարդը երկու տարի վեց ամիս նստել է ու մի հատ ընդունելություն չի կազմակերպել, երեսուն-քառասուն հոգով հսկում են շենքը, մարդ են թողնո՞ւմ, որ մտնի քաղաքապետարան, Գորիսի բերդն է սարքել Գյումրու քաղաքապետարանը:  

ԻԼՈՆԱ ԱԶԱՐՅԱՆ