ԱՎԱՐՏՎԵԼ Է ՀԿԵ-Ի ՈՒՍՈՒՑՄԱՆ ՃԱՆԱՊԱՐՀԱՅԻՆ ԿԵՆՏՐՈՆԻ ՈՒՍՈՒՄՆԱԿԱՆ ՎԱԳՈՆ-ՏՐԻՆԱԺՈՐԻ ԱՐԴԻԱԿԱՆԱՑՈՒՄԸ

ԱՎԱՐՏՎԵԼ Է ՀԿԵ-Ի ՈՒՍՈՒՑՄԱՆ ՃԱՆԱՊԱՐՀԱՅԻՆ ԿԵՆՏՐՈՆԻ
ՈՒՍՈՒՄՆԱԿԱՆ ՎԱԳՈՆ-ՏՐԻՆԱԺՈՐԻ ԱՐԴԻԱԿԱՆԱՑՈՒՄԸ

Երկաթուղայինի մասնագիտությունն ընտրողներն այսուհետ մասնագիտության նրբությունները գործնականորեն առավել դյուրին կարող են յուրացնել Երեւանում գտնվող Ուսուցման ճանապարհային կենտրոնում, որտեղ ստեղծվել է նաեւ նոր ուսումնատեխնիկական հրապարակ: Այս տարի կատարալեգործվել է ուսումնական կենտրոնի վագոն-տրինաժորի վիդեոհամակարգը, որը մեքենավարներին թույլ է տալիս ավելի անսխալ վարել երկաթուղին: Մի խոսքով, երկաթուղայինի պատասխանատու մասնագիտությունը սերտողներն այստեղ կարող են գործնականորեն շփվել ու պատկերացում կազմել իրենց ընտրած մասնագիտության բոլոր կողմերի վերաբերյալ:
Այսպիսովª ավարտվել է Հարավկովկասյան երկաթուղու Ուսուցանման ճանապարհային կենտրոնի ուսումնական վագոնի արդիականացումը: Այլ խոսքով, ՀԿԵ-ն շարունակում է 2010 թվականին երկաթուղու աշխատողների ունակությունների եւ գիտելիքների կատարելագործման համար բացված Ուսուցանման ճանապարհային կենտրոնի արդիականացման ծրագիրը:
Ռուսական երկաթուղիների լոկոմոտիվային տնտեսության նախագծակոնստրուկտորական բյուրոյի եւ ՀԿԵ տեղեկատվահաշվարկային կենտրոնի մասնագետները կատարելագործել են վագոնի վիդեոհամակարգը, տեղադրել նոր, ժամանակակից համակարգչային տեխնիկա եւ պրոեկտորներ:
Ուսումնական վագոնը նախատեսված է ՎԼ-10 էլեկտրաքարշերի մեքենավարների ընթացիկ ուսուցման, ոչ ստանդարտ եւ վթարային իրավիճակներում գործելու ունակությունների ստուգման համար:
Կենտրոնը համալրված է անհրաժեշտ տեխնիկական սարքավորումներով, ուսումնական գրականությամբ: 2014 թվականին ավարտվել էր կենտրոնի արդիականացման հերթական փուլը` բացվել էր նոր ուսումնական հրապարակը, արգելակման սարքավորումների նոր դասասենյակը:
"Հարավկովկասյան երկաթուղի" փակ բաժնետիրական ընկերության  Ուսուցման ճանապարհային կենտրոնի Վագոն-տրինաժորի պետ Գալուստ Քոչարյանը մեզ հետ զրույցում բացատրեց, թե ինչ է իրենից ներկայացնում վագոն-տրինաժորը.
- Այն իրենից ներկայացնում է շարժական լսարան, որտեղ մենք պարբերաբար` ամեն ամիս մեքենավարներին, իրենց օգնականներին, կապի աշխատակիցներին, երթեւեկության աշխատակիցներին եւ գծային ուղեմասի աշխատակիցներին դուրս ենք բերում դասընթացների` ամբողջ ՀՀ տարածքով` Երեւանից-Այրում, Երեւանից-Երասխ, Երեւանից-Զոդ:  
Խոսելով այսօրվա մեքենավարների մասնագիտական որակների մասին` մասնագետն ասաց.
- Այսօրվա մեքենավարների աշխատանքը կգնահատեմ բավարար: Ի դեպ ասեմ, որ այսօր մեքենավարների խիստ կարիք է զգացվում, երկաթուղու աշխատող մեքենավարների միջին տարիքը 45-50 է: Մեքենավարների կարիք ունենք, որովհետեւ խոսակցություն կա, որ այս տարի տասը մեքենավարներ պետք է գնան թոշակի, իսկ մեքենավար պատրաստելը մի քանի օրվա բան չէ: Մեքենավարը պետք է իր աշխատանքը սկսի ցածրից` գոնե հինգ տարվա ստաժ պետք է ունենա, որ նոր դառնա մեքենավար, չնայած ունենք մեքենավարների քոլեջ` Գյումրիում:

ԻԼՈՆԱ ԱԶԱՐՅԱՆ