«ՄԻ՛ ԺԽՏԻՐ» ԵՐԳՈՎ ՀԱՅԱՍՏԱՆԸ ԿՄԱՍՆԱԿՑԻ «ԵՎՐԱՏԵՍԻԼԻՆ»

«ՄԻ՛ ԺԽՏԻՐ» ԵՐԳՈՎ ՀԱՅԱՍՏԱՆԸ

ԿՄԱՍՆԱԿՑԻ «ԵՎՐԱՏԵՍԻԼԻՆ»

«Եվրատեսիլ-2015» երգի միջազգային մրցույթն այս տարի կանցկացվի Ավստրիայի մայրաքաղաք Վիեննայում` մայիսի 19-ին, 21-ին եւ 23-ին` «Կառուցելով կամուրջներ» նշանաբանի ներքո: Երգի միջազգային մրցույթին այս տարի կմասնակցի 39 երկիր, իսկ Եվրոպական հեռարձակողների միության անդամ մի քանի երկիր` Ուկրաինան, Բուլղարիան, Բոսնիա եւ Հերցոգովինան, Սլովակիան, Թուրքիան, Լիխտենշտեյնը եւ Լյուքսեմբուրգը տարբեր պատճառներով հրաժարվել են մրցույթին մասնակցելուց: Դեռեւս շարունակում է անհայտ մնալ «Եվրատեսիլ-2015»-ին Հայաստանը ներկայացնող արտիստի անունը:

Գրեթե մեկ ամիս առաջ «Իրավունքի» հետ զրույցում «Եվրատեսիլի» հայաստանյան պատվիրակության ղեկավար ԳՈՀԱՐ ԳԱՍՊԱՐՅԱՆՆ ասաց, որ Հանրային հեռուստաընկերությունը դեռեւս փնտրտուքների մեջ է, ու մրցույթին մասնակցող արտիստի անունը պարզ կլինի փետրվարին: Իսկ այդ ընթացքում ընթանում է կատարողի եւ երգի ներքին ընտրություն: Պարզվում է, որ այս տարի «Եվրատեսիլ-2015»-ին Հայաստանը կներկայանա նոր խմբով ու նոր ձեւաչափով: Ավելին` հավատարիմ մնալով մրցույթի այս տարվա նշանաբանին` «Կառուցելով կամուրջներ», ոգեշնչվելով Հայոց ցեղասպանության 100-ամյա տարելիցի խորհրդանիշ անմոռուկի գաղափարով, ինչպես նաեւ առաջնորդվելով բազմաթիվ սփյուռքահայերի ցանկությամբ, ովքեր միշտ եղել են եվրատեսիլյան պատվիրակների կողքին, Հանրային հեռուստաընկերության ստեղծագործական խումբը որոշել է մրցույթին ներկայացնել նոր ձեւաչափ.

«ՓԵՏՐՎԱՐԻ 16-ԻՆ ԿԲԱՑՎԻ ԱՆՄՈՌՈՒԿԻ ՄԵԿ ԹԵՐԹԻԿԸ»

- Կարեւորելով խաղաղության, միասնության եւ հանդուրժողականության գաղափարը` որոշվել է այս տարի համախմբել 1915-ին աշխարհի 5 աշխարհամասերում` Եվրոպայում, Ասիայում, Ամերիկայում, Աֆրիկայում, Ավստրալիայում սփռված հայ ժողովրդի նոր սերնդին: Խմբում ծագումով հայ 5 երգիչներ են, որոնք զուգակցվում են անմոռուկի 5 թերթիկների հետ: Նրանց կմիանա եւս մեկ մասնակից Հայաստանից, որը կհամախմբի թերթիկները: Հատուկ մրցույթի համար ձեւավորվելիք խումբը կկրի Genealogy անվանումը` 6 արտիստ, 6 ճակատագիր, 1 պատմություն:

Իսկ երգը վերնագրված է «Don't deny»` «Մի՛ ժխտիր»: Genealogy խմբի առաջին մասնակցի անունը հայտնի կդառնա փետրվարի 16-ին:

- Իսկ խմբի մյուս 5 անդամների ինքնությունը ե՞րբ հայտնի կլինի հայ հանրությանը:

- Դրանք մեր անակնկալներն են, որոնց մասին պարբերաբար կներկայացնենք: Այսինքն` փետրվարի 16-ին կբացվի անմոռուկի մեկ թերթիկը` հայտնի կդառնա մասնակիցներից մեկի անունը, հենց այդ օրն էլ կտեղեկացնենք, թե երբ ենք հայտնելու հաջորդ մասնակցի անունը:

ԼԻԼԻԹ ԵՂԻԱԶԱՐՅԱՆ

Հ.Գ. Թեմայի մասին առավել մանրամասն կարդացե՛ք տպագիր «Իրավունքի» այսօրվա համարում: