«ԳՈՆԵ ՀԱՅՈՑ ՑԵՂԱՍՊԱՆՈՒԹՅԱՆ ՀԱՐՑՈՒՄ ԲՈԼՈՐԸ ՊԻՏԻ ՄԻԱՍՆԱԿԱՆ ԼԻՆԵՆ»

«ԳՈՆԵ ՀԱՅՈՑ ՑԵՂԱՍՊԱՆՈՒԹՅԱՆ ՀԱՐՑՈՒՄ ԲՈԼՈՐԸ ՊԻՏԻ ՄԻԱՍՆԱԿԱՆ ԼԻՆԵՆ»

ԱԺ ՀՀԿ խմբակցության պատգամավոր, ՀՀԿ փոխնախագահ ՌԱԶՄԻԿ ԶՈՀՐԱԲՅԱՆԻ հետ հարցազրույցի սկիզբը կարդացե՛ք ստորեւ տեղադրված հղումով:

«ՈՒԶՈՒՄ ԵՔ ՔԱՈ՞Ս ՍՏԵՂԾԵԼ` ՄԻՆՉԵՎ ՑԵՂԱՍՊԱՆՈՒԹՅԱՆ
100-ՐԴ ՏԱՐԵԼԻՑԸ»

- Պարոն Զոհրաբյան, չե՞ք կարծում, որ ներքին որոշակի ուժեր 100-րդ տարելիցին ընդառաջ` ինչ-որ ուղղորդված սադրանքներ են իրականացնում` սկսած Ժիրայր Սէֆիլյանի «100-ամյակն առանց ռեժիմի» նախաձեռնությունից մինչեւ քաղաքական նման մեծ ու փոքր շոոուները:

- Թուրքիան ձեռք ու ոտք է ընկել եւ տասնյակ միլիոններ է ծախսում, որպեսզի կարողանա արժեզրկել Հայոց ցեղասպանության 100-րդ տարելիցի միջոցառումները: Հենց նույն Ժիրայր Սէֆիլյանի «100-ամյակն առանց ռեժիմի» շարժումը նպաստում է թուրքերի ջրաղացին ջուր լցնելուն: Նրանք ասում են` տեսե՛ք, դուք ասում եք մենք վատն ենք, բայց դուք մեզնից վատն եք, քանի որ ձեզ մոտ կան քաղաքական ուժեր, հասարակության որոշակի շրջանակներ, ովքեր ձեզ ասում են հեռացե՛ք: Անդրադառնամ նաեւ ընդդիմության նախաձեռնած հանրահավաքներին. Ցեղասպանության 100-ամյակին մնացել է ընդամենը ամիսուկես, չէ՞ որ Թուրքիան միջազգային արենայում օգտագործելու է սա մեր դեմ, թե տեսեք` իրենք իրենց ներսում չեն կարողանում կառավարել, իրենց հասարակությունը համաձայն չէ իշխանությունների հետ, մինչդեռ համահայկական հռչակագիր են ներկայացնում: Չեմ ասում, թե թուրքական գործակալներն այստեղ շատ են, բայց նրանք իրենց միջնորդավորված գործակալների միջոցով, որովհետեւ կան նաեւ իրենց բարեկամ-դաշնակից պետությունների գործակալներ, մարդկանց, քաղաքական ուժերի դրդում են ոտքի կանգնել: Սա շատ բարդ գործընթաց է, որը միանգամից չի երեւում: Բայց արդյունքը տեսանելի է. Սէֆիլյանը թույլ էր, չկարողացավ, ու հիմա ընդդիմությունն է փորձում: Բա ամոթ չէ՞, 100-րդ տարելիցի նախաշեմին բարձրացնել իշխանափոխության, արտահերթ ընտրությունների հարց: Ուզում եք քաո՞ս ստեղծել` մինչեւ Ցեղասպանության 100-րդ տարելիցը:

«ԼԵՎՈՆ ՏԵՐ-ՊԵՏՐՈՍՅԱՆԻՆ
ՉԵՄ ՀԱՄԱՐՈՒՄ ՔԱՂԱՔԱԿԱՆ ԳՈՐԾԻՉ»

-Ի դեպ, քանի որ անդրադարձաք Հայոց ցեղասպանության 100-րդ տարելիցի համահայկական հռչակագրին` նշեմ, որ ՀՀ առաջին նախագահ Լեւոն Տեր-Պետրոսյանը հակասահմանադրական է համարել ողջ հայության անունից հռչակագիր հրապարակելը...
- Բնական է, որ Լեւոն Տեր-Պետրոսյանը` որպես ընդդիմություն, քանի որ ինքը չի այդ հռչակագիրը կարդացել, պիտի նման բաներ խոսի: 1990 թվականին նա նույնիսկ դեմ էր, որ անկախության հռչակագրում Ցեղասպանության մասին նշում լիներ, մի կերպ դա մտցվեց, որն այսօր, որպես իրավական հիմք, օգտագործում ենք, ուր մնաց, թե սրան համաձայնի: Երբ քաղաքական գործիչը ընդդիմադիր դիրքերից ելնելով` նսեմացնում է ամեն ինչ, նա այլեւս գործիչ չէ: Չեմ համարում Լեւոն Տեր-Պետրոսյանին քաղաքական գործիչ, նա խանդ, թշնամություն է առաջարկում հասարակությանը: Ամոթալի երեւույթ է փրփուրներից կառչելը: Ինչ վերաբերում է հռչակագրին` այո, այն համազգային է, որովհետեւ համաձայնեցված է Սփյուռքի բոլոր կառույցների հետ: Եվ, իհարկե, այն պետք է հրապարակեր Հայաստանի Հանրապետությունը` որպես իրավական, ժողովրդավարական, ճանաչված անկախ պետություն: Եվ այս դեպքում, անկախ պետությունն է հայտարարում պահանջատիրության, Հայ դատի եւ Ցեղասպանությունը ճանաչելու մասին, իսկ արդյունքում փուլ առ փուլ գնալու ենք Թուրքիայի ապօրինի գրաված տարածքները հետ վերադարձնելու, ապօրինի պայմանագրերը հերքելու ուղղությամբ: Ինչեւէ, գոնե Ցեղասպանության հարցում բոլորը պիտի միասնական լինեն:
- Հենց Հայոց ցեղասպանության հարցում միասնական լինելու գաղափարին է միտված ՍԻՄ կուսակցության նախաձեռնությունը, որով առաջարկվել է փետրվարի 15-ից մինչեւ ապրիլի 24-ը ընդունել որպես Ազգային միասնության օրեր:
- Լիովին ճիշտ գաղափար է, անձամբ համաձայն եմ: Հանրապետական կուսակցության անունից չեմ կարող ասել, որովհետեւ պետք է քննարկենք, բայց կարծում եմ, որ մենք կողմ կլինենք նման հայտարարությանը: Իսկապես կան վտանգներ, որ թուրքական քարոզչությունը հենց ներսում որոշ ուժերի միջոցով փորձում է նսեմացնել ու փչացնել 100-րդ տարելիցին նվիված միջոցառումները:

ՀՐԱՆՏ ՍԱՐԱՖՅԱՆ

Հ.Գ.- Հարցազրույցի սկիզբը կարդացե՛ք այստեղ`

http://iravunk.com/index.php?option=com_content&view=article&id=24090%3A2012-04-04-19-36-17&catid=48%3Ahandipum&Itemid=114