«ԺԱՌԱՆԳՈՒԹՅՈՒՆԸ» ՄԻ ԳՆԴԱԿՈՎ ԵՐԿՈՒ ՆԱՊԱՍՏԱԿ Է ՓՈՐՁՈՒՄ ՈՐՍԱԼ

«ԺԱՌԱՆԳՈՒԹՅՈՒՆԸ» ՄԻ ԳՆԴԱԿՈՎ ԵՐԿՈՒ ՆԱՊԱՍՏԱԿ

Է ՓՈՐՁՈՒՄ ՈՐՍԱԼ

Իշխանությունից ու «եռյակ»-ից բացի` Հայաստանի քաղաքական դաշտում  կարծես թե ձեւավորվում է նոր քաղաքական ուժ: Այս մասին այսօր պարզ դարձավ ԱԻՄ առաջնորդ Պարույր Հայրիկյանի մամլո ասուլիսից: Նրա խոսքով` ԱԻՄ-ը վեց կուսակցությունների` «Ժառանգության», ՀՀՇ-ի, «Պահպանողական կուսակցության», «Հիմնադիր խորհրդարանի»,  «Ժողովրդավարական հայրենիք»  եւ «Ազատ դեմոկրատների» հետ հանդիպումներ է ունենում, բայց դեռ վաղ է խոսել նոր ձեւավորվող բեւեռի մասին: «Սրանք ընդամենը հանդիպումներ են»,- հստակեցնում է Հայրիկյանը:

Անդրադառնալով ներքաղաքական լարված իրավիճակին` ՀՀԿ-ԲՀԿ հակամարտությանը, ԱԻՄ առաջնորդը վստահ է, որ այդ ամենը կապ չունի Հայաստանի անկախության ու այն պահպանելու հետ. « Բացի այդ` ՀՀԿ-ԲՀԿ տարիներ շարունակ նույն թիմում են աշխատել: Այսինքն` ընդհանրություններն ավելի շատ են»:

Ինչ վերաբերում է «եռյակին»` ՀԱԿ-ին, ԲՀԿ-ին ու «Ժառանգությանը», ապա այն հականկախական միավոր է, սակայն «Ժառանգությունը» այդ կազմում, ըստ Հայրիկյանի, ընդգրկվել է, որովհետեւ մտածում է`կարող է ինչ-որ բան փոխել երկրում. «Դուք կարծում եք`«եռյակ»-ում «Ժառանգության» առաջնորդ Րաֆֆի Հովհաննիսյանը սատարում է ինչ-որ մեկի՞ն: Նա հետապնդում է իր շահերն ու նպատակները, ունի իր հավակնությունները, պաշտպանում է իր սկզբունքները»:

Հ.Գ. փաստորեն, դատելով ԱԻՄ առաջնորդի  խոսքերից`«Ժառանգությունն» ու նրա առաջնորդը կարծես թե փորձում է մի գնդակով երկու նապաստակ որսալ` իրենց սպասումները չեն արդարանա եռյակի կազմում ԲՀԿ-ի հետ, կփորձի վեց կուսակցությունների հետ համագործակցելով` մեկ այլ բեւեռ ստեղծել:

ՍՈՆԱ ԴԱՎԹՅԱՆ