«ԱՆՎՏԱՆԳՈՒԹՅԱՆ ԽՈՐՀՐԴԻ ԱՆԴԱՄ Է ՄԻ ՄԱՐԴ, ՈՐՆ ԻՐ ԳՈՐԾՈՂՈՒԹՅԱՄԲ ՍՏԵՂԾՈՒՄ Է ՆԱԵՎ ԱՆՎՏԱՆԳՈՒԹՅԱՆ ԽՆԴԻՐ»

«ԱՆՎՏԱՆԳՈՒԹՅԱՆ ԽՈՐՀՐԴԻ ԱՆԴԱՄ Է ՄԻ ՄԱՐԴ, ՈՐՆ ԻՐ ԳՈՐԾՈՂՈՒԹՅԱՄԲ ՍՏԵՂԾՈՒՄ Է ՆԱԵՎ ԱՆՎՏԱՆԳՈՒԹՅԱՆ ԽՆԴԻՐ»

Երեկ տեղի ունեցած ՀՀԿ խորհրդի նիստի ժամանակ ՀՀ Նախագահ, Հայաստանի Հանրապետական կուսակցության նախագահ ՍԵՐԺ ՍԱՐԳՍՅԱՆԸ նշել է. «2013-2014թթ. ՀՀ ԱԺ գումարած 145 նիստերից Գագիկ Ծառուկյանը մասնակցել է միայն 4-ին: Եթե նա այդ աստիճանի արհամարհում է իր ընտրողներին եւ Ազգային ժողովի դերը, մենք դրա իրավունքը չունենք. մենք պատասխանատու ենք ՀՀ յուրաքանչյուր քաղաքացու իրավունքների համար: Մեր պատգամավորները վաղվանից կնախաձեռնեն նման անհեթեթ վիճակին վերջ տալու համար անհրաժեշտ քայլերը»: Այս մասին խորհրդի նիստից հետո զրուցեցինք ԱԺ ՀՀԿ խմբակցության պատգամավոր ՍԱՄՎԵԼ ՆԻԿՈՅԱՆԻ հետ:

-Պարոն Նիկոյան, որո՞նք են լինելու այն անհրաժեշտ քայլերը, որոնք կհաջորդեն ՀՀ Նախագահի ելույթին:

- Սկսվելու է կարգով նախատեսված գործընթաց, որը վերաբերում է Ազգային ժողովի պատգամավորի բացակայություններին: Խոսքը վերաբերում է նրան, որ յուրաքանչյուրի գործողությունները պետք է տեղավորել օրենքի մեջ: Եթե քաղաքական գործիչ է, եթե որեւիցե մեկը խոսում է ազգի անունից, պետության եւ պետականության անունից, խոսում է պառլամենտարիզմի անունից, օրենքի անունից, ապա պետք է առաջինը պահանջի իրենից: Այնպես որ, պատգավորները այդ գործընթացը սկսելու են:

- Իսկ ինչպե՞ս է ձեւակերպվելու պատգամավորական մանդատը վայր դնելու պահանջը:

- Կանոնակարգը սահմանում է, որ եթե կան որոշակի բացակայությունների թիվ եւ եթե որեւիցե պատգամավոր այդ թվից ավել բացակայել է անհարգելի, ապա սկսվում է վերոնշյալ գործընթացը, ինչը հստակ ասվել է:

- Ինչո՞վ էր պայմանավորված, որ հենց այս պահին բարձրաձայնվեց այդ մասին:

- Նույն կերպ կարող եք ասել, թե ինչու մինչեւ հիմա անվտանգության խորհրդի անդամ է մի մարդ, որն իր գործողությամբ ստեղծում է նաեւ անվտանգության խնդիր հենց պետության մեջ: Բայց այդ հարցադրումները բազմաթիվ անգամ հնչել են եւ այսօր եկել է այդ հարցադրումներին ընթացք եւ լուծում տալու ժամանակը:

ՀՐԱՆՏ ՍԱՐԱՖՅԱՆ