"ԵՎՐԱՏԵՍԻԼՈՒՄ". ԱՆՄՈՌՈՒԿԻ ՄԵԿ ԹԵՐԹԻԿԸ ԿԼԻՆԻ ԵՍԱՅԻ ԱԼԹՈՒՆՅԱՆԸ

"ԵՎՐԱՏԵՍԻԼՈՒՄ". ԱՆՄՈՌՈՒԿԻ ՄԵԿ ԹԵՐԹԻԿԸ ԿԼԻՆԻ ԵՍԱՅԻ ԱԼԹՈՒՆՅԱՆԸ

Օրերս "Իրավունքը" տեղեկացրել էր, որ "Եվրատեսիլ-2015"-ին` երաժշտական հեղինակավոր 60-րդ մրցույթին, Հայաստանն այս տարի կներկայանա նոր ձեւաչափով ու նոր խմբով: Ավելին` հավատարիմ մնալով մրցույթի այս տարվա "Կառուցելով կամուրջներ" նշանաբանին, ոգեշնչվելով Հայոց ցեղասպանության 100-ամյա տարելիցի խորհրդանիշ անմոռուկի գաղափարով, ինչպես նաեւ առաջնորդվելով բազմաթիվ սփյուռքահայերի ցանկությամբ, ովքեր միշտ եղել են եվրատեսիլյան պատվիրակների կողքին, Հանրային հեռուստաընկերության ստեղծագործական խումբը որոշել է մրցույթին ներկայացնել նոր ձեւաչափ.
"Կարեւորելով խաղաղության, միասնության եւ հանդուրժողականության գաղափարը` որոշվել է այս տարի համախմբել 1915-ին աշխարհի 5 աշխարհամասերում` Եվրոպայում, Ասիայում, Ամերիկայում, Աֆրիկայում, Ավստրալիայում սփռված հայ ժողովրդի նոր սերնդին: Խմբում ծագումով հայ 5 երգիչներ են, որոնք զուգակցվում են անմոռուկի 5 թերթիկների հետ: Նրանց կմիանա եւս մեկ մասնակից Հայաստանից, որը կհամախմբի թերթիկները: Հատուկ մրցույթի համար ձեւավորվելիք խումբը կկրի Genealogy անվանումը` 6 արտիստ, 6 ճակատագիր, 1 պատմություն: Իսկ երգը վերնագրված է "Don't deny"` "Մի՛ ժխտիր"". "Իրավունքին" այդ մասին տեղեկացրել էր "Եվրատեսիլի" հայաստանյան պատվիրակության ղեկավար ԳՈՀԱՐ ԳԱՍՊԱՐՅԱՆՆ ու խոստացել, որ փետրվարի 16-ին կբացվի անմոռուկի մեկ թերթիկը, այսինքն` պարզ կդառնա մրցույթի համար հատուկ կազմավորվող Genealogy անվանումով խմբի մեկ մասնակցի անունը:
Երեկ արդեն պարզվեց նորաստեղծ Genealogy խմբի 6 մասնակիցներից մեկի անունը` Եվրոպա աշխարհամասը ներկայացնող ֆրանսահայ ճանաչված երգիչ, երգահան, դաշնակահար եւ դերասան ԵՍԱՅԻ ԱԼԹՈՒՆՅԱՆԸ, ում համար երաժշտությունը մարդկանց եւ նրանց սրտերը միավորելու միջոց է, խաղաղության կոչ:
Ինչպես "Իրավունքին" ավելի վաղ տեղեկացրել էր Գ. Գասպարյանը, մասնակիցներին կոնկրետ ընտրել են ըստ նրանց վոկալային եւ արտաքին տվյալների եւ, իհարկե, հաշվի առել ամենակարեւորը` ըստ նրանց ճակատագրի ու պատմության. "Նրանցից յուրաքանչյուրն ունի պատմություն, ճակատագիր, ինչն էլ միավորում է նրանց: Մի խոսքով, նույնն են նրանց տատերի ու պապերի ճակատագրերը":
Եվ ահա, Եսայի Ալթունյանը ունենալով հայկական ծագում եւ արմատներ` իր երաժշտական առաջին քայլերը կատարել է Ֆրանսիայում: Եսային մեծացել է Հայոց ցեղասպանության մասին պատմությունների ներքո, նրա պապն անգամ գիրք է հրատարակել "Անապատի երեխան" վերնագրով, որպեսզի երբեք չմոռանա իր եւ 1915 թվականին հայ ժողովրդի հետ կատարվածը: Եսայիի տատիկն ու պապիկը փախուստի են դիմել Խարբերդից` Հայոց ցեղասպանության ժամանակ: Հինգ տարեկանում նրա պապը` Նշանը, փախել է Դեր-Զորի անապատից, երբ իր աչքի առաջ սպանել են իր մորն ու քույրերին: Նրան անապատում գտել են արաբ վերաբնակները եւ որոշել են խնամել: 18 տարեկանում նա պատահաբար հանդիպել է իր ազգականներից մեկին եւ տեղափոխվել Ֆրանսիա: Եսային հավատում է, որ հիմա իր ժամանակն է` խոսելու եւ երգելու պատմության այս ողբերգական ժամանակահատվածի մասին: Ֆրանսահայ երգչին շատ են մտահոգում իր պապի պատմությունները: 2015-ին` Հայոց ցեղասպանության 100-ամյա տարելիցի հետ կապված, օրերս թողարկեց իր "Je n'oublie pas" ("Չեմ մոռանա") երգը:

ԼԻԼԻԹ ԵՂԻԱԶԱՐՅԱՆ


Ի ԴԵՊ.
12 տարեկանում Եսային գրել է իր առաջին երգը, իսկ 19-ում պայմանագիր ստորագրել Sony France-ի հետ` որպես "Ideal-3" քաղաքային փոփ խմբի հիմնական կատարող: Խումբը, ընդգրկվելով "Pardonne-moi"-ի լավագույն տասնյակում, հնչում էր ֆրանսիական բոլոր խոշոր ռադիոալիքներով: 21 տարեկանում լքեց խումբն ու պայմանագիր ստորագրեց Mercury Universal-ի հետ: Որպես մենակատար` սկսեց առաջարկներ եւ հրավերներ ստանալ հեռուստատեսային հաղորդումներից: Հայտնվելով երաժշտական "Romeo and Juliet" կատակերգության մեջ` Եսային գերեց բազմաթիվ հանդիսատեսների սրտերը Ֆրանսիայում, Բելգիայում եւ Շվեյցարիայում: Շոուի ձայներիզը վաճառվեց ավելի քան 2 միլիոն օրինակով: Եսային համագործակցել է Միշել Լեգրանի հետ: Նրանք համատեղ 25 երգ են թողարկել "Les Demoiselles de Rochefort"-ի համար, հաջողությամբ Փարիզում ներկայացել Palais des Congres-ին: Այնուհետեւ նա գրել է "Saimer est interdit"-ը Warner Music France- ի հայտնի "Le Roi Soleil" կատակերգության համար: Այդ ձայներիզը երկու անգամ Platinum է դարձել` վաճառելով ավելի քան 3 մլն տոմս` իր գործունեության 3 տարիների ընթացքում: 2012-ին երգչուհի Էմմիի հետ զուգերգով հանդես եկան "Էրեբունի-Երեւան" երգով, որի հիման վրա նկարահանեցին նաեւ տեսահոլովակ: