ԱՐԹՈՒՐ ԱԲՐԱՀԱՄ-ՓՈԼ ՍՄԻԹ ՄԵՆԱՄԱՐՏԸ ՍԿՍՎԵԼ Է ՌԻՆԳԻՑ ԴՈՒՐՍ

ԱՐԹՈՒՐ ԱԲՐԱՀԱՄ-ՓՈԼ ՍՄԻԹ ՄԵՆԱՄԱՐՏԸ ՍԿՍՎԵԼ Է ՌԻՆԳԻՑ ԴՈՒՐՍ

Պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն ԱՐԹՈՒՐ ԱԲՐԱՀԱՄԸ պատրաստվում է փետրվարի 21-ին Բեռլինի "O2 World" մազապալատաում կայանալիք բրիտանացի Փոլ Սմիթի դեմ ռեւանշ մենամարտին: Իսկ մինչ ռինգ դուրս գալը, բռնցքամարտիկների միջեւ սկսվել է հեռակա մենամարտ:
Բռնցքամարտիկներն արդեն մեկ անգամ հանդիպել են նախորդ տարվա սեպտեմբերին: Այդ մենամարտում Աբրահամը հաղթել էր մրցակցինª մրցավարների միաձայն որոշմամբ, ինչը դժգոհություն էր առաջացրել Սմիթի եւ նրա երկրպագուների շրջանում: Այս դժգոհություններին պատասխանելովª հայ բռնցքամարտիկը հստակ հայտարարեց, որ նոկաուտի կենթարկի մրցակցին. "Այս անգամ նոկաուտի կենթարկեմ Սմիթին, որպեսզի այլեւս չմնան վիճելի հարցեր: Հիմա արդեն շատ ավելի լավ գիտեմ նրա թույլ եւ ուժեղ կողմերը, եւ իմ մարտավարությունը մշակվում է` ելնելով դրանից",- "Իրավունքի" հետ զրույցում նշել է Արթուր Աբրահամը:
Նմանօրինակ վստահ հայտարարություններն անտարբեր չթողեցին նաեւ Փոլ Սմիթին, ով հանդես եկավ պատասխան հայտարարությամբ. "Առաջին մենամարտում դուրս եկա ռինգª կարծելով, որ կհաղթեմ: Այս անգամ ռինգ եմ դուրս գալու` իմանալով, որ կջաղջախեմ նրան: Ես շատ վստահ եմ ինձ վրա: Ես գիտեմ, թե ինչպիսին եմ հիմա եւ 100 տոկոս ինքնավստահություն ունեմ: Այս անգամ մրցակիցը չի կարողանա հույսը դնել մրցավարների վրա: Գիտեմ, որ նա լավ է պատրաստվել, եւ ես` ինքս էլ, պատրաստ եմ արժանիորեն դիմակայել նրան: Ես հիմա տեխնիկապես ավելի լավ եմ պատրաստված, քան անցած անգամ: Առաջին մարտն ինձ համար հնարավորություն էր` համոզվելու, որ ես համաշխարհային մակարդակի վրա եմ",- Սմիթի խոսքերն է մեջբերում Boxing scene-ը:
Դե, իսկ Արթուր Աբրահամը շարունակելով վստահ լինել իր հաղթանակի վրա` մրցակցի մեղադրանքներին պատասխանել է այսպես. "Մտադիր եմ նոկաուտով հաղթել Փոլ Սմիթին, որպեսզի հաղթանակի մասին որոշման պատասխանատվությունը վերցնեմ մրցավարներից: Ես ցանկանում եմ բոլորին հստակ ցույց տալ, թե ով է չեմպիոնը: Փոլ Սմիթը լավ ելույթ ունեցավ առաջին մենամարտում, բայց ես ավելի լավն էի: Ես չեմ հասկանում, թե ինչու է նա բրիտանական լրատվամիջոցներում խոսում մրցավարական սխալի մասին: Մրցավարներին նշանակում է ֆեդերացիան: Մրցավարը բազմամյա պատրաստություն է անցնում եւ միայն լավ դրսեւորվելուց ու համբավ ձեռք բերելուց հետո ստանում է չեմպիոնական տիտղոսի մենամարտ սպասարկելու իրավունք: Ես անհանգստություն չունեմ: Մրցավարներից պատասխանատվությունը վերցնելու միակ միջոցը նոկաուտով հաղթելն է: Դա ավելի է մոտիվացնում ինձ: Ես խոստանում եմ, որ Սմիթը չի դիմանա մինչեւ 12-րդ ռաունդը",- Աբրահամի խոսքը մեջբերում է Boxing Scene-ը:

ՔՐԻՍՏԻՆԵ ՊԵՏՐՈՍՅԱՆ