ԲՀԿ ՊԱՏԳԱՄԱՎՈՐԸ Ո՛Չ ՀԵՐՔԵՑ, Ո՛Չ ՀԱՍՏԱՏԵՑ ՔՈՉԱՐՅԱՆԻ ԴԵՐԱԿԱՏԱՐՈՒԹՅՈՒՆԸ...

ԲՀԿ  ՊԱՏԳԱՄԱՎՈՐԸ Ո՛Չ ՀԵՐՔԵՑ, Ո՛Չ ՀԱՍՏԱՏԵՑ

ՔՈՉԱՐՅԱՆԻ ԴԵՐԱԿԱՏԱՐՈՒԹՅՈՒՆԸ...

Այսօր լրագրողների հետ զրույցում ԲՀԿ պատգամավոր Միքայել Մելքումյանը ո՛չ հերքեց, ո՛չ հաստատեց այն լուրերը, թե ՀՀԿ-ԲՀԿ հակամարտության ֆոնին ՀՀ նախկին նախագահ Ռոբերտ Քոչարյանը գաղտնի սատարում է ԲՀԿ-ին: ԲՀԿ պատգամավորը նախ  նախկին նախագահի գովքն արեց (հավանաբար, պրն Մելքումյանը հիշեց նաեւ իր երանելի տարիները` 1998-1999թթ.՝ ՀՀ կապի նախարարի գլխավոր խորհրդականի, 1999-2000թթ.՝ ՀՀ սոցիալական ապահովության նախարարության աշխատակազմի ղեկավարի, 2000-2004թթ.` ՀՀ պետական գույքի կառավարման նախարարի տեղակալի պաշտոնները- խմբ.), նրան համարելով մեր պետականաշինության մեջ  լուրջ դերակատարություն ունեցող  անհատ, ապա ասաց, որ  տեղեկություն չունի` արդյոք այս լարված իրավիճակին  նախկին նախագահը մասնակցություն ունի՞, թե ոչ:

Ինչ վերաբերում է  ԲՀԿ  քաղխորհրդում ԲՀԿ առաջնորդ Գագիկ Ծառուկյանի ելույթին,  Միքայել Մելքումյանն ասաց, որ  ԲՀԿ առաջնորդն առանց թղթի է ելույթ ունեցել. «Ես նստած էի առաջին շարքում եւ կարող եմ ասել, որ դա  Գագիկ Ծառուկյանի հաջողված ելույթներից էր»:

Հարցին, թե արդյո՞ք ԲՀԿ-ից գործարար հատվածը դուրս կգա, կամ, ինչպես ասում են`առնետավազք կլինի,  պատգամավորը բացասական պատասխանեց:

ՍՈՆԱ ԴԱՎԹՅԱՆ