«ՀԱՄԱԳՈՐԾԱԿՑԵԼՈՎ` ՓՈՐՁՈՒՄ ԷԻՆՔ ՄԻԳՈՒՑԵ «ՀՈՒՆՑԱԾ ԽՄՈՐԸ» ԴԱՐՁՆԵԼ ՈՐԱԿՅԱԼ ՔԱՂԱՔԱԿԱՆ ՈՒԺ ԿԱՄ ԴԵՄՔ»

«ՀԱՄԱԳՈՐԾԱԿՑԵԼՈՎ` ՓՈՐՁՈՒՄ ԷԻՆՔ ՄԻԳՈՒՑԵ «ՀՈՒՆՑԱԾ ԽՄՈՐԸ» ԴԱՐՁՆԵԼ ՈՐԱԿՅԱԼ ՔԱՂԱՔԱԿԱՆ ՈՒԺ ԿԱՄ ԴԵՄՔ»

Երեկ ՀՀԿ խորհրդի նիստից հետո` ԱԺ ՀՀԿ խմբակցության պատգամավոր, Քրիստոնեա-դեմոկրատական կուսակցության նախագահ ԽՈՍՐՈՎ ՀԱՐՈՒԹՅՈՒՆՅԱՆԸ անդրադարձավ ՀՀ նախագահի ելույթին, մասնավորապես «Բարգավաճ Հայաստան» կուսակցության եւ ԲՀԿ առաջնորդի հասցեին հնչեցված կոշտ գնահատականներին.

- Մենք կողմնակից ենք քաղաքական, այդ թվում` նաեւ կառուցողական համագործակցությանը եւ միանգամայն ըմբռնումով ենք վերաբերում ընդդիմադիր քաղաքական ուժերի հանրային կյանքում տեղ գտած քննադատություններին, բայց եթե դրանք չեն անցնում սահմանները եւ նույնիսկ չեն մոտենում ազգային անվտանգությանը: Հիմնականում ՀՀԿ խմբակցության եւ քաղաքական խորհրդի անդամները միաձայն պաշտպանեցին ՀՀ նախագահին եւ գործադիր մարմնի կայացրած գնահատականներին եւ, ըստ էության, պայմանավորվածություն ձեռք բերեցինք քայլ առ քայլ իրավիճակը բերել կառուցողական երկխոսության մթնոլորտի:

- Պարոն Հարությունյան, ըստ Ձեզ, արդյո՞ք չափազանց կոշտ չէին հնչեցված գնահատականները:

-ՀՀ նախագահն այն մարդկանցից մեկն է, որը միշտ աչքի է ընկել շատ զուսպ, ես կասեի` նույնիսկ երբեմն ավելորդ հանդուրժողականությամբ: Բայց, կարծես թե, ինչ-որ մի բան արդեն չափն անցնում էր: Այսինքն` երբ քաղաքական պայքարը կորցնում է իր բնական էությունը, բովանդակությունը եւ ընդհուպ մինչեւ ձեւավորում է ազգային անվտանգության առումով սպառնալիքներ, կարծում եմ` ՀՀ նախագահը որպես մեր ազգային անվտանգության համար մեկ երաշխավորը պարտավոր էր ճիշտ գնահատականներ տալ:

- Բայց չէ՞ որ նույն ԲՀԿ-ն ՀՀԿ-ի նախկին կոալիցիոն գործընկերն էր…

- Ճիշտ եք, եւ նաեւ ՀՀ նախագահը ինքնաքննադատաբար ասաց, որ մենք տարիների ընթացքում համագործակցելով` փորձում էինք միգուցե «հունցած խմորը» դարձնել որակյալ քաղաքական ուժ կամ քաղաքական դեմք: Եվ նա նշեց` ներողություն եմ խնդրում, չստացվեց:

ՀՐԱՆՏ ՍԱՐԱՖՅԱՆ